22
Fapi Prist nni thang e fan rorad
1 Me mil David u lan fare binaw nu Gath nge yan nga ba yiy nib chugur ko fachi binaw nu Adullam. Nap’an ni rung’ag e pi pumo’on ni walagen nge tin kabay ni chon e tabnaw rok ni bay u rom, miyad yan ngak ngaram.
2 Girdi’ ni yibe gafgow nagrad, nge pi’in ni kar awgad nga fithik’ e malfith, nge pi’in dar fel’ u wan’rad e n’en ni yibe rin’, e ranod ngak David, gonap’an aningeg mir’ay e girdi’ u gubin, ni mang ga’ rorad.
3 Me yan David u rom nga Mizpah u lan yu Moab me ga’ar ngak fare pilung nu Moab, “Wening ngom mu pag e chitamag nge chitinag ngarbow ra pirew ngom nge taw ko ngiyal’ ni kug pir’eg e n’en ni nge rin’ Got ni fan ngog.”
4 Ma aram me tay David e gal labthir rok u rom rok e pilung nu Moab, mar pirew u rom nn’umngin nap’an ni be mith David u lan fare yiy.
5 Ma aram me yib Gad ni profet ngak David me ga’ar, “Dab mu par u roy; mman ni kachine’ ko fare nam nu Judah.” Ma aram me chuw David nge yan ko fare loway nu Hereth.
6 Me reb e rran ni bay Saul u lan yu Gibeah, nike par nga tan bake gek’iy ni tamarisk u daken e ted, ni bay e sarey rok u pa’, ma gubin e pi tolang ko salthaw rok ni kar sak’iygad ni yad ba liyeg. Minog ngak ni David nge pi’in yad be un ngak e kan pir’eg e gin yad bay riy,
7 me ga’ar ngak e pi tolang ko salthaw rok, “Mmotoyilgad, gimed e pi pumo’on ko Benjamin! Gimed be leamnag nra pi’ David e yungi flang nge yungi milay’ ni grape ngomed ni gimed gubin, ara taymed ni gimed e tolang ko salthaw rok?
8 Ireyer fan ni gimed be makath nib togopluw ngog? Dariy ta’ab gimed nike yog ngog nre mo’on ni fakag ney e ke fal’eg ba tha’ u thilrow David. Dariy be’ ni be leam nigeg fa yog ngog ni David ni reb i girdi’en e salthaw rog, e be tay thapag e chiney ni nge li’eg nggum’, ma be’ ni pumo’on ni fakag e be pi’ e athamgil nga laniyan’!”
9 Me Doeg e ba sak’iy u rom ni yad fapi tolang ko salthaw rok Saul, me ga’ar Doeg, “Gguy David nnap’an e yan ngak Ahimelek ni be’ ni pumo’on ni fak Ahitub nu Nob.
10 Me Ahimelek e fith ngak SOMOL ko mang e thangri rin’ David, ma aram me pi’ boch e ggan ngak David nge fare gi saydon rok Goliath ni be’ nu Filistia.”
11 Ma aram me mol’og Saul ni Pilung nge yan ngak Ahimelek ni prist nge gubin girdi’en, ni ku yad boch e prist u Nob, ma aram marbad rugyed.
12 Me ga’ar Saul ngak Ahimelek, “Ahimelek, mmotoyil!”
Me fulweg ni ga’ar, “Pilung, gub ara’ ni nggu rin’ e tin ngamog!”
13 Me fith Saul ngak ni ga’ar, “Mangfan ni gur nge David e gimew be makath nigeg? Mang ni kam pi’ boch e ggan nge bang i saydon ngak, ma kam fith laniyan’ Got ni fan ngak? Chiney e ke cheal ke togopluw ngog ma be tay thapag ni nge li’eg nggum’!”
14 Me fulweg Ahimelek ni ga’ar, “I David u fithik’ e tolang ko salthaw rom e th’abi yul’yul’! Ma figirngin fakam, ma ir e ga’ rok e pi matnag rom, ma gubin e girdi’ nma tayfan u lan tafen e pilung.
15 Errogon, gu fith laniyan’ Got ni fan ngak, ni gathi ireram e som’on. Ma makath nib tagopluw ngom, i gur Pilung e thingar dab mu tay e bug nir e thin nga dakenag fa be’ u lan e tabnaw rog. Ya dariy ban’en riy ni gumnang!”
16 Me ga’ar fare pilung, “Ahimelek, i gur nge gubin pi girdi’em e thingar mm’ad.”
17 Ma aram me ga’ar ngak fapi matnag rok ni yad be sak’iy u charen, “Mu thanged e fan rok e pi prist nir rok SOMOL! Kar puruy’gad ngak David mdarogned ngog nike mil, ni yug aram rogon ni yad manang ni kab kafram i yib.” Machane fapi matnag rok e dariy bagyad ni mithmith ni nge li’ fapi prist rok SOMOL.
18 Ma aram me ga’ar Saul ngak Doeg, “Mu thang e fan rorad!” — me thang Doeg e fan rorad ni yad gubin. Rofen nem e thang e fan rok meruk i ragag nge lal e prist ni kar tayon’ed e mad ni efod.
19 Miki yog Saul ni ngan thang e fan rok urngin e tin kabay e girdi’ nu Nob, ni fare binaw rok e prist: nni thang e fan rok e pi pumo’on, ppin, bitir nge tin kab ran e bitir, garbaw, dongki, nge saf.
20 Machane Abiathar, ni reb e pumo’on ni fak Ahimelek, e thay nge mil, nge yan ngak David.
21 Me weliy ngak rogon nike thang Saul e fan rok fapi prist rok SOMOL.
22 Me ga’ar David ngak, “Nap’an nug guy Doeg u rom e rornem, mar gunang nra yog ngak Saul. Ere gag tapgin e yam’ nike tay urngin pi girdi’em.
23 Mu par rog ma dab murus. Ba’adag Saul ni nge thang e fan rodow ni gadow l’agruw, machane ga ra par rog ma dariy ban’en nra buch rom.”