29
Hezekiah ni Pilung nu Judah
(2 Kings 18:1–3)
Hezekiah e rliw’ nge lal e duw yangren me mang pilung nu Judah, me gagiyeg u Jerusalem ni rliw’ nge mereb e duw. Chitiningin e Abijah ni be’ ni bpin ni fak Zekariah. Me folwok ko ga’ rok ni aram David ni Pilung, i rin’ e tin nib m’agan’ SOMOL ngay.
Fare Tempel nni be’echnag
U lan e bin m’on e pul ko re duw ni mang Hezekiah e pilung me bing bayay fapi garog ko fare Tempel me yog ngan ngongliy bayay e yuyang ni nike kireb riy. Me ulunguy ba ulung i prist nge pi Levite ngalan fare yoror ko Tempel u ley ni ngek me non ngorad u rom. I ga’ar ngorad, “Gimed e pi Levite e ngam be’ech niged gimed nrogon ko motochiyel miki gimed be’echnag fare Tempel rok SOMOL ni Got rok e pi chitamngimed. Mu chuweged u lan fare Tempel urngin e tin be alit nag. Pi chitamngidad e da ur yul’yul’gad ngak SOMOL ni Got rodad mu ur rin’ed e tin nde m’agan’ ngay. Ra n’iged miyad pi’ keru’rad ko fa gin nma par riy. Ra ninged mban fare Tempel, miyad pag fapi magal nge math, ma ku ra paged i urfiy e incense ara maligach ni mo’oruf u lan fare Tempel rok Got nu Israel. Bochan e ren’ey ma ka be par SOMOL nib damumuw ngak yu Judah nge yu Jerusalem, ma n’en nike rin’ ngorad e ke gin ma ke tamdag gubin e girdi’ ngay. Gimed manang e ren’ey nrib fel’ rogon. Pi chitmangidad e nli’rad ngarmad’ u fithik’ e mael, ma pi le’engidad nge pifakdad e ka ni fekrad nga wuru’ e nam ni yad ba kalbus.
10 “Chiney e ku gu turguy u wun’ug ni nggu ngongliy bm’ag u thildad SOMOL ni Got nu Israel, ya nge yag ni m’ay e damumuw rok ngodad. 11 Pifakag, dabkum pired. Gimed e pi’in nike mel’egmed SOMOL ni ngu’um urfiyed e incense ngak mi gimed gafaliy e girdi’ ngar liyorgad ngak.”
12-14 Tin ba’aray e pi Levite ni ur moyed u rom:
Fare ke gird’ rok Kohath, e Mahath nib mo’on ni fak Amasai, nge Joel nib mo’on ni fak Azariah
Fare ke girdi’ rok Merari, e Kish nib mo’on ni fak Abdi, nge Azariah nib mo’on ni fak Jallelel
Fare ke girdi’ rok Gershon, e Joah nib mo’on ni fak Zimnah, nge Eden nib mo’on ni fak Joah
Fare ke girdi’ rok Elizafan, e Shimri nge Jeuel
Fare ke girdi’ rok Asaf, e Zekariah, nge Mattaniah
Fare ke girdi’ rok Heman, e Jehuel nge Shimei
Fare ke girdi’ rok Jeduthun, e Shemayah nge Uzziel
15 Pi pumo’on ney e ra ulungyed pichongrad ni pi Levite, ni yad gubin mra bengbeng naged yad ni ngar be’echgad. Ni aram rogon nike yog fare pilung ngorad ni ngar rin’ed, miyad tabab i be’echnag fare Tempel nrogon ko motochiyel rok SOMOL. 16 Me yan e prist ngalan fare Tempel ni ngar be’ech niged, miyad fek e tin ba alit nga wuru’ e Tempel ngalan e yoror. Mu rom e fek e pi Levite riy nga wuru’ e binaw ngar feked ngalan e loway ni Kidron fithingan.
17 Ni tabab ko re gaf i maruwel ney ko bin m’on e rran ko bin m’on e pul, me yan i meruk fen ma ka ra mu’gad i ngongliy fapi maruwel nib mu’un fare senggil ngay ni yima yan riy ngalan fare Tempel. Ma aram muk ra maruwelgad ni meruk e rran, nge mada’ ko rofen ni ragag nge n’el fen e pul ko re pul nem ni yad be ngongliy rogon fare Tempel ni ngu’un liyor ngak SOMOL riy.
Fare Tempel nni pi’ ngak SOMOL bayay
18 Ba’aray e thin ni yannag e pi Levite ngak Hezekiah ni Pilung: “Ku gu mu’gad i tabgulnag fare Tempel ni ga’ngin nrogon ko motochiyel, nib mu’un ngay fare altar ni fen e maligach ni mo’oruf, nge fare tebel ni fen fare flowa nib thothup, nge urngin e pi talin e maruwel riy. 19 Mu kug fulweged gubin gathon fare Tempel ni fek Ahaz ni Pilung ni ka nap’an fapi duw nda i yul’yul’ ngak Got, ku gu pi’ed e pin’em bayay ngak Got. Go’ bay ni gubin u mit fare altar rok SOMOL.”
