6
Numon ni tay Solomon ko Girdi’
(1 Kings 8:12–21)
1 Ma aram me meybil Solomon ni Pilung ni ga’ar,
“SOMOL, gur e ka mu mel’eg ni ngam par u fithik’ e manileng nge lumor.
2 Are chiney e ku gu ngongliy ba tempel nib rir ni fan ngom,
bangi ban’en ni ngam par riy ni manemus.”
3 Ngiyal’ ni ba’aram nib sak’iy ga’ngin yu Israel u rom. Me cheal e en ni pilung u luwan nge sap ngorad me ning ngak Got ni nge fal’eg wa’athrad.
4 Ni ga’ar, “Ke sorok SOMOL ni Got nu Israel! Ke tay nga tagil’ e n’en ni micheg ngak David ni chitamag ni fa’an ni ga’ar ngak,
5 ‘Nap’an fa ngiyal’ ni gu fek e girdi’ rog nga wuru’ yu Egypt ke mada’ ko chiney, ma da gu mel’eg reb e binaw u lan e nam nu Israel ni aram e gin ngan toy ba tempel ngay ngu’un liyor ngog riy, ma dagu duwgiliy be’ ni ngi i gafaliy piyu Israel ni girdi’ rog.
6 Machane chiney e ku gu mel’eg yu Jerusalem ni aram e gin ngu’un liyor ngog riy, me gur David e ngu’um gagiyegnag e girdi’ rog.’ ”
7 Miki ul ul Solomon ngay, “Chitamag i David e tafinaynag ni nge toy ba tempel ni ngu’un liyor ngak SOMOL ni Got nu Israel riy,
8 machane me ga’ar SOMOL ngak, ‘Tafinay ni kam tay ni ngam toy ba tempel ni fan ngog e ba mat’aw,
9 machane gur e ri dab mu toy. Be’ nib mo’on ni fakam, be’ nri fakam e ir e bayi toy e tempel rog.’
10 “Ere chiney e ke tay SOMOL nga tagil e n’en ni micheg: Ku gu wan nga luwan e chitamag ku gu mang pilung nu Israel, ku gu toy ba tempel ni fan e ngu’un liyor ngak SOMOL ni Got nu Israel riy.
11 Ku gu tay fare Kahol ko M’ag ngalan fare Tempel, re Kahol nem e bay fa gal yang i malang riy ni fare m’ag ni ngongliy SOMOL u thilin nge girdi’ nu Israel.”
Meybil Rok Solomon
(1 Kings 8:22–53)
12 Ma aram me sak’iy Solomon nga mit fare altar nga p’eowchen e girdi’ nu Israel nge pug pa’ ngalang ngi i meybil. (
13 I Solomon e ngongliy bang i fang ko bronze nge tay nga lukngun fare yoror. Re gi fang nem e meruk e fit n’umngin nge radan ma lal e fit tolngin. Me yan Solomon nga daken fare gi fang me ragbug nga but’ ko gin nra guy e girdi’ ni gubin riy, me pug pa’ ngalang nruw raba’.)
14 Me meybil ni ga’ar, “SOMOL ni Got nu Israel, dariy e Got ni bod gur u ga’ngin e tharmiy ngu fayleng. Kam tay nga gil’ fare m’ag u thilmed e girdi’ rom u n’umngin nap’an ni yad be fol rom u polo’ i gumircha’rad.
15 Kam tay nga gil’ e n’en nim micheg ngak e chitamag i David; daba’ e gubin e thin e ke yibi aw nga rogon ni mog.
16 Ere chiney SOMOL ni Got nu Israel, mu tay nga tagil’ fa bug nem e thin ni mog ngak e chitamag ni ga ra rin’ nap’an ni lungum ngak e gubin ngiyal’ ma reb e pi’in owchen e bayi gagiyeg ni pilung u Israel, ni fa’anra yad be fol ko Motochiyel rom ni bod ni rin’ David.
17 Ere chiney, SOMOL ni Got nu Israel, mu tay nga gil’ urngin e tin mmicheg ngak e tapigpig rom i David.
18 “Machane, Got, mog rayag rom ni ngarim par u roy u fayleng u fithik’ e pumo’on nge ppin? Mus ngalan e tharmiy ni ga’ngin ma dab mu taw nga langgin, ere bu uw rogon ma ga taw ngalan e re Tempel ney ni kug toy?
19 SOMOL ni Got rog, i gag e tapigpig rom. Mmotoyil ko meybil rog ma ga pi’ ngog e pin’en ni gu be ning ngom.
20 Matanagiy e re Tempel ney ni rran nge nep’. Kam micheg ni irera’ e gin bay un liyor ngom riy, ere mmotoyil ngog ko ngiyal’ ni gu ra sap ko re Tempel ney nggu meybil.
21 Mu rung’ag e pi meybil rog nge pi meybil rok e pi girdi’ rom ni piyu Israel nap’an ni yad ra sap ko gin’ey ngar meybilgad. U lan tafnam u tharmiy e ngam mmotoyil ngomad riy ma ga n’agfan e denen romad.
22 “Nnap’an ni yira yog nike rin’ be’ e kireb ku be’ min fek i yib ko altar rom u lan e re Tempel ney ni ngamog ni de buch e rok,
23 ma SOMOL, ngam mmotoyil ngorad u tharmiy ngam turguy e kireb rok e pi tapigpig rom. Mu gechignag e en nib buch e rok nrogon e gechig nib mat’aw ni nge aw ngak ma ga pithig u pulwon e en ni bfel’ e rok.
