29
Laman SOMOL u fithik’ e yoko’
1 Mu pininged e sorok ngak SOMOL, gimed gubin e pi chon e tharmiy;
ngan pining e sorok nga feni gilbugwan nge gelngin nib gel.
2 Ngan pining e sorok nga fithingan SOMOL nib th’abi fel’;
ngan siro’ ngak en nib Thothup u nap’an nra m’ug.
3 Laman SOMOL e kanrung’ag u daken e yung i day;
ni fel’ngin Got e be chob ni dirra’,
ma laman e be kumang u regur.
4 Laman SOMOL e kanrung’ag
ni rib gel gelngin ma ba rir.
5 Laman SOMOL e tet’ar e gek’iy ni cedar,
ni mus ko yuke gek’iy ni cedar u Lebanon.
6 Ir e be gagiyegnag e pi burey nu Lebanon be og ngalang ni bod pifak e garbaw,
nge Burey ni Hermon ni be bu key ni bod ba fak e garbaw ni pumo’on.
7 Laman SOMOL e be mateg e uluch.
8 Laman e be rurug e ted ni desert;
be rurug e ted ni desert nu Kadesh.
9 Laman SOMOL e rurug e yuke gek’iy ni oak
ma ke lufluf yuwan e gek’iy nga but’
ko ngiyal’ ni be tolul gubin e girdi’ u Tempel rok ni be lungurad, “Ke sorok Got!”
10 SOMOL e be gagiyegnag e pi regur;
be gagiyeg nib pilung ni dariy n’umngin nap’an.
11 I SOMOL e ma pi’ gelngin e girdi’ rok
mma fal’eg wa’athrad ko gapas.