13
Mael ni yan ngak e pi Filistine
1 Ka ba pagel Saul me mang pilung nu Israel, me gagiyegnag yu Israel ni l’agruw e duw.
2 me mel’eg 3,000 e pumo’on nu Israel, me tay 2,000 rok u Mikmash ngu bang i n’en ni go’ burey u lan yu Bethel, me pi 1,000 nge un ngak Jonathan nib pagel ni fak nga Gibeah, u lan e nug ko ganong rok Benjamin. Tin ni magach e pumo’on e l’ograd Saul ngar sulod nga tabnaw.
3 Me li’ Jonathan pilungen e salthaw rok e pi Filistine u lan yu Geba, me rung’ag e pi Filistine murung’agen. Me pi’ Saul e pi mol’og ni ngan thoy e yabul u lan e re nam nem ni ga’ngin, ni aram e yi be pining e pi Hebrew ni ngan mael.
4 Me rung’ag piyu Israel ni yad gubin nike li’ Saul pilungen e salthaw rok e pi Filistine, ma aram fan ni kari dabuy e pi Filistine daken piyu Israel. Me mu’ulung piyu Israel ngak Saul u Gilgal.
5 Me mu’ulung e pi Filistine ni ngar chamgad ngak piyu Israel; ma 30,000 e chariot ni fan ko mael ni bay rorad, ma 6,000 girdi’en e yan u os, nge salthaw ni pire’ ni bod urngin e yan’ ni bay u dap’el’ay. Miyad yan nga Mikmash ni bay ko ngek u Bethaven, mranod ra pired ngaram.
6 Piyu Israel e ncham ngorad nib elmerin, ngar pired ni kar magawon gad. Boch i yad e ur mithgad u lan e pi yiy nge low, ngu fon e war i yan, ngu thilthilin e yungi war ngu lan e pi luwed;
7 ma boch i yad e ra th’abed e lul’ ni Jordan ngranod ngalan e nug nu Gad ngu Gilead.
Ma kabay Saul u Gilgal, ma girdi’ ni yad bay rok e yad be t’on ko marus.
8 Ma medlip e rran ni sonnag Saul Samuel, ni bod rogon ni yog Samuel, machane de yib Samuel nga Gilgal. Me tabab e girdi’ ko yan ni aram e yad be pag Saul,
9 me ga’ar Saul ngorad, “Mfeked fapi gamanman i yib ngog nggu urfiy nggu pi’ ni maligach, nge pi maligach ni yima pi’ ni nge gapas thilin Got nge girdi’.” Me urfiy fapi gamanman nge pi’ ni maligach,
10 ma nap’an ni ka fini mu’, me taw Samuel. Me yan Saul nga wean ni nge mada’nag,
11 Me ga’ar Samuel, “Mang e kam rin’?”
Me fulweg Saul ni ga’ar, “Kug guy e girdi’ ni yad be yan ni aram e kar paged gag, ma dawor mub ni bod ni mog ni ga ra rin’, ma ke mu’ulung e pi Filistine nga Mikmash.
12 Mu gu leamnag ni pi Filistine e ngar chamgad ngog u roy u Gilgal, ma dawor gguy rogon ni nggu fel’ u wan’ SOMOL. Mu gu leamnag nthingar gu pi’ e gamanman ni maligach.”
13 Me fulweg Samuel ni ga’ar, “Ri gab balyang ko binir e pa’ ni kam rin’. Da mfol ko tin keyog SOMOL ni Got rom ngom ni ngam rin’. Fa’an mang e mfol, ma ke tem nge pi’in owchem ngu’um gagiyeg niged piyu Israel ndariy n’umngin nap’an.
14 Ma chiney e aram e bayi tal e gagiyeg ni ga be tay. I SOMOL e bay fek be’ ni ba’adag nge tay ni ir e nge mang pilung rok e girdi’ rok, ni bochan e dakum fol rok SOMOL.”
15 Me chuw Samuel u Gilgal nge yan. Me un e tin ke magey e girdi’ ngak Saul, ni aram e nge yan ni nge yan i chag ngak e pi salthaw rok. Miyad yan u Gilgal nga Gibeah ni bay u lan e nug rok Benjamin. Me yan Saul i guy e pi salthaw rok, ni gonap’an e 600 e pumo’on.
16 Me par Saul nge Jonathan ni fak nge salthaw rorow u lan yu Geba, ni bay u lan e nug rok Benjamin; ma pi Filistine e karbad ra pired nga Mikmash.
17 Pi salthaw nu Filistia e ra chuwgad ko gin yad be par riy ngranod ko mael ni yad dalip ulung: reb e ulung e sor nga Ofra, ni bay u lan e nug nu Shual,
18 ma reb e ulung e sor nga Beth Horon, ma reb e ulung e sor ko fare mathil ni bay nga talang ni yira par riy min guy daken fachi loway nu Zeboim miyad yan riy i yan nga ted.
19 Ma dariy be’ u Israel ni be pirdi’iy e wasey nge yib ban’en riy, ya ke duwgiliy e pi Filistine ni nge dabi ngongliy piyu Israel e saydon nge sarey.
20 Ere piyu Israel e thingar ranod ngak piyu Filistia ngar uthumed talin e maruwel rorad nma girengiy e garbaw nge gi’ e but’, nge kuwa, nge tow, nge kama.
21 Ma puluwon ni yad ma pi’ e ta’reb e salpiy nib achig ni wasey, ni puluwon e tow ni ngan uthum nge fare n’en nma fek e girdi’ ni be yannag e garbaw, ma l’agruw e pi salpiy nem ni wasey e yima pi’ nga puluwon e n’en ni yima gi’ e but’ ngay ara kuwa ni ngan uthum.
22 Aram fan ni rofen ni ba’aram nni mael e dariy reb e salthaw nu Israel ni bay e saydon rok ara sarey, ma kemus ni Saul nge Jonathan e bay rorow.
23 Pi Filistine e ra l’oged baraba’ i salthaw ni ngar matanagiyed e kanawo’ u Mikmash.