24 “Nap’an nra gel e pi to’ogor rok e girdi’ nu Israel ngorad ni bochan e ka ra denen gad nib togopluw ngom, ma nap’an ni yad ra sul ngom ngarbad ko re Tempel ney miyad meybil ngom u fithik’ e sobut’an ni ngam n’agfan e denen rorad,
25 ma SOMOL, motoyil ngorad u tharmiy. Mu n’agfan e pi denen rok e girdi’ rom ma ga fulwegrad nga daken fare nam ni ka mu pi’ ngorad nge pi chitamngirad kakrom.
26 “Nap’an ni ga ra taleg e n’uw ni bochan e ke denen e girdi’ rom nib togopluw ngom, ma nap’an ni yad ra pi’ keru’rad ko denen rorad miyad sap ko re Tempel ney, ngar meybilgad ngom u fithik e sobut’an,
27 ma SOMOL, mmotoyil ngorad u tharmiy ma ga n’agfan u wun’um e pi denen rok e pi tapigpig rom, ni girdi’ nu Israel, ma ga fil rogon ngorad ngu’ur rin’ed e tin nib mat’aw. SOMOL, ma aram, ma ga pi’ e n’uw nga daken e re nam rom ney, ni ka mu pi’ ngak e girdi’ rom ni ngar tafned.
28 “Nap’an nra yib e yungol u lan e re nam ney fa yib e misilpig ni yima yim’ riy fa li’ e nifeng nib gowal e woldug fa yib e asmen’ing ni yo’or nge li’ e woldug, fa yib e to’ogor ngar chamgad ngak e girdi’ rom, fa yib e m’ar nga fithik’rad,
29 ma ga motoyil ko pi meybil rorad. Fa’anra gafgow laniyan’ boch i yad e girdi’ rom nu Israel miyad pug pa’rad nruw raba’ ngalang ni yad ba sap ko re Tempel ney ngar meybilgad,
30 ma ga rung’ag e meybil rorad. Mmotoyil ngorad u tafnam u tharmiy ma ga n’agfan u wun’um e kireb rorad. Kemus ni go’ gur e gamnang e tafinay rok e girdi’. Ra be’ ma ga pi’ ngak e tin nib m’ag ko ngongol rok,
31 ya nge yib madgum u laniyan’ e girdi’ rom mu ur folgad rom ni gubin ngiyal’ ni yad be par u lan fare nam ni ka mu pi’ ngak e pi chitamngirad.
32 “Nap’an nra rung’ag pi yu bang ni yad ma par nib palog rogon feni sorom nge feni gel gelngim nge rogon ni gubin ngiyal’ ma ga bfal’eg rogom ni ngam rin’ ban’en, ma aram e yad ra yib ni ngar meybilgad u lan e re Tempel ney,
33 ma ga motoyil ko meybil rorad. U tharmiy ko gin ga ma par riy, e ngam motoyil riy ngorad ma ga pi’ ngorad e n’en ni yad be ning ngom’, ya nge yag ni nangem urngin e girdi’ nu fayleng ngar folgad rom, ni bod rogon ni be rin’ e girdi’ rom nu Israel. Ma aram e yad ra nang nre Tempel ney ni ku gu toy e irera’ e gin ngu’un liyor ngom riy.
34 “Nap’an ni ga ra yog ngak e girdi’ rom ni ngranod ko mael nib togopluw ngak e pi to’ogor rorad miyad meybil ngom, ma demturug e gin’en yad bay riy, ni yad ba sap ko re binaw ney ni gur e mu mel’eg nge re Tempel ney ni ku gu toy ni fan ngom,
35 ma ga motoyil ko pi meybil rorad. Mu rung’ag e meybil rorad u tharmiy mag gagiyeg nagrad ngar gelgad.
36 “Nap’an nra denen e girdi’ rom nib togopluw ngom — ya dariy be’ ndar ma denen — ma ga pagrad nge gel e pi to’ogor rorad ngorad ni bochan e damumuw rom mi ni fekrad ni kalbus nga yug reb e nam, ni yug aram rogon nib mal’af e re nam nem,
37 ma ga ra motoyil ko pi meybil rok e pi girdi’ rom. Fa’anra yad bay u lan e re nam nem miyad pi’ keru’rad ko denen rorad ngar meybilgad ngom, ni yad be weliy ngom rogon farad denen nge ferad kireb, ma ga motoyil ko pi meybil rorad, SOMOL.
38 Fa’anra yad bay u lan e re nam nem ma riyul’ ni ka ra pi’ed keru’rad ko kireb rorad miyad meybil ngom ni yad ba sap ngaray ko re but’ ney ni ka mu pi’ ngak e pi chitamngirad, re binaw ney ni gur e mu mel’eg, nge re Tempel ney ni ku gu toy ni fan ngom,
39 ma aram ma ga motoyil ko pi meybil rorad. U tabnaw rom u tharmiy e ngam motoyil ngorad riy ma ga runguyrad ngam n’agfan u wun’um urngin e pi denen rok e girdi’ rom.
40 “Got rog, ere chiney e ngam changar ngomad ma ga motoyil ko pi meybil romad ni gamad be pi’ ngom u lan e re gin’ey.
41 SOMOL ni Got, mu sak’iy e chiney, ngam un ko fare Kahol ko M’ag, ni aram e pow u gelngim ngam man ngalan e Tempel ngam par u roy ndariy n’umngin nap’an. Mu fal’eg wa’athan e pi prist rom ko gubin e tin yad be rin’, mang e yigi felfelan’ gubin e girdi’ rom ni bochan e ri gab manigil ngorad.
42 SOMOL ni Got, dab mu faluwosnag e re pilung ni gur e mmel’eg. Mu tay u lanin’um rogon feni ba t’uf rom i David ni tapigpig rom.”