20 Ka ngiyal’nem me kunuy Hezekiah ni Pilung e pumo’on ni yad ma yog thin u lan fare binaw, me un ngorad ngranod ngalan fare Tempel. 21 Miyad fek i yan medlip e garbaw ni pumo’on, nge medlip e saf, nge medlip e pifak e saf, nge medlip e kaming. Aram e maligach ni nge chuweg machan e pi denen ko tabnaw rok fare pilung nge girdi’ nu Judah me be’echnag fare Tempel. Fare pilung e yog ko fapi prist ni pi’in owchen Aron, ni ngar pi’ed e pi gamanman nem ni maligach u daken e altar. 22 Fapi prist e ra li’ed fapi garbaw ni pumo’on nsom’on, nge mu’ me migid e saf, mfini migid e pifak e saf, miyad atngiy racha’en fapi gamanman ni maligach nga daken fare altar. 23 Ma tomuren e ra feked fapi kaming i yan ngak fare pilung nge pi girdi’en e liyor, ni yad e rted pa’rad nga daken fapi gamanman. 24 Ma aram e fapi prist e ra li’ed fapi kaming miyad pu’og racha’ riy nga daken fare altar nib maligach ni nge chuweg e denen rok e pi girdi’ nem ni gubin, ya keyog fare pilung ni ngan pi’ e maligach ni mo’oruf nge maligach ni fan ko denen ni fen ga’ngin yu Israel.
25 Fare pilung e fol u gubin e tin keyog SOMOL ngak David ni Pilung, ni non u l’ugun Gad ni profet rok David, ngu l’ugun Nathan ni profet; i tay fare pilung e pi Levite u lan fare Tempel ni bay e rappa nge cymbal rorad, 26 nge talin e musik ni bod e tinem niki i musik David ni Pilung ngay. Miki sak’iy fapi prist u rom ni bay e rappa rorad. 27 Me yog Hezekiah ni ngan pi’ fare maligach ni mo’oruf; ma nap’an ni tabab i pi’ fare maligach, me tang e girdi’ ni yad be pining e sorok ngak SOMOL, me tabab e girdi’en e musik i thoy e rappa ma yi be chubeg gubin mit e talin e musik ni bay. 28 Gubin e girdi’ ni immoy u rom miyad un ko liyor ngak SOMOL, ma de tal e tang nge musik nge mada’ ko ngiyal’ ni kan mu’ i urfiy fapi maligach. 29 Ma aram me ragbug Hezekiah nge gubin e girdi’ u rom nga but’ ngar liyorgad ngak Got. 30 En ni pilung nge pi’in yad ma yog e thin ko fare nam e rogned ngak e pi Levite ni ngar tang niged SOMOL ni yad be yin’ tangin e sorok ni yoloy David nge Asaf ni profet. Ma aram me tang gubin e girdi’ nri yad ba felfelan’ ni karragbuggad nga but’ ni yad be liyor ngak.
31 Me ga’ar Hezekiah ngak fapi girdi’, “Chiney ni ka mu be’echgad nrogon ko motochiyel e ngam feked i yib e maligach ni nga ni pi’ ni og magaer ngak SOMOL.” Miyad fol riy, ma boch i yad e ku ra og niged boch e gamanman ni ngan pi’ ni maligach ni mo’oruf. 32 Ra feked i yib medlip i ragag e garbaw ni pumo’on, nge ra’ay e saf, nge l’agruw mir’ay e pifak e saf ni bogi maligach ni mo’oruf ni fan ngak SOMOL; 33 mu ku ra feked i yib n’el mir’ay e garbaw ni pumo’on nge dalip bbiyu’ e saf ni bogi maligach ni fan e nge kay e girdi’. 34 Aram rogon nde gaman e prist ni ngar li’ed gubin e pi gamanman ney, me ayuw e pi Levite nge mada’ ko ngiyal’ nike m’ay e re maruwel ney. Nap’an ni taw ko ngiyal’nem ma bo’or e prist ni ka ra be’ech niged yad nrogon ko motochiyel. (Pi Levite e yad ba yul’yul’ boch ngak e prist u rogon ni yad ma tayrad ni yad bbe’ech nrogon ko motochiyel.) 35 Prist e yad ma pi’ fapi maligach ngak SOMOL ni yima urfiy ni polo’, ma ku yad e maruwel rorad e pi yungi mam riy ni yima pi’ ngak SOMOL ko fapi maligach nma kay e girdi’, ma ku yad e yad ma pu’og fare wayin ni yima uneg ko fapi maligach ni mo’oruf ngan pi’ ngak SOMOL.
Ma aram mi ni tabab bayay ko liyor ngak SOMOL u lan fare Tempel. 36 Me felfelan’ Hezekiah ni Pilung nge girdi’ ni bochan e ke ayuwegrad Got ke yag ni ngar rin’ed e pin’ey ni papey.