1 KOLINITA
Faulo yana kiluma nagami me Kolinita 'waidie
'Eba kiavemageta
Tutuyanina Faulo i miamia Efeso, lubulubu de'e i kilumi me Kolinita tovetumaganavo faifaidi. 'Awalawa bwaikina Kulisi nageneye 'idi 'ailuga, yavalatayega 'awalawa Masidonia wata bolimanayega 'awalawa Akaia. Kolinita 'atamana bwaikina Akaia nageneye. 'Atamananina nageneye 'ifwaidi tomotoga Kuliki we'e 'ifwaidi me Diu. Tomotoganidi bei i miamianiga tove'ai'aiwabu, yadi kukua fuedi wata yadi 'aseta bwaikidi siwe kumaea 'waidie i 'odu'odu wata bunu 'ana nuanua sakoidi tulina tulina nuadi i 'ewadi.
Faulo yana lau'age-vuvua 'ana veluga 'waineye, kumanina nagami Vala 'Atumaina i lu'ageyeni me Kolinita 'waidie. Bei i veve malamala 'aitamogana wata weta'i 6. (Folova 18:1-17) Tutuya 'ifwaidi i 'a'avana Afolosa i nago 'waidie i lau'age. Mulieta Faulo i nogai me Kolinita tovetumaganavo valadi kebu 'atumaina, we'e taunidi lubulubu i kilumi i velutoli Faulo 'waineye nani 'ifwaidi faifaidi. Faulo lubulubu de'e nagami i kilumi i lumatanidi yadi sakona faifaidi wata yadi velutoli i tutulidi. Lubulubu de'e 'ana 'idi side bani'odi.
Vona-vekaiwa. 1:1-9
Ve'ikwayekwayega wata 'eto'idi'idi tovetumaganavo 'waidie i souyeni. 1:10-4:21
Fwayafwaya 'ana nuanua sakoidi tovetumaganavo nuadi i 'ewadi. 5:1-6:20
Nagi 'ana nuanua. 7:1-40
Kebu ta na luwanawana. Keliso 'aisena 'waineye ta na vetumagana. 8:1-11:1
Sauluva tulina tulina tovetumaganavo yadi tafalolo faifaina. 11:2-14:40
Keliso i tovoi-vaitugana wafayega wata tovetumagana i na tovoi-vaitugana. 15:1-58
Faulo yana nuanua, yana 'alanuai wata yana velu'ase'ase. 16:1-24
1
1-2 Emavo, yau Faulo iada Sosideni taiadi 'a vekaiwa 'waimie. Yaubada nuanuana bega a vetomata'aulele Iesu Keliso faifaina, we'e 'omi Yaubada yana 'Aila'a 'wa miamianiga 'atamana Kolinita 'waineye a kilukiluma 'waimie. Yaubada i venua'ivinemi 'omi yana tomotoga mogitana wata fai Iesu Keliso taiadi 'wa miave'itubama i 'ive'atumaimi bega yami sauluva tonovina mataneye. Kebu 'aisemiga, wata tomotoga matatabuna 'awalawa tulina tulina 'waidie, kumanidiavo ma yadi vetumagana i vevegole 'ada Toveimea Iesu Keliso 'waineye, taunina 'adi Toveimea wata 'ada Toveimea.
3 'A vevelu'ui faifaimi, nuanuama Yaubada Tamada wata 'ada Toveimea Iesu Keliso ma yadi nuakalikali i na vevesauluva 'atumaina 'waimie, wata nuanua bikana mia 'atumaina taiadi i na velevelemi.
'Aivaita bwaikina ta veluagai Keliso 'wainega
4 Tutuya matatabuna a vevekaiwa Yaubada 'waineye faifaimi, fai ma yana nuakalikali i vesauluva 'atumaina 'waimie Iesu Keliso 'wainega.
5 'Wa miave'itubamaga Keliso taiadi bega nani matatabuna 'eba 'aivaita bwaikina 'wa veluagai Yaubada 'wainega 'wa da vo i da 'ive'ai'aiwabumi. Yana 'aivaitanina 'wainega yami vona faifaina matatabuna 'adi nogaya 'eba nua'ewa wata yana nuanua 'wa 'asetadi mogitana.
