17
Yesu nmî l꞉êê dîy꞉o u ngwo doo ngêpê
1 Yesu ngê u danêmbum dini ghi n꞉ii ngê nmo a kêlî ngê, mbóó p꞉uu vyu wo, Chóó Lémi ka kwo, M꞉aa. Kwo, Kópuni u l꞉êê dîy꞉o dyámê mbêmê nê loo, yi kópu u dye ghi ala. Kwo, Yoo yi ngwolo dmi a pywálî ngi, ala kópu paa vyi y꞉e, Kî Chóó Lémi Tp꞉oo. Kwo, M̱i ndîî ngê u ngwo wa pyódu.
2 Kwo, Pi yintómu knî yi l꞉êê dîy꞉o nyinê dy꞉ââ noo, mu kópu u dîy꞉o yélini a ka nyinê kpo, nîmo, Yi nuw꞉o dmi kamî ngê p꞉aa pyódu, ghê kamî ye p꞉aa y꞉oo, ghéni n꞉ii chedê ngê daawa pyódu.
3 Kwo, N꞉ii ngê ala kópu dpî vyi, dpo, Chóó Lémi nmî yâpwo ndêndê, daamo a tóó, dpo, pini n꞉ii a ngmidi ngê, wu Yesu Kédisu, kwo, yi pini ngê ghê kamî dpo pyw꞉oo.
4 Kwo, M꞉aa. Kwo, Dpodoni a ka nyinê kê too, kînî chedê too, dyámê mbêmê m̱i ndîî ngê nî pyódu ngê.
5 Kwo, Dyámê pê ghêlî dêpwo a kwo, dini ghi n꞉ii ngê nipi nyipu a ya, a pi ndîî ngê ntee doo a ya, yintoo ngê mêdê pyódu ngi.
6 Yesu ngê kwo, M꞉aa, yélini mgîdî u yoo vy꞉o nyinê y꞉ee too, a ka nyinê kê too, yi yéli ye ntênê nê kêma nyoo. Kwo, Yi yéli ṉyoo vy꞉o yéli, a ka nyinê kê too, ṉgópu dyuu ka mb꞉aamb꞉aa ngê ng꞉aa mbê dniye.
7 Kwo, Yi lama ka tóó, A kópu yintómu daa a mo a kópu dé, ngmênê a ka nyinê kê too.
8 Kwo, Kópuni a ka nyinê vyi too, ye kînî vyi too, kî ny꞉ee tumo. Kwo, Ala kópu ndêndê ngê yi lama a tóó, Ṉga nê ndê wo, ala kópu ka mye kêlîmî mbê dniye, ṉ́yóó nyinê dy꞉ââ noo.
9 Yesu ngê kwo, M꞉aa, Yi kópu knî yi dîy꞉o ala yéli yi l꞉êê dîy꞉o ṉga nînê ngêpê. Kwo, Daa mgîdî u yoo knî yi l꞉êê dîy꞉o ṉga nînê ngêpê, ngmênê yélini a ka nyinê kpo yi l꞉êê dîy꞉o ṉga nînê ngêpê, mu kópu u dîy꞉o ṉ́yóó ṉyoo.
10 Kwo, Yélini a yoo, myenté ṉyoo, yélini ṉyoo, myenté a yoo. Kwo, Yi l꞉êê dîy꞉o pi knî y꞉oo a pi wa km꞉êê ngmê.
11 Kwo, Daa kêmakêma ṉga nînê lêpî, mgîdî u yoo vy꞉o a yoo nînê kuwokuwo. Kwo, M꞉aa. Kwo, Nyi mu ngmidi yâpwo ndêndê. Kwo, M̱i ngê nê loo, mb꞉aamb꞉aa ngê ye nê kêma nyoo, ye mb꞉aamb꞉aa ngê micha a vyuwo, a yoo vy꞉o kîngê pwii dmi, mu kópu u dîy꞉o ngmidi ngê ntee nye tóó mo, yinté ngmidi ngê pîdny꞉oo ya.
12 Kwo, Dini ghi n꞉ii ngê yi vy꞉o noo kwo, m̱i mbêmê mb꞉aamb꞉aa ngê ye noo vyuwo, yi l꞉âmo dêp꞉êngmê ngópu, ngmênê mu ngmidi l꞉âmo d꞉a ngee, pini n꞉ii ngê doo u ntââ dono u maa d꞉uuwodê kuwo. Kwo, Puku yedê kópuni a tóó, yi pini ngê yinê a ntiyentiye.
13 Kwo, Ala ngwo ṉga anînê lêpî, dyámê pê ghêlî d꞉oongê kuwo ngê, yi kópu knî u ngwo ṉga d꞉a vyi té, mu kópu u dîy꞉o w꞉aani a mênê a tóó, nyi yoo yi mênê d꞉ud꞉umbiy꞉e myepîchoo ya.
