75
Got ni ir e tapufthin*
A Got, gamad be pining e magaer ngom, gamad be og e magaer ngom!
Gamad be weliy i yan feni sorom
ma gamad be yog e pi maang’ang ni kam rin’.
 
Got e be ga’ar, “Kug duwgiliy e ngiyal’ ni ngan pufthin,
ma gu ra pufthin nib mat’aw rogon.
Urngin e pin’en ni bay e yafos riy nra durru’
ma fayleng e ra rur,
machane bay gu duwgiliy e pi duga’ ko fayleng nib muyluy.
Gu be yog ko pi’in kireb ni dab ra ufgad;
Gu be yog ngorad ni ngar talgad ko ufanthin.”
 
Pufthin e der ma yib ko ngek ara ngal ara lel’och ara yimuch;
Ya Got e ir e tapufthin,
nge gechignag boch me faleg wa’athan boch.
I SOMOL e ke kol ba kap nga pa’,
nike sugnag e damumuw rok ni bod e wayin nib gel.
Ra pu’og, ma urngin e pi’in kireb ni yad ra unum;
miyad unum ni dabi aw ta’reb e wa’angchal riy.
 
Machane ri dab gu tal i weliy murung’agen e Got rok Jakob
fa gu tal i tangnag e sorok ngak.
10 Ra buthug gelngin e pi’in kireb,
machane gelngin e pi’in yad ba manigil e ra gel i yan.
* 75: TITLE NI HEBREW: Ba tang rok Asaf.