22
Ma aram me ga’ar David, “Irera’ e gin bayi par fare Tempel rok SOMOL ni Got riy. Ma irera’ e re altar ni ngi i pi’ e girdi’ nu Israel e maligach ni mo’oruf riy.”
Tin un ngongliy u m’on nni toy fare Tempel
Me yog David ni Pilung ni nge mu’ulung gubin e milekag nga ta’bang ni yad ma par u Israel, ma aram me pi’ e maruwel ngorad. Boch i yad e i th’ab e malang ni ngan fanay ko fare Tempel. Me pi’ e wasey nib yo’or ni ngan ngongliy e rchib nge pin’en ni yima k’adeg ko fapi mban e garog ni plang, nge bronze nib yo’or ndariy be’ nrayag rok ni nge thabthabelnag tomalngin. Me yog ngak e girdi’ nu Tyre ngu Sidon ngar feked i yib ngak e yu ley i ren ni cedar nib yo’or. Ya leamnag David ni ga’ar, “Re Tempel ni nge toy fare mo’on ni fakag i Solomon e thangri fel’ ya’an me gilbugwan u fayleng. Machane kab bitir ndawori yo’or ban’en nike nang, ere thingar gu t’ar midlin.” Ere bo’or bogi ban’en ni mam’en ni fal’eg David rogon nge tay u m’on ni nge yim’.
Ma aram me pining Solomon nib mo’on ni fak, me yog ngak ni nge toy fare tempel rok SOMOL ni Got nu Israel. Me ga’ar David ngak, “Fakag, gu leamnag ni nggu toy ba tempel ni nggu liyor ngak SOMOL ni Got rog riy. Machane me yog SOMOL ngog ni kay gi yo’or e girdi’ ni kug thang e fan rok ma kay gi yo’or e mael ni kug un ngay. Aram fan nde pageg Got nggu toy ba tempel ni fen ni bochan urngin e racha’ ni kug pu’og. Machane ma aram me micheg e re bugithin ni ba’aray ngog. I ga’ar ngog, ‘Bay mu fakay ba pumo’on ni bayi gagiyeg u fithik’ e gapas, ya bay gu pi’ e gapas nga thilrad gubin e to’ogor rok. I Solomon* fithingan, ya n’umngin nap’an ni ir e be gagiyeg e bay gu pi’ e gapas nga Israel mu gu yororiy pa’ag ngorad. 10 Bayi toy ba tempel ni fan ngog. Bayi par nib pagel ni fakag, ma bay gu par ni gag e chitamngin. Pi’in owchen e bay ur gagiyeg niged yu Israel ni manemus.’ ”
11 Miki ul ul David ngay ni ga’ar, “Fakag, ere chiney e mang e yigi i par SOMOL rom ni Got rom, ma mang e yigi tay nga tagil’ e re bugithin ney ni micheg ni nge tem nge yag rom ni mu toy ba tempel ni fan ngak. 12 Ma mang e yigi pi’ SOMOL ni Got rom e tamilang nge gonop ngom nge yag ni mu gagiyegnag yu Israel nib mat’aw ko Motochiyel rok. 13 Fa’an ga ra fol u gubin e pi motochiyel ni pi’ SOMOL ngak Moses ni fan ngak yu Israel, mra fel’ rogom. Mu gelnag lanin’um me pagan’um, dab mu pag ban’en nge k’aring e marus ngom. 14 Me gag e kug k’adgelngig kug kunuy e gol nike chugur i gaman e aningeg bbiyu’ e ton ma silber e ke chugur i gaman aningeg i ragag e bbiyu’ e ton ni ngan fanay ko fare Tempel ni ngan toy. Ma ku bay e bronze nge wasey ndabi may’. Ku gu fal’eg rogon e plang nge malang kug tay, machane thingar kum yagnag boch. 15 Bo’or e girdi’en e maruwel ni bay rom. Bay e pumo’on nib salap i th’ab e malang, ma bay e pi’in ba salap i toy e malang nge pi’in yad ba salap ko dimow naun, ma ku errogon e pi’in yad ba salap i ngongliy gubin mit ban’en nga pa’rad nrayag ni ngar maruwelgad 16 ko gol, silber, bronze, nge wasey. Ere mu tabab e chiney ko maruwel, ma mang e yigi par SOMOL rom.”
17 Me yog David ngak gubin fapi tayugang’ nu Israel ni ngar ayuweged Solomon. 18 Me ga’ar, “I SOMOL ni Got rom e ke par rom ma ke awnag e gapas u gubin yang u to’obem. I pageg nge gel lungug ko gubin e girdi’ ni ur pired e lan e re nam ney, ma chiney e ke mil farad ngak SOMOL nge gur. 19 Ere chiney e ngam pigpig ngak SOMOL ni Got rom u polo’ i gumircha’em nggu polo’ i lanin’um. Mu tabab i toy fare Tempel ya nge yag ni mu tay fare Kahol ko M’ag rok SOMOL nga langgin nge gubin fa pin’en nib thothup ni tatalin e liyor ngak.”
* 22:9 SOLOMON: Re ngachal ney ni Hebrew i yib ko fare bugithin ni “shalom,” ni fan e “gapas, nge dabi buch ban’en rom.”