6-7 Keliso Valana a lu'ivoneyeniga 'waimie nuamie i 'eno'eno nika taunimi 'wa tauyemi 'waineye, bega tutuyanina 'ada Toveimea Iesu Keliso yana souyagi 'wa lulukamaseni, Yaubada yana nuakalikali fuedi 'waimie i 'eno'enovi, kebu tamu nani 'wainega 'wa da ve'ale'usa 'anu'anunumi 'adi 'aivaita faifaidi.
8 Wata i na kikiavefa'alimi i na nagoga 'eba ve'a'ava 'waineye 'ada Toveimea Iesu Keliso yana vila-vaitugana 'ana 'aiata 'waineye kebu tamu yami sakonaga, yami sauluva matatabuna tonovina Yaubada mataneye.
9 Naninidi Yaubada 'wainega ta na veluagadi fai bani'odi i vona, mogitana i na 'idewadi. Yaubada kumanina i venua'ivinemi bega 'wa veiana Natuna 'ada Toveimea Iesu Keliso taiadi.
Tovetumaganavo i ve'idi'idi
10 Ekwavo, 'ada Toveimea Iesu Keliso veimea i veleku begaidi a vevelu'ase'asemi kebu 'wa na ve'ikwayekwayega, nuanuaku matatabumi yami vona 'adi nuanua 'aitamogana bega kebu 'wa na ve'idi'idiga. Wata nuanuaku yami nuanua 'aitamogana nani matatabuna 'waidie, yami venua'ivina i na vesala bega 'wa na luvetubama 'ami 'aila'a 'aitamogana.
11 Ekwavo, bani'odi a voneyediga fai Kiloi yadi vanuga 'ana tomia 'ifwaidi i maia 'waikuye i lu'ivona 'aise'avami 'wa veve'ikwayekwayega.
12 Yami awa'idi'idi side bani'odi. 'Ifwaimi 'wa vo, 'Ima Faulo yana tomotoga,”'ifwaimi 'wa vo, 'Ima Afolosa yana tomotoga,” we'e 'ifwaimi 'wa vo, 'Ima Fita yana tomotoga,” wata 'ifwaimi 'wa vo, 'Ima Keliso yana tomotoga.”
13 Bani'odi 'wa vevesauluvediga kebu i da lubwaineniga. Yami awa'idi'idi 'waidiega 'wa da vo Keliso 'wa da sivo'avo'ai. 'Wa da nuani yau Faulo i tutufwaseku 'ai lagalagana 'waineye a wafa faifaimi? 'Alo 'aku wagavayega 'wa bafitaiso bega 'omi yaku tovetutuyamavo? A nuani kebu.
14 A vekaiwa Yaubada 'waineye kebu fuemi a da bafitaisomi, Kilisifasi wata Gaiasa 'aisedi a bafitaisodi.
15 Begaidi kebu tamu aitoi 'waimiega 'ana fata i na vo, Yau Faulo i bafitaisoku, yau yana tovetutuyama mogitana.”
16 Wata tamu a nuani, Sitefana yana vanuga 'ana tomia taiadi a bafitaisodi we'e a nuani kebu tamu aitoi a da bafitaisoi.
17 Keliso kebu i da vetuneku bafitaiso faifaina, we'e mogitana Valana 'Atumaina a na lalau'ageyeni. Yaku lau'age kebu to'aseta yadi veifufu 'eba nua'ewa 'ana nogaya bani'odiga, we'e mogitana Keliso yana wafa valana 'ai lagalagana 'waineye, a lu'ivoneyenimo. Kebu nuanuaku valanina yana toketokena i na venani-'avo'avovo yaku veifufu 'wainega.
Yaubada yana nuamageta wata yana toketokena Keliso i sivemagesedi
18 Keliso yana wafa valana 'ai lagalagana 'waineye, tomotoganidi wafaotoga 'ana 'edeamo i nunagoiga, 'ana nogaya 'waidie 'wava'wavadi yadi vona. We'e 'ida 'ita'ita'i ta veveluagai, ta 'asetai de'e Yaubada yana 'eda'eda toketokena 'ada 'ita'ita'i faifaina.
19 Tofali'wava'wavanidi yadi 'aseta faifaina tamu vona i 'eno'eno Yaubada yana Buki nageneye, Yaubada i vo,
To'aseta yadi 'aseta a na 'ivesakoidi,
tomotoganidi nuadi magemagetadi yadi nuanua a na 'ivetabodadi.”
