1 NJON
Pini n꞉ii ngê ala pweepwee pee d꞉êê ngê, u pi Njon, Sepédi tp꞉oo, Yesu u dyépi ngmê. Dini ghi n꞉ii ngê pi vy꞉ee ngê doo ya, ala pweepwee u ngwo d꞉êê ngê, Yesu u yoo knî ye dy꞉ââ ngê.
Pi ngmê knî y꞉oo yi yéli kn꞉aa máádi p꞉uu dnye kapî dé, yipu, Doo u ntââ Chóó Lémi Tp꞉oo pi ngê daapî pyodo. Yipu, Chóó Lémi mupwo d꞉ud꞉umbiy꞉e mb꞉aamb꞉aa dê, dono yi p꞉uu daa t꞉a. Yipu, Dyámê u kópu dé dono dé, dyámê mbêmê tpémi mye dono dé. Yipu, Doo u ntââ Chóó Lémi Tp꞉oo pi ngê daapî pyodo. Yipu, Yesu pi ntee pini, dini ghi n꞉ii ngê Njon Baptist ngê mbápitisîm kwólu, yi ngwo Chóó Lémi Tp꞉oo Yesu p꞉uu kele, yipu, Yesu ghêlî daa vya ngópu, Chóó Lémi Tp꞉oo ngê mwiyé a kuwo ngê. K꞉omodanê kópu pi knî ye yidnyimo tpapê. Myenté k꞉omodanê kópu ye m꞉uu dnyimo tpapê, yipu, K꞉omo tpile Yesu u yoo adnyi dono, ó daadnyi dono, u kópu daa tóó.
Njon ngê yoo yi wátiwáti u l꞉êê dîy꞉o ala pweepwee pee u ngwo d꞉êê ngê.
1
Kêlî Pini p꞉uu kópu dyuu
1 Nmî Kêlî Pini p꞉uu nmye nmînê d꞉êê té, pini n꞉ii ghê njini u kn꞉ââ. Mwiyémwiyé dini ghi ngê yi pini doo a ya, nmî dye ghi ngê u kwo nmee a ng꞉aa, nmî chóó nmî ngwolo knî y꞉oo nmî módu, nmî kêê dmi p꞉uu my꞉oo yó.
2 Yi ghéni kn꞉ââ nmî Mî k꞉ii nipi dpîmo a ya, myenté chedê ngê daawa pyódu. Dini ghi n꞉ii ngê pi ngê pyodo, nmî módu. Yi kópu u l꞉êê dîy꞉o u pi ntênê nmye nmo tpapê ngê, dpîno k꞉omodanê té.
3 Pini n꞉ii nmî módu, kópuni u kwo nmo ny꞉ee too, nmye vyîlo yinmo tpapê too, mu kópu u dîy꞉o nmî nuw꞉o dmi ntee a tóó, nmyi nuw꞉o dmi yinté myedny꞉oo a ya. Nmî Mî mupwo Yesu Kédisu yi k꞉ii ngmidi ngê ntee nmo pyede, u yi nmo a kwo, Yi k꞉ii ngmidi ngê yinté myedmyinê a ya.
4 Nmye nmînê d꞉êê té, mu kópu u dîy꞉o w꞉aa pêdê pyw꞉ee yó, myenté myepono pyw꞉oo.
W꞉êênî paa
5 Ala kópu dyuu nmî Lémi u kwo nmo ny꞉ee too, nmye vyîlo yinmo tpapê too, Chóó Lémi kââdî ntee tpile ye tóó, mgîdî knî p꞉uu daangma a t꞉a.
6 Ala kópu anmî tpapê knomomê, Nmî Mî k꞉ii ngmidi ngê nmo pyede, ngmênê mgîdî vy꞉o anmî m꞉ii knomomê, ye anmî k꞉omodanê, daa nmî Mî u pono anmî vyápê.
7 Nmî Mî w꞉êênî ntee a tóó, w꞉êênî yinté anmî m꞉ii knomomê, ye u k꞉ii ngmidi ngê anmî ya, u yoo knî yi k꞉ii ngmidi ngê amyenmî ya, Tp꞉oo Yesu u wêê ngê nmî dono yilî yintómu dpî ghêê té.
8 Ala kópu anmî tpapê knomomê, Dono nmî mênê daa tóó, ye nmî chóó nmî nuw꞉o knî y꞉oo adnyi dódó nmo, nmî Mî u ndê kópu dyuu nmî mênê daadnyi ya.
9 Ngmênê nmî dono yilî yi yuu dmi nmî Mî ka anmo y꞉ee knomomê, daawa dóó nmo, kópu mb꞉aa nmo angmê d꞉uu, nmî dono yilî u kuwó wa kéé té, mêdaawa a ngî té, wa ghêê nmo, kamî ngê wa pyódu nmo.
10 N꞉ii ngê dpo, Dono d꞉oongmê d꞉uu ngê, yi pini ngê nmî Mî u kópu dyuu dpî vy꞉a, mu kópu u dîy꞉o nmî Mî ngê dpo, Pi yintómu a dono nyédi. Yi pini u mênê nmî Mî u kópu dyuu daa ya nyédi.