81
Ba Tangin e Madnom
Mu tolul niged e felfelan’ ngak Got nma n’ufegdad;
mu tang niged e sorok ngak fare Got rok Jakob!
Mu tabab niged e musik mi gimed chubeg e tambourine;
mi gimed chubeg e harp nge lyre ni bfel’ lingan.
Mu thoyed e rappa ni fan ko fare madnom,
ko rofen ni m’ug e pul nge rofen ni ngo’on.
Irera’ e motochiyel u lan yu Israel,
ni yog fare Got rok Jakob.
I pi’ ko girdi’ nu Israel
nnap’an ni cham ko fare nam nu Egypt.
 
Mu gu rung’ag ba lam ndawor gu rung’ag bi’id ni be ga’ar,
“Ku gu fek e gilab u pomed;
kug fek e dug nib tomal u pa’med.
Nap’an ni yib e oloboch ngomed, mi gimed piningeg, mu gu chuwegmed u fithik’.
Gu fulweg lungumed u tagl’ig ni bay u fithik’ e yoko’ nib mith.
Gu sikeng nagmed ko fare alublub nu Meribah.
Mmotoyilgad, e girdi’ rog ko ngiyal’ ni gu be ginangmed;
Israel, gu be athpeg ni mang e yigum motoyil ngog!
Thingar dab mu tedfan yug reb e got.
10 I gag e SOMOL ni Got romed,
ni gu chuwegmed u lan yu Egypt.
Mu faled langmed’, mu gu durwi’iymed.
 
11 “Machane girdi’ rog e dar motoyilgad ngog;
yu Israel e dar folgad rog.
12 Ere ku gu pagrad ngranod u farad gel’an
ngu’ur rin’ed e tin yad ba’adag.
13 Ri gu be athpeg ni gomang e yigi motoyil e girdi’ rog ngog;
ri gu be finey ni gomang e yug ra folgad rog!
14 Ma gu ra gur nigeg ngug gel ko pi to’ogor rorad
mug gad pa’ag ngak e pi’in be togopluw ngorad.
15 Pi’in yad be fanenikeg e bay ra siro’gad u fithik’ e marus u p’eowcheg;
gechig rorad e dariy n’umngin nap’an.
16 Machane gu ra durwi’iymed to tin th’abi fel’ e wheat;
nge honey ni yib ko war ngar mu fosgad ngay.”