14 Kwo, Kópu dyuu n꞉ii a ka nyinê kpo, yi kópu dyuu ye kînî vyi too, mgîdî u yoo knî ye yi yéli u ngwo wa diya dmi. Kwo, Mgîdî u yoo knî yi nuw꞉o u mo, a nuw꞉o u mo. Kwo, Nyi yoo myenté, yi nuw꞉o u mo, mgîdî u yoo yi nuw꞉o u mo. Kwo, Yi kópu u l꞉êê dîy꞉o mgîdî u yoo knî ye nmî diya dniye.
15 Kwo, Ṉga dênînê tpapê, Nyi yoo dyámê mbêmê a ngî té, ngmênê Setan kwulo dpî dyé té.
16 Kwo, Ala kópu ṉga mud꞉a vyi, A nuw꞉o u mo, mgîdî u yoo yi nuw꞉o u mo, nyi yoo myenté, yi nuw꞉o u mo, mgîdî u yoo yi nuw꞉o u mo.
17 Kwo, M꞉aa. Kwo, Yélini yi l꞉êê dîy꞉o ṉga nînê ngêpê, ṉyoo mb꞉aa ngê a pyódu té. Kwo, Ṉgópu dyuu ndêndê yi mênê choo kwo. Kwo, Yi kópu u l꞉êê dîy꞉o daa yi chóó yi p꞉uu pîdny꞉oo dpodo, ngmênê m̱꞉uu dny꞉oo dpodo.
18 Kwo, Mgîdî u yoo vy꞉o ntee nyinê dy꞉ââ noo, nyi yoo mgîdî u yoo vy꞉o yinté myidî dy꞉ââ té.
19 Kwo, A chóóchóó ṉga d꞉a kê, mu kópu u dîy꞉o ṉye ntênê n꞉aa nyêmî, ṉye ntênê myedny꞉oo nyêmî.
20 Kwo, Daa ala yéli yi mo yi l꞉êê dîy꞉o ṉga nînê ngêpê, ngmênê ala yéli yi kópu dyuu mbêmê dîyo yélini a ka wa a kêlîmî mbê dmi, yi yéli yi l꞉êê dîy꞉o ṉga myenînê ngêpê.
21 Kwo, Yi nuw꞉o dmi ngmidi ngê dny꞉oo ya. Kwo, M꞉aa. Kwo, Ngmidi ngê ntee nye tóó mo, yi yéli yi k꞉ii yinté ngmidi ngê myepaa ya kmêle. Kwo, Ngmidi ngê pîdny꞉oo ya, mu kópu u dîy꞉o pi yoo ala kópu ka paa kêlîmî mbê dniye, Ṉ́yóó nyinê dy꞉ââ noo.
22 Kwo, A nuu ghi ntee ṉódo a tóó, ala yéli yi nuu ghi dmi yinté a nódo my꞉aa yó, mu kópu u dîy꞉o ngmidi ngê ntee nye tóó mo, yinté ngmidi ngê myedny꞉oo ya.
23 Kwo, Nyi nuw꞉o dê ntee a tóó mo, yi nuw꞉o dmi yinté myedê pyódu ngi, mu kópu u dîy꞉o d꞉ud꞉umbiy꞉e ngmidi ngê pîdny꞉oo ya, yoo yi lama u ngwo paa yaa we, awo, Chóó Lémi ngê nê yinê a dy꞉ââ ngê, nê ka ntee doo a vyuwo, nê u yoo knî ye yinté myekîyedê vyuwo.
24 Yesu ngê kwo, M꞉aa. Kwo, Ala yéli a ka nyinê kpo, kwéli n꞉aa lêpî, u ya a nga a kwo y꞉i myepêdê lee dniye, y꞉i ntee noo a lémilémi, yi lémilémi paan꞉aa m꞉uu y꞉e. Kwo, Dyámê pê ghêlî dêpwo a kwo, a nuu ghi ṉódo doo a ya, lémi ngê u ngwo nyinê pyódu noo.
25 Kwo, M꞉aa. Kwo, Kn꞉aadi te kópu ḻama daa tóó. Kwo, Mgîdî u yoo yi lama d꞉ii tóó, ngmênê a lama nye tóó, ala yéli yi lama ala kópu mye tóó, ṉ́yóó nyinê dy꞉ââ noo.
26 Kwo, Ntênê ye nê kêma nyoo, ṉgakêmê ye my꞉aa chámê ngê, ngmênê ye am꞉aa a tpapê, mu kópu u dîy꞉o ṉuu u pi ngê ntee noo a ya, ṉuu u yoo ngê yinté myepêdny꞉oo a ya, yi k꞉ii nmî nuw꞉o ngmidi ngê pêchoo ya.