8
Pangiy ni Kan ni Thothup e be gagiyegnag
Chiney e dab kun turguy e gechig rok e pi’in kar ta’ab girdi’gad Kristus Jesus. Ya motochiyel rok fare Kan ni Thothup ni ir e ma fek e yafos i yib ngodad ko ta’ab girdi’ ni gadad ma tay Kristus Jesus e ke chuwegeg* ko gagiyeg nma tay e denen nge yam’. I Got e ke rin’ e n’en nde yag ni nge rin’ e Motochiyel ni fan ngodad ni bochan e gadad bme’ewaer nrogon e girdi’. Ke l’oeg Fak ke yib ni bay downgin ni bod rogon e dowef rodad nrayag ni nge denen, mu fithik’ e re dowef nem ni pi’ ni maligach e gechignag Got e denen riy. I rin’ Got e ren’ey ni fan e tin ni be yog e Motochiyel ni ngad rin’ed e nge yan i aw ngarogon u fithik’dad e pi’in ni fare Kan ni Thothup e be gagiyegnag pangidad, ma gathi rogon nib m’agan’ e dowef rodad ngay. Pi’in yad be ngongol nrogon ni be yog e dowef rorad ngorad e tin ni ba’adag e dowef rorad ni ngar rin’ed e ir e ke par ni be gagiyegnag lanin’rad. Ra par lanin’med ni tin ni ba’adag e dowef romed e ir e be gagiyegnag, ma wenegan nra yib e yam’; mra par lanin’med ni tin ba’adag e Kan ni Thothup e ir e be gagiyegnag, mra yib wenegan ni yafos nge gapas. Ere be’ e ra mang to’ogor rok Got ni fa’anra par laniyan’ ni tin nib kireb ni be yim’ ni bochan e ir e be gagiyegnag laniyan’ fa’anem; ya aram e der fol ko motochiyel rok Got, ma bin riyul’ riy e dabiyag rok ni nge fol riy. Pi’in yad be fol ko tin nib kireb ni yad be yim’ ni bochan e dabiyag ni ngar ngongliyed e tin nib m’agan’ Got ngay.
Machane damur ngongolgad ni bod rogon ni be yog e dowef romed ngomed; gimed be ngongol nrogon ni be yog fare Kan ni Thothup ngomed — ni fa’anra riyul’ ni be par e Kan ni Thothup u fithik’med. En ndariy rok fare Kan ni Thothup rok Kristus e gathi reb i girdi’en. 10 Machane fa’anra be par Kristus u fithik’med ni yugu aram rogon ni ba yam’ e dowef romed ni bochan e denen, machane fare Kan ni Thothup e kemang yafos romed, ni fan e ke mat’aw nagmed Got ngak. 11 Fa’anra be par fare Kan ni Thothup rok Got u fithik’med, ni ir e faseg Jesus ko yam’, me ere en ni ir e faseg Kristus ko yam’ e ku ra pi’ e yafos ko dowef romed nra yim’, nra pi’ u daken fare Kan ni Thothup rok ni bay u fithik’med.
12 Pi walageg, dakuriy rogon ni ngu’ud pired ni gadad be rin’ e tin nib kireb ni gadad be yim’ ni bochan. 13 Ya fa’anra um ngongolgad nrogon nib m’agan’ e dowef romed ngay ma gimed ra yim’; machane fa’an gimed ra li’ ngem’ e ngongol romed nib denen nga gelngin fare Kan ni Thothup, ma gimed ra fos. 14 Pi’in be pow’iyrad fare Kan ni Thothup rok Got e yad pifak Got. 15 Ya fare Kan Nthothup nike pi’ Got ngomed e der ma taymed ni gimed e sib ko denen ngu’um pired ni gimed be rus; ya re Kan Nthothup nem e ma ngongliymed ngam manged pifak Got, ma gelngin e Kan Nthothup e gadad ma non riy ngak Got nma lungudad, “Chitamag! Chitamag!” 16 Fare Kan Nthothup rok Got e ir e be micheg nga lanin’dad ni gadad pifak Got. 17 Ere fa’anra kad manged pifak, mrayag ngodad e fla’ab nike tay ni fan ko girdi’ rok, ma kagdad ra un ngak Kristus ngad fanayed e tin ke tay Got ni fen; ya fa’anra gadad be un ko gafgow ni tay Kristus, ma ka gadad ra un ko fla’ab rok.
