20
Sheba ni togopluw
Ma yigi buch ni immoy be’ u Gilgal nde fel’ ngonglen ni Sheba fithingan ni be’ nib pumo’on ni fak Bikri, ni yib ko fare ganong rok Benjamin. Me thoy Sheba e yabul me tolul ni ga’ar, “Ngan dariyfannag David! Dab da leked! Pi pumo’on nu Israel, mmarod ngad sulod nga tafedad!” Ma aram me digey piyu Israel i David ngar uned ngak Sheba, machane pi pumo’on nu Judah e ra pired ni yad ba yul’yul’ ni ur leked David ni ka Jordan nge mada’ nga Jerusalem.
Nap’an ni taw David nga tafen ni fare naun ko pilung nu lan yu Jerusalem, me fek fa ragag i ppin rok ni digeyrad u rom ni ngu’ur ayuweged e re naun ko pilung nem, nge tay e matnag rorad. Me pi’ e tin nib t’uf ni nge yog ngorad, machane de molegrad. Min tayrad ni yi be matnagiyrad nnap’an e yafos rorad, ma yad be par ni bod e ppin nike yim’ figirngirad.
Me ga’ar fare pilung ngak Amasa, “Mu pining e pi pumo’on nu Judah nga ta’bang ma nge langleth ma kam tawgad e ngaray.” Me yan Amasa ni nge piningrad, machane de sul ko fa ngiyal’ nike yog fare pilung ngak ni nge sul riy. Ma aram me ga’ar fare pilung ngak Abishai, “I Sheba e ra pi’ boch e magawon ngodad nib gel boch ko tin nike pi’ Absalom. Mu fek e salthaw rog ngam leked i yan, ya fa’anra danga’ mra yan i par ngalan boch e binaw ni kan yororiy nib tolang ni fan ko mael me thay u pa’dad.” Ma aram me yan e tirok Joab e salthaw, ni fapi tamatnag rok e en pilung, nge gubin e tin kabay e salthaw e ra chuwgad u Jerusalem ngar uned ngak Abishai ni ngar leked Sheba. Nap’an nra tawgad ko fare war nib ga’ u Gibeon, me mada’ nagrad Amasa. Ma ke chuw Joab nga madan e mael rok, ni bay e saydon rok u lan tafen ni kan m’ag ko leed rok. Ma nap’an ni yib i yib nga m’on, me thay fare gi saydon nga but’. Me ga’ar Joab ngak Amasa, “Fager rog, ke uw rogom boch?” Me yan Joab i kol roben Amasa ko ba’an mat’aw i pa’ ni bod ni nge faray owchen. 10 Ma der nang Amasa ni be kol Joab e saydon nga ba’an gilay’ i pa’, me rugoy Joab e saydon ko yal rok Amasa, me po’ gothogothon nga daken e but’. Me yim’ ni ka ngiyal’ i n’em ma dakuriy fan ni ngki rugoy Joab bayay e saydon ngak.
Me’ere yan Joab nge fare mo’on ni walagen ni Abishai ni yow be lek Sheba. 11 Me sak’iy reb e pi salthaw rok Joab nga to’oben fare ldow rok Amasa me tolul ni ga’ar, “Gubin e girdi’ nib fol ngak Joab nge David e ngar leked Joab!” 12 Ma fare ldow rok Amasa, nike ing e racha’, e kaba’ u lukngun e kanawo’. Me guy fare salthaw rok Joab ni bay yib e girdi’ mi nib ntal ngay, ma aram me girengiy fare ldow u kanawo’ ngalan e flang nge upnguy nga bang i blanket. 13 Ma nap’an ni chuweg fare ldow u lane kanawo’, ma gubin e girdi’ ni lek Joab ni ngan lol’oeg Sheba.
14 Me yan Sheba u lan tafen fapi ganong nu Israel ni gubin me yib ngab binaw ni Abel Beth Maacah fithingan, ma gubin chongin fare ke girdi’ rok Bikri nra mu’ulung gad ngar leked i yan ngalan fare binaw. 15 Me rung’ag e salthaw rok Joab ni bay Sheba u rom, ma aram mranod ra m’aged e mael ko fare binaw. Mar gaded e but’ ko ba’an wuru’ e yoror, mar tababgad i ker tanggin fare yoror ni nge thig nga but’. 16 Ma immoy be’ ni bpin nib gonap u lan fare binaw ni tolul u lan fare yoror, ni be ga’ar, “Mmotoyilgad! Mmotoyilgad! Mogned ngak Joab nge yib ngaray; ya gub adag ni nggu non ngak.” 17 Me yan Joab, me fith fare pin ngak ni ga’ar, “I gur Joab?”
Me fulweg ni ga’ar, “Errogon, i gag.”
Me ga’ar fare pin, “Siro’, mmotoyil ngog.”
Me fulweg Joab, ni ga’ar, “Gu be motoyil.”
18 Me ga’ar fare pin, “Kakrom e yima ga’ar, ‘Mman ngam nang e fulweg ko de’er rom u lan fare binaw nu Abel” — ma ri aramrogon niy marin’. 19 Re binaw romad ney e rib manigil, reb e tin nth’abi gapas mab yul’yul’ u lan yu Israel. Ere mangfan ni ga beguy rogon ni ngam gathay? Mog, gab adag ni ngam kirebnag ban’en nib milfan ngak SOMOL?”
20 Me fulweg Joab, ni ga’ar, “Dariy bi’id! Ri dariy bi’id nugra kirebnag fa gu gathogthay e binaw romed! 21 Gathi ireram e n’en ni kug puruy’ niged. Be’ nib pumo’on ni Sheba fithingan ni fak Bikri, ni be’ nu daken e ted nu Efraim ni go’ burey, e ke tababnag e togopluw ngak David ni Pilung. Ta’are pumo’on ney e ngam pi’, mug chuweg e salthaw rog ko re binaw ney.”
Me ga’ar fare pin, “Bay gon’ed lolugen u daken e yoror nge yib ngom.” 22 Ma aram me yan fare pin ko girdi’ ko fare binaw nike turguy u wan’ e n’en ni ngan rin’, miyad th’ab lolugen Sheba ngar yin’ed u daken e yoror ngak Joab. Me thoy Joab e yabul ni pow ni nge chuw e salthaw rok ko fare binaw, mar sulod nga taferad. Me sul Joab nga Jerusalem ngak fare pilung.
Pi Tolang ko Salthaw rok David
23 I Joab e i gafaliy fare raba’ i salthaw nu Israel; me Benaiah nib mo’on ni fak Jehoyada e ir e tagafaliy e pi salthaw ni yad ma matnagiy David; 24 Me Adoniram e ir e ma gagiyegnag rogon e maruwel ko sib; me Jehoshaphat nib mo’on ni fak Ahilud e ba milfan babyoren urngin ban’en ngak; 25 Me Sheva e ir e tayol u kort; me Zadok nge Abiathar e yow e prist, 26 ma ku er rogon Ira ni be’ ko fa chi binaw nu Jair ni ku ir reb e prist rok David.