38
Ba meybil rok be’ ni be gafgow
A SOMOL, dab mu gechig nigeg u fithik’ e damumuw rom!
Kam maad’ad ngog ko gan e gat’ing rom;
ma ka mu gad pa’am ngog.
 
Bochane e damumuw rom ma kug par nga fithik’ e amith nib gel;
downgig e ke polo’ i m’ar ni bochan e pi denen rog.
Gu be lumach u fithik’ pi denen rog nike sugbur;
nib gilab ni kay gi tomal ni nggu chibiy.
 
Bochane e balyang rog,
ma ke ubchiya’ e pi malad rog ma ke yan gal’ochngin.
Ku gu bugbug nga but’, ni ku gu masengseng;
ni polo’ e rran ni gu be gel’gel’.
Gu be yik’ ko gawel nike yib nga dakenag
ma ke chugur ni nggum’.
Ke aw parwog ku gu masengseng;
ke kireb lanin’ug, ma gu be gel’gel’ ko amith.
 
A Somol, ga manang e n’en ni kugum’ ni bochan;
ga be rung’ag gubin e gel’gel’ rog.
10 Be ob gumircha’eg, ma kem’ay gelngig,
ma tamilang u lan owcheg e dakriy.
11 Pi fager rog nge pi’in gamad buguliyoror e dakrir chugurgad ngog,
ni bochan e malad rog;
mus ngak chon e tabnaw rog ni ka ra pired u orel rog.
12 Pi’in yad ba’adag ni ngar thanged e fan rog e yad be tay e wup ni nggu aw ngay,
ma pi’in yad ba’adag ni ngar maad’adgad ngog e yad be yog ni ngar gafgow nigedgag;
darir talgad ko makath nib togopluw ngog.
 
13 Gu bod be’ nib baling ni dabyag ni nge rung’ag ban’en,
ni bod be’ nib ma’ay ni dabyag ni nge non.
14 Gu bod be’ ni yira non ngak ma der fulweg lunguy,
ni bochan e der rung’ag ban’en.
 
15 Machane, gur SOMOL, e be pagan’ug ngom;
ma gur SOMOL ni Got rog, e ga ra fulweg lungug;
16 dab mu pag e to’ogor rog ngar felan’gad ni ku gu gafgow;
dab mu pagrad ngar giriggad ngog ni ku gu dol’!
17 Ke chugur ni nggu aw nga but’ ni darming e amith rog.
 
18 Kugog e pi denen rog ngom;
ma ku gu kal ngan’ug riy.
19 Pi to’ogor rog e ba gel;
ma bo’or i yad e be fenanikayeg ndariy tapgin.
20 Pi’in yad ma fulweg puluwon e fel’ ni kireb
e yad be togopluw ngog ni bochan e gu be guy rogon ni nggu fel’.
 
21 A SOMOL, dab mu pageg;
Got rog, dab mu par u orel rog!
22 A Somol ni ta’ayuw rog, mu aywegeg e chiney!