3
Rogon pangin girdi’en Kristus
Mpuguran ngak e girdi’ ni yad bay u wur ni ngar folgad rok e pi’in pilung nge pi’in yad be tay murung’agen e girdi’, miyad rin’ e tin yad be yog, miyad par ni ngar rin’ed urngin e tin ni bfel’. Mog ngorad ndab ra t’ared e thin nga daken be’, machane ngar pired ni bfel’ thilrad e girdi’ ma bfel’ owcherad nge thin rorad ngak e girdi’, ma gubin ngiyal’ ni ngar sumunguygad ngak urngin e girdi’. Ya ku errogon gadad ni ud moyed ba ngiyal’ ni ud balyanggad, ma da ud folgad, ma gadad ba oloboch. Ma ud moyed ni gadad e sib rok e ar’ar nge gubin mit e tin ni yi ba’adag nde mat’aw u mit Got. Ma ud pired ni gadad be leamnag e kireb ngak e girdi’ ma be awan’dad ngak boch e girdi’; ma be fanenikaydad boch e girdi’ ma gadad be fanenikayrad. Ma fa’ani m’ug e runguy nge t’ufeg rok Got ni ir e ma thapegdad ngak Got, me chuwegdad ko kireb nge thapegdad ngak Got. Ma gathi rin’ ni aram rogon ni gomanga bochan e ngongol ni bfel’ ni kad ngongliyed, machane bochan e be runguydad, ma aram me chuwegdad ko kireb nge thapegdad ngak Got u daken e maluk ni tay ngodad, nu daken e re maluk ney e ir e pi’ fare Kan Nthothup e bin nib be’ech e gargel nge bin nib be’ech e pangin riy ngodad. Ya Got e ke pi’ fare Kan Nthothup rok ngodad ke pag e fol riy, nike pi’ ngodad u daken Jesus Kristus ni ir e ma thapegdad ngak Got, nu daken e runguy rok ngodad e ke yag ni mat’aw nagdad riy ngak Got, ma ke yagnag ngodad e yafos ndariy n’umngin nap’an ni ir e be l’agan’dad ngay. Re thin ney e ba riyul’.
Gub adag ni ngar mu tamilangnag e girdi’ ko yu bugithin ney, ni fan e pi’in nib mich Got u wun’rad e ngar tiyan’rad ngar ngongliyed e ngongol ni bfel’. Ya tiney e bfel’ ma ba ga’ fan ngak e girdi’. Ma ngam tem u orel ko malu’ag thin ndariyfan, nge ngachal ni pire’ ni kan yoloy nga babyor ni ngachalen pi chitamangiy ni kakrom, nge tugthin, nge malu’ag thin ni murung’agen e Motochiyel. Ya dariyfan ma dariy gam’ingin. 10 Mu non ngak e en ni be ruw raba’nag e girdi’ ni dabi lich ko l’agruw yay, ma fa’anra dabi fol riy ma aram ma ga tem u orel rok. 11 Ya ga manang ni mit i girdi’ nem e ba kireb, ma denen ni be ngongliy e ir e be micheg ngak ni ir e ba kireb.
Tomuren e fonow ngak Titus
12 Ngiyal’ nra gu l’oeg Artemas ara Tykikus ngeb ngom e ngam athamgiliy nga mub ngog ko binaw nu Nikopolis, ya kug duwgiliy ni nggu par u rom u ngal’an e garbeb. 13 Mu guy rogon ngam ayuweg Zenas ni ir e sukulnag e motochiyel nge Apollos ngar milekaggow, ma gguy rogon nge yag urngin e tin nge yag ngorow. 14 Mu guy rogon e tirodad e girdi’ ngu’ur ngongliyed e maruwel ni bfel’, ya ngar yag niged e tin ndabisiy ni nge yag ngorad ban’en ma ku ra ayuweged boch e girdi’ ngay; ma dab ra pired ni yad be ngongliy e tin ndariyfan.
15 Urngin e girdi’ ni yad bay rog e be lungurad e nge felan’ Got ngom. Mu weliy ngak e pi tafager rodad ni pi’in ke mich Got u wun’rad ma yad be par nike pagan’rad ngak ni gamad be yog ni nge felan’ Got ngorad.
I Got e ngi i ayuwegmed ni gimed gubin.