3
1 David ni Pilung ni chitamngin Solomon e ke mu’ i ngongliy rok e gin ngan toy fare Tempel ngay. Ni bay u lan yu Jerusalem u daken fare Burey ni Moriah, ni aram fa gin’en ni m’ug SOMOL riy ngak David, ni tagil’ e mn’ag keru’ e grain rok Araunah ni be’ nu Jebus. Me tabab Solomon ni Pilung ko dumow
2 u lan e pul ni l’agruw ko duw ni gaman e aningeg ngay nike mang pilung.
3 Re Tempel nem ni toy Solomon ni Pilung e mereb i ragag e fit n’umngin ma guyey e fit radan.
4 Fare senggil ni yima yan riy ngalan e naun e ta’reb ga’ngin radan nga radan fare Tempel, guyey e fit radan ma ra’ay nge meruk i ragag fit tolngin. Ma langgin fare senggil e ka ni gabdiy e gol riy ni tin th’abi fel’.
5 Bin ni th’abi ga’ e senggil e ni gabdiy e palang ni cedar ko rungrung u langgin min gabdiy e gol nrib fel’ nga daken, ni kan ker ya’an e gek’iy ni palm nge yu kiy i chen nga daken.
6 Me nunuwnag fare pilung fare Tempel ni bfel’ ya’an ko malang nib tolang pulwon nge gol nni fek ko fare nam nu Parvaim.
7 I fanay e gol nge gabdiy ko rungrung ko fare Tempel, nge llon riy, nge mirichlen e mab, nge mab. Daken e rungrung riy e ke ker ya’an e pi kerubim ngay.
8 Fare senggil u langgin ni yima yog ni aram e Gin Th’abi Thothup riy e guyey e fit n’umngin ma guyey e fit radan, ni aram ga’ngin radan fare Tempel, ma rliw’ nge lal e ton e gol nfanay ngan gabdiy nga daken e rungrung ko Gin Th’abi Thothup riy,
9 rliw’ e ounce e gol nni fanay ko richib, ma rungrung ko tini ngalang e senggil e kuni gabdiy e gol ngay.
10 Miki yog fare pilung ngak girdi’en e maruwel ngar ngongliyed l’agruw i kerubim ko wasey, ni ngan ing ko gol, ngar ted ngalan fa Gin Th’abi Thothup,
11-13 ni yow ba ta’abfayon ni yow ba sap nga langan e mab. Ra reb e gali n’ey ma l’agruw pon, ra barba’ i pon ma medlip nge baley e fit n’umngin, ni kar pithigew e changag ni be math porow nga ta’bang u lukngun fare senggil ma ra bagyow ma be math barba’ i pon ko rungrung u barba’ fare senggil, ba k’iy porow u barba’ nga barba’ fare senggil ni guyey e fit radan.
14 Mi ni ngongliy bangi kateng ni fen fa Gin Th’abi Thothup nni ngongliy ko mad ni wech nge ku boch ban’en mi ni k’ad ko ma’chaw ni ra’en mak’ef, nge purple, nge row, ni kan susunag ya’an e kerubim nga daken.
Fagal duga’ ni Bronze
(1 Kings 7:15–22)
15 Me yog fare pilung ni ngan ngongliy l’agruw ley i duga’, nra reb ma wugem nge l’agruw e fit tolngin, mi ni tay fagal duga’ nga mit fare Tempel. Ra ba ley ma bay bangi ban’en u p’ebugul ni medlip nge baley e fit tolngin.
16 Ma p’ebugul fagal duga’ e kan nunuwnag ko yuyil’i chen ni kan lifith nge ra’ay i wom’ngin e gek’iy ni pomegranate nib bronze.
17 Fagal duga’ e nn’uf u barba’ ngu barba’ i langan e mab ko fare Tempel: bin ni bay ko yimuch e ni tunguy fithingan ni Jakin ma bin bay ko lel’och e ni tunguy fithingan ni Boaz.