4
Tayfan ni yibe tay ngak Got u tharmiy
Ma aram min piliyeg e changar rog ngku gguy ba mab nike mab u tharmiy.
Ma fare lam ni gowa laman ba rappa ni gu rung’ag laman ni i non ngog ko som’on e ga’ar, “Moy ngaray ngalang, mu gu dag ngom e n’en ni bay yib i m’ug.” Ka chingiyal’ nem me ying fare Kan Nthothup ngog. Mu gguy tagil’ be’ u rom u tharmiy ni bay be’ nike par ngay. Ma be gal ram’en owchen ni bod e malang ni jasper nge karnelian; ma bay ba ragim nike liyeg tagil’ fa’anem ni bod ra’en ba malang ni emerald. Ma bay rliw’ nge aningeg i tagil’iy nib liyeg tagil’ fa’anem, nike par rliw’ nge aningeg e pi’in pi’ilal nga daken ni kron’ed e mad nib wechwech, ma kar te’eliyawgad ko te’eliyaw ni gol. Me mat e uluch u tagil’ Got, ma be yan lamay, ma be chub e dirra’ riy. Ma bay medlip i mol’ ni kan tay e nifiy ngay ni be yik’ u m’on u tagil’ Got; ni ireram fa medlip i kan rok Got. Mu m’on u tagil’ Got e bay bangi ban’en riy ni bod bangi day ni gowa ni ngongliy ko thirek, nib machalbog ra’en nra yan e changar u fithik’ ni bod e krystal.
Bay aningeg i ban’en ni yad ba fos ni kayigi fach lan owcherad u m’on rorad ngu keru’rad ni kar liyeged tagil’ Got. Bin som’on e pin’em ni yad ba fos e bod ya’an ba layon; ma bin migid e bod ya’an ba garbaw; ma bin dalip e bay owchen ni gowa owchen be’; ma bin aningeg e bod ya’an ba arche’ ni eagle ni be changeg. Ra bagayad fa aningeg i n’em ni yad ba fos ma nel’ pon, ma kayigi fach lan owcherad u lan porad ngu wuru’ i porad. Darir talgad ko tang ni rran nge neap’ ni be lungurad:
“Ba thothup, ba thothup, ba thothup Somol ni Got ni Gubin ma Rayag Rok,
ni ir e immoy, me ir e bay, me ir e bay yib.”
Ma gubin yay nra tang fa aningeg i n’em ni yad ba fos ni yad be pining e sorok ngak ma yad be tayfan, ma yad be pining e magaer ngak fa’anem nike par nga tagil’, ni ir e bay i par nib fos ndariy n’umngin nap’an, 10 me paraw fa rliw’ nge aningeg i pi’ilal nga but’ u p’eowchen fa’anem nike par nga tagil’, ngar siro’gad ngak ni ir e bay i par nib fos ndariy n’umngin nap’an. Ma yad be tay e te’eliyaw rorad nga but’ u m’on u tagil’ fa’anem, ma be lungurad:
11 “Somol romad ma Got romad! Bay rogom
ni nganog e sorok ngom, min tayfam, ma bay rogom ni nge mil suwon urngin ban’en ngom.
Ya gur e mu sunumiy urngin ban’en,
ma gur e mu leamnag miyad sum ni yad bfos.”