68
Ba tangin e gel ni fen e nam
Got e sak’iy me wereg e pi to’ogor rok.
Pi’in yad be fanenikan e ra milgad ni kar waergad.
Ni bod e ath nike un ko nifeng, e aram rogon nma tulufrad;
ni bod rogon nma ranran e kindel u mit e nifiy,
e aram rogon e pi’in kireb nra math owcharad u p’eowchen Got.
Machane pi’in bmat’aw e ba felan’rad ni yad be felfelan’ u p’eowchen Got;
yad be tolulnag e felfelan’.
 
Mu tang niged Got, mon’ed e tang ni gimed be pining e sorok nga fithngan;
mu fal’egned e kanawo rok e en ma yan u daken e manileng,
fithngan e cha’nem e SOMOL— ngan felfelan’ u p’eowchen!
 
I Got, nma par u lane Tempel rok nib thothup,
e ma ayweg e pi’in kanim’ rorad mma yoror rok e pi’in ke yim’ figirngirad.
Ma pi’ e tabnaw ko pi’in dakuriy be’ rorad,
ma chuweg e girdi’ u kalbus miyad felan’ ni ka ni pagrad,
ma pi tatogopluw e bay ra pired u lan bbinaw ni kann’ag.
 
A Got, nap’an ni mu pow’iy e girdi’ rom,
ngam marod ngam th’abed e ted ni desert,
me rur e fayleng, me map e n’uw u lang nga but’,
ni bochan e wub rok Got nu Sinai,*
ni aram e wub ko fare Got nu Israel.
Got, gur e ka mu k’aring e n’uw nib gel ni nge aw,
ya nge sul e but’ rom nike kireb nga rogon;
10 girdi’ rom e kar fal’egned taferad u rom;
fanam gol mag pi’ e tin ba t’uf rok e pi gafgow ngorad.
 
11 I Somol e yog e n’en ni ngan rin’,
ma bo’or e ppin nra welyed i yan:
12 “Pilung nge salthaw rorad e ra milgad!”
Ma ppin ni bay u tabnaw e ra f’oded rorad e tin ni kol ko mael;
13 bogi ya’an e dove ni kan ing ko silber,
ni be galgal ram’en porad ko gol.
(Mang ni par boch i gimed u to’oben e chumol ko saf e rofen ni un mael?)
14 Nap’an ni wereg Got ni Gubin ma Rayag Rok fapi pilung u daken e Burey ni Zalmon,
me gagiyegnag nge aw e ayis u rom.
 
15 Rib th’ab feni gel e burey ni Bashan,
fare burey ni bo’or p’ebugul!
16 Burey ni yo’or p’ebugul mang ni ga be thinthin’an
ko fare burey nike mel’eg Got ni nge par riy ndariy n’umngin nap’an.
 
17 Ma yib Somol u Sinai nge yan ngalan fa gin nib thothup,
nike un ngak yu biyu’ i chariot rok.
18 Me yan ngalang ko gin nth’abi tolang,
nike fek e pi’in ni kolrad
me pi’ e pi tatogopluw e tow’ath ngak,
I SOMOL ni Got e ra par u rom.
 
19 Ngan pining e sorok ngak SOMOL,
nma fek e gilab rodad u reb e rran ngu reb;
ir fare Got ni ta’ayuw rodad.
20 Got rodad e ba Got nma thapegey;
ir e SOMOL, ni Somol rodad,
nma lagdad ko yam’.
 
21 Got e rra bilig lolugen e pi to’ogor rok,
ni pi’in darir paged wo’rad ni kireb.
22 Ke ga’ar Somol, “Bay gu fulweg e pi to’ogor rom u Bashan;
Bay gu fulwegrad u t’ay e rigur,
23 ya nge yag nim marod u fithik’ e racha’ rorad,
me lil’ e pilis romed urngin e racha’ ni yad ba’adag.”
 
24 A Got, yigo’ kan guy fare thelap rom nike sul ko mael nike gel,
ni aram fare thelap rok Got, ni pilung rog, ni be yan ngalan tagil’ nib thothup.
25 Pi girdi’en e tang e yad bay nga m’on, ma girdi’en e musik nga tomur,
ma pi’in rugod e yad bay u lukngun ni yad be chubeg e tambourine.
26 “Ngan pining e sorok ngak Got u lane mu’ulung ko girdi’ rok;
mu pininged e sorok ngak SOMOL, gimed gubin e pi’in owchen Jakob!”
27 Benjamin ni ir e bin th’abi achig e ganong, e m’on nra yib,
me migid e pi tayugang’ rok Judah nib mu’un e ulung rorad ngorad,
me lay e pi tayugang’ rok Zebulun nge Naftali.
 
28 A Got, mu dag gelngim,
ni fare gelngin ni kam ayuwegmad ngay
29 ko fare Tempel rom u lan yu Jerusalem,
ko gin ra fek e pilung e tow’ath rom ngom i yib ngay.
30 Mu puwan’ ngak Egypt, fare gamanman ni malboch nu fithik’ e ra’uy;
mu puwan’ ko pi nam, fa ran’ i garbaw ni pumo’on nge pifakrad;
nge taw ko ngiyal’ ni go’ kar siro’gad ngom ngar pi’ed e silber rorad ngom.
Mu werwereg e pi’in ba’adag e mael!
31 Pi owchen reb e nam nga reb e bay rabad u Egypt;
piyu Ethiopia e bay ra tininged pa’rad ngalang ngar meybilgad ngak Got.
 
32 Mu tang niged Got, gimed e pi gagiyeg nu fayleng,
mon’ed e tangin e sorok ngak Somol,
33 ko en nma yan u lanelang,
fare lanelang ni kakrom.
Mmotoyilgad ngak ni be tolul nrib ga’ laman.
34 Mu weliyed gelngin Got;
bugwan nib pilung e ke tharay yu Israel,
gelngin e bay u lanelang.
35 Ri ra ngat’ ngak Got nike yib u tagil’ nib thothup —
fare Got rok yu Israel!
Ma pi’ gelngin ngak e girdi’ rok.
 
Ke sorok Got!
* 68:8 GOT NU SINAI: Girdi’ nu Israel nranod u Egypt nga Kanaan, me m’ug Got ngorad ko Burey nu Sinai (muguy e Exo 19:16–25).