18
1 Tomuren nike mu’ Saul nge David ko welthin, ma ri adag Jonathan ni fak Saul daken David nge yan i par ni kari t’uf rok ni bod rogon feni t’uf rok ir.
2 Rofen nem i yan nga m’on e tel Saul i David nge par rok ndaki pag nge sul nga tabinaw rok.
3 Me m’ag Jonathan e fager ngak David ni ngar pirew ndariy e rofen ni nge kireb thilrow, ni bochan e rib t’uf David rok.
4 I luf wuru’ e mad rok nge pi’ ngak David, nike chagiy ngay madan e mael rok, nge saydon rok, nge gat’ing rok, nge le’ed rok.
5 Ma gubin yang ni l’oeg Saul i David nge yan ngay ma bfel’ e tin ni rin’ David, ma aram me tay Saul David ni ir reb e tolang ko salthaw rok. Me ri fel’ David u wan’ e pi salthaw rok Saul ngu wan’ urngin e pi tolang ko salthaw rok Saul.
Saul ni awan’ ngak David
6 Nap’an ni be sul e pi salthaw i yib nga tabinaw rorad, ni aram e ke li’ David Goliath, me yib e ppin u gubin e binaw nu Israel ni ngar mada’ niged Saul. Ma yad be yin’ tangin e felfelan’, ma yad be churu’, ma yad be chubeg tatelin e musik ni tambourine nge lyre.
7 Me tang e pi’in ni ppin u fithik’ e felfelan’ ni be lungurad, “I Saul e thang e fan rok yu biyu’, machane David e thang e fan rok yu rangag e biyu’.”
8 Me dabuy Saul e ren’em, me par ni kari damumuw. Me ga’ar, “Yad be yog ni David e ke li’ yu ragag i biyu’, mi gag e kemus ni yu biyu’. Ere n’en ni kabay ni nge rin’ David e nge mang pilung.”
9 Me par ni kari awan’ ngak David e rofen nem i yan nga m’on.
10 Ma reb e rran riy me gagiyegnag Got ba kan nib kireb nge yib i ying ngak Saul, ngi i tolul u lan e naun rok ni bod be’ nike aliliy. Me chubeg David tatelin e musik rok ni harp, ni bod nma rin’ ni gubin e rran, ma bay ba sarey u pa’ Saul.
11 Me ga’ar Saul u wan’, “Nggu richibiy ko rungrung,” me pag fare sarey ngak ni l’agruw yay; me pilo’ David riy.
12 Me rus Saul ngak David, ya bay SOMOL rok David ma ke chuw rok Saul.
13 Me l’oeg Saul David nge yan me tay ni ir pilungen reb e biyu’ e salthaw. Me fek David e salthaw rok ngranod ko mael,
14 ma urngin e tin i ngongliy ma bfel’, ya bay SOMOL rok.
15 Fa’ani guy Saul rogon e mon’og ni be tay David ma fini aram e i gel e marus rok ngak.
16 Machane gubin e girdi’ nu Israel ngu Judah nib t’uf David rorad, ya bfel’ rogon ni be tay murung’agen e ba’ rok e salthaw.
David nra mabgolgow be’ ni ppin ni fak Saul
17 Me ga’ar Saul ngak David, “Ba’aray Merab ni bin ilal e ppin ni fakag. Fa’anra mpar ni gur ba salthaw ni gab falu’ ma gab yul’yul’, ma ga be un ko pi mael rok SOMOL, ma gu ra pi’ ngom ngam leay.” (Ya be leamnag Saul ni aram kanawo’en me li’ e pi Filistine David, me par ni gathi ir e nge rin’.)
18 Me ga’ar David, “I gag mini’, ma mang e birog e tabinaw ni nggu wechma’ ngak e en ni pilung?”
19 Machane fa’ani taw nga nap’an ni nga ni pi’ Merab ngak David, mi ni pi’ ngak be’ ni Adriel fithingan, ni be’ u Meholah.
20 Machane ri ba’adag Mikal David, ni be’ ni ppin ni fak Saul, ma fa’ani rung’ag Saul me ri felan’ ngay.
21 Me ga’ar u wan’, “Nggu pi’ Mikal ngak David; ya nge bannag nge yib e pi Filistine i li’ ngem’.” Irera’ e yay ni gaman e l’agruw yay ngay ni ga’ar Saul ngak David, “Bay mu le’engiy fakag.”
22 Me yog Saul ngak e pi tolang ni yad bay u tan pa’ ni nge lungurad ngak David, “En ni pilung e ri gab fel’ u wan’ ma urngin e pi tolang ni bay u tan pa’ ni gabfel’ u wun’rad; ere ngiyal’ney e rib fel’ ni ngam leay fachi pin ni fak.”
23 Miyad yog e re bugithin ney ngak David, me ga’ar, “Ra wechma’ be’ ngak e en ni pilung ma gathi ban’en nib mom, ma bug nir e thin e kayigi gel e thil riy ngak be’ nib gafgow, ma dariy rogon ni bod gag.”
24 Me weliy e pi tolang nem ngak Saul e tin keyog David,
25 me yog Saul ngorad ni nge lungurad ngak David, “N’en ni be finey e en ni pilung ni ngam pi’ ngak ni puluwon e chi pin ni fak nem ni ngam leay e ra’ay yang i biyach u dal’ ra’ay i Filistine ni kam li’rad, ni aram e ke fulweg ngak e pi to’ogor rok taban e kireb ni kar ngongliyed ngak.” (Aray rogon kanawo’en ni leamnag Saul ni nge li’ e pi Filistine David.)
26 Me yan e pi tolang ni bay u tan pa’ Saul ngar weliyed ngak David e tin keyog Saul, me felan’ David ko re bugithin nem nrayag ni nge leay fachi pin ni fak e en ni pilung ko binem e kanawo’. Reb e rran nga m’on ko rofen ni ba’aram ni kan duwgiliy ni ngar mabgolgow,
27 me yan David nge salthaw rok ngar li’ed 200 e Filistine. Me fek e biyach u dal’rad i yan ngak e en ni pilung me yan i the’eg nga p’eowchen, ni fan e nge mang ir e leay fachi pin ni fak. Ma aram me pi’ Saul fachi pin ni fak ngak David ni nge leay.
28 Me ri nang Saul ni bay SOMOL rok David, ma fachi pin ni fak ni aram Mikal e rib t’uf David rok.
29 Me ri gel e marus rok Saul ngak David, mi i par David ni to’ogor rok u n’umngin nap’an e yafos rok.
30 Ma urngin yay nra yib e pi salthaw ko pi Filistine ngar chamgad ngak piyu Israel, mi David e th’abi falu’ u fithik’ urngin e pi tolang ko salthaw rok Saul, ma aram me yan i par ni kari gilbuguwan.