Fla’ab ni bay yib
18 Gu be tafinaynag ni gafgow ni gadad be tay e chiney e dabi chuchugur ni nge ta’reb rogon ko fla’ab ni dawor da guyed ma be son nagdad. 19 Urngin e pin’en ni sunumiy Got e ri yad be sonnag e chirofen ni bayi fla’abnag Got pifak. 20 Ya tin ni sunumeg Got e turguy Got ni nge m’ayfan, ni gathi yad e ra leam niged, machane bochan e Got e leamnag ni nge yodorom. Machane yad be son u fithik’ e pagan’, 21 ni aram e reb e rran e bay ra pired ni gathi yad e sib rok e wod, miyad un ko fla’ab rok pifak Got. 22 Gadad manang ni urngin e tin ke sunumiy Got e be gel’gel’ ko amith ni bod rogon e amith ko gargel, ni kab kakrom i yib ke mada’ ko chiney. 23 Gathi kemus ni tin ke sunumiy Got; gadad e pi’in bay fare Kan Nthothup rodad ni ir e bin som’on ko pi tow’ath rok Got, e ku er rogodad ni gadad be gel’gel’ u fithik’ i lanin’dad, ma gadad be sonnag Got ni nge ngongliydad ngad manged pifak, me chuwegdad u tan pa’ e wod. 24 Yu daken e pagan’ rodad e ir e thapegdad Got riy ngak; machane fa’an mang e gadad be guy e n’en ni ir e be l’agan’dad ngay, me ere dabki yan i aw ni ba pagan’. Mini’ e ma pagan’ nga ban’en ni ban’en ni be guy? 25 Machane fa’anra l’agan’dad nga ban’en ndariy guyed, ma ngu’ud son niged u fithik’ e gumaen’.
26 Ere ku errogon fare Kan Nthothup nma yib i ayuwegdad ko me’waer rodad. Ya ra dab da nanged e yu bugithin ni ngdogned nge yag nda meybilgad nrogon, ma fare Kan Nthothup e ir e ma weliy ngak Got e n’en ni gadad be wenignag ni rrogon ndabiyag i weliy ko thin. 27 Mi Got, nma guy e tafinay rok e girdi’, e manang e tin ni be leamnag fare Kan Nthothup; ya fare Kan Nthothup e ma wenignag e tirok’ Got e girdi’ ngak Got nrogon nib m’agan’ Got ngay.
28 Urngin e pi’in ke piningrad Got ko tin be leamnag ni pi’in nib t’uf Got rorad, e gadad manang nma ayuwegrad Got nge pingeg urngin ban’en nge fel’ ngorad. 29 Pi’in ke mu’ i mel’egrad rok Got e ku errogon nike falrad ngabang ni ngar boded e cha’ ni Fak, ya nge par ni en ni Fak e ir e ba ilal u fithik’ e pi walag nem ni yad bpire’. 30 Ere Got e ke pining e pi’in ir e ke falrad ngabang; gathi kemus nike piningrad, ya ku errogon nike mat’aw nagrad ngak; gathi kemus nike mat’aw nagrad ngak, ya ku errogon ni ngar uned ngak ko fla’ab rok.
Rogon ni t’ufeg Got e girdi’ u daken Jesus Kristus
31 Mang e bay ni kagadad ra weliy u murung’agen e pin’ey? Fa’anra bay Got u ba’ rodad, me mini’ e rayag rok ni nge togopluw ngodad? 32 Mus ngak Fak me pi’ ni fan ngodad ni gadad gubin nde yag ni nge tel! Ke pi’ Fak ngodad — ere gathi ku ra pi’ urngin ban’en ngodad ndariy puluwon? 33 Ere mini’ e en nra yog nib kireb e rok e pi’in ke mel’egrad Got? Ya Got e ir e keyog nde kireb e rorad! 34 Gur rayag rok be’ ni nge turguy e gechig rorad? Kristus Jesus e gathi kemus ni yim’ ni fan ngodad, ya ku ni faseg ko yam’ ke yan i par nga ba’ ni mat’aw rok Got. Be wenig nagdad ngak Got! 35 Rogon ni gadad ba t’uf rok Kristus e mini’ e rayag rok ni nge daregdad riy? Gur rayag rok e magafan’, ara n’en nma yib ngodad nib mo’maw’, ara gafgow ni yima tay ngodad, ara uyongol, ara gafgow ni yima tay, ara ban’en ni yira riya’ riy, ara yam’? 36 Ni bod rogon ni be yog e babyor nib thothup ni be ga’ar:
“Polo’ e rran ni gamad be yan u thathren e riya’ ni bocham,
kan taymad ni gowa gamad e saf ni ngan li’ ngem’.”
37 Danga’, cha’nem ni gadad ba t’uf rok e ir e ke pi’ gelngidad kad gelgad u fithik’ e pin’ey ni gubin! 38 Ya rogon ni gadad bt’uf rok e bmuduwgil u wun’ug ndariy ban’en nrayag ni nge daregdad riy, ndemturug ko yam’ ara yafos; ara pi engel ara yugu boch e kan ni be gagiyeg u tharmiy ara boch e gelngin; ara tin ni bay e chiney ara tin ni bay yib; 39 ara bin nu lang e tamilang ara bin nu ar e tamilang dariy ban’en u fithik’ urngin e tin ke sunumiy Got nrayag rok ni nge daregdad u rogon ni gadad ba t’uf rok Got nike yag ngodad u daken Kristus Jesus ni ir e Somol rodad.
* 8:2 ke chuwegeg; boch e babyor e bay rin ni ke chuwegem; boch e girdi’ e ke chuwegrad ke chuwegdad.