20 Begaidi to'aseta, tomotoganidi nuadi magemagetadi wata tomotoganidi tutuya de'e ma yadi 'aseta i veve'ikwayekwayega, yadi 'asetanidi ava'aibe bei i nago? Mogitana, tomia fwayafwaya yadi 'aseta Yaubada i sivilai bega bani'odi 'wava'wavadi yadi 'aseta.
21 Yaubada ma yana nuamageta yana nuanua i 'idewai bega tomotoga kebu 'adi fata taunidi yadi 'aseta 'wainega Yaubada i na veluagai. We'e mogitana Yaubada i nuani nuanuana egavo i na vetumagana Keliso Valana 'waineye i na 'ita'ita'iedi. Valananina faifaina 'a lalau'age we'e tomia fwayafwaya fuedi yadi nuanua igodina 'wava'wavadi yadi veifufu.
22 Tofali'wava'wavanidi me Diu, nuanuadi 'eba nuavogana wata 'eba nua'ewa i na 'isedina mulieta i na ve'awamogitana. We'e me Kuliki i fali'wava'wavaga nuanuadi vona ma 'adi 'aseta wata 'eba nua'ewa i na nogaidi mulieta i na ve'awamogitana.
23 We'e 'ima 'a lalau'age Keliso i wafaga 'ai lagalagana 'waineye tomotoga 'ada 'ita'ita'i faifaina, siwe me Diu i nogai i nuani wafanina 'ana 'isa sakoina nika i bunumayaga i baila. Mali tomotoga i nogai i vo, 'A baila, 'ana nogaya 'waimeye 'wava'wavadi yadi veifufu.”
24 We'e tomotoganida Yaubada i venua'ivinedaga bega 'ita'ita'i ta na veluagai, me Diu wata mali tomotoga taiadi, 'waideye Keliso taunina Yaubada yana toketokena wata Yaubada yana nuamageta.
25 Tomotoga igodi tonuamageta i vo, Yaubada Natuna i 'aniveleneni wafa 'waineye 'ana 'isa i ve'wava'wava,” siwe Yaubada yana nuanuananina tomotoga yadi nuamageta i vebwaika-'iawedi. Wata tomotoganidi i vo, Yaubada mweana, Natuna i wafa 'ai lagalagana 'waineye,” siwe Yaubada yana mweananina toketokeotogina, kebu bani'odi tomotoga yadi toketokena.
Kebu tamu aitoi 'ana fata taunina i na awa'ai'aia Yaubada mataneye
26 Ekwavo, 'wa na nuani tutuyanina Yaubada i venua'ivinemi 'wa vetumagana Keliso 'waineye, tomotoga matadie to'aseta kebu fuemiga, tovetoketoke kebu fuemiga, wata tove'ai'aiwabu kebu fuemiga.
27 We'e naninidi tomia fwayafwaya matadie 'wava'wavadi, siwe Yaubada i venua'ivinedi 'wainega tonuamageta i na 'ivebunumayagidi. Wata bani'odi naninidi mweadi tomia fwayafwaya matadie, Yaubada i venua'ivinedi bega tomotoga toketokedi i na 'ivebunumayagidi.
28 Naninidi nani-'avo'avovo tomotoga i awaobuobuyediga, wata naninidi bola kebu i da souyediga, Yaubada i venua'ivinedi bega naninidi tomotoga matadie bwaikidi i na luvela'ovidi.
29 Nani de'e Yaubada i 'idewaiga bega kebu tamu aitoi 'ana fata taunina i na awa'ai'aia mataneye.
30 We'e 'omi Yaubada i miemi Keliso 'waineye taiadi 'wa miave'itubama, Keliso 'asa'aiana yada nuamageta. Wata Keliso yana wafa 'wainega yami sauluva i tonova Yaubada mataneye bega 'omi yana tomotoga magemagetami, wata Keliso 'wainega Yaubada i tuveobumi sakona 'wainega.
31 Fai naninidi 'atumaidi Yaubada i 'idewadi Keliso 'wainega begaidi ava'ai i voneyeniga Yaubada yana Buki nageneye ta na 'idewai i vo,
'Ai'edi aitoi i na vo, A na subia,’
i lubwaineni 'Auvea 'aisena i na subiai,
kebu taunina i na awa'ai'aia.”