15
Mosese wata me Isileli yadi lei-subisubia
1 Mosese wata me Isileli 'Auvea yana toketokena i 'iseni bega i lei-subisubia 'Auvea 'waineye i vo,
'A na lei 'Auvea 'waineye fai 'ana gaviavo i vetoketoke-'iawedi,
Felo yana osi wata salioti 'adi tododogavo taiadi i tutuvemonudi eyage.
2 'Auvea a na subiai fai i 'ita'ita'ieku wata i kiavetoketokeku.
Taunina yaku Yaubada bega a na subisubiai,
Taunina tamaku yana Yaubada bega a na awa'ai'aia.
3 'Auvea taunina Tovemata'ai'ai,
YAHWEH 'asa'aiana 'ana wagava.
4 Felo yana salioti wata yana tovetalagavo matatabudi i tutuvemonudi.
Felo yana tovetalaga vevenua'ivinidi Eyaga Yamoyamoina nageneye i yemuwafa.
5 Eyaganina i tavuna'a'avadi,
'Wa da vo kileu bani'odi, malaveseye i 'anikoludimo i obu eyaga dibuneye.
6 'Auvea, 'amu 'atagi toketokeotogina 'eba nuavogana.
E'e 'Auvea, 'amu 'atagiega 'amu gaviavo 'u luvesavovolidi.
7 Egavo i vedumwe'ai'aiemuga 'u leodi fai toketokeotogimu.
'U nuasako-'afo'afo bega 'u luvela'ovidi bani'odi 'ayalele i da tunuya i da 'ala'a'avai.
8 Yawaimu 'u tauyavuleni nika eyaga i 'awa'idia,
Eyaga i vevetobwatobwaga i ula i laka 'wa da vo vatu'ai,
We'e malaveta dibuneye eyaga i fa'ali.
9 'Ama gaviavo i vo, Ta na 'wavinedi bega ta na 'ive'avinidi,
Nika yadi kukuanidi nuanuada ta na elodi ta na veusedi.
Kefatayega ta na luvewafadi.’
10 Siwe yamu kaukau 'u butuya
Nika eyaga i vilai i obu i tavunidi.
Nufula bwaikina nageneye i 'anikoludi 'wa da vo kileu vitana.
11 'Auvea, 'aiseotogimu Yaubada,
Kebu tamu wata yaubadavo 'waidiega 'omu bani'odiga.
'Omu 'aisemu magemagetaotogimu.
'Eba nua'ewa wata 'eba nuavogana 'u 'idewadiga
Faifaidi ma yama kololo 'a ve'ililibuyemu.
12 'Amu 'atagi toketokena 'u 'otoi fwayafwaya 'u si'idia
Nika 'ama gaviavo i avuta i obu i tavunidi.
13 Tomotoganima 'u tuveobumaga 'u 'e'edakumesema yamu nuakalikali 'eno'eno-vagaina 'wainega.
Yamu toketokenayega 'u awave'ede'edema yamu 'eba mia 'ai'aiwabuna 'waineye.
14 Tomotoga 'awalawa tulina tulina 'waidiega valamu i nogai i kololo-'afo'afo bega i veve'alatatava.
Me Filisitia i toke i venuafouveviga,
15 Idomu yadi toveimeavo i veve'alakolokololo,
Moabe yadi to'edakumetavo i veve'alatatava.
Tomotoganidi i miamiani Kenani 'waineye, kebu 'adi fata i na vetoketoke, kololo luludi i tutubaibaidi.
16 Matatabudi i kololo-'afo'afo.
'Auvea, yamu toketokena i 'iseni bega kebu 'adi fata tamu ava'ai i da 'idewai,
'wa da vo kileu i da veve'wada 'ana tugusa yamu tomotogavo 'a le'wa 'waidiamo 'a nago.
'Omu yamu tomotogavo 'u 'ita'ita'iema 'ada gaviavo 'waidiega.
17 'Auvea, 'u vagavaima ta nunago yamu 'oya 'waineye, bei 'u na vemiabuima,
'oyanina 'u 'idewai yamu 'eba mia.
'Eba mianina magemagetana wata 'atumaiotogina nimamuyega i souyeni.
18 'Auvea 'u na veveimeyema i na nagoga kebu i na 'a'avaga i na 'eno-vagata.”
Side bani'odi Mosese wata me Isileli yadi lei 'Auvea yana toketokena faifaina.
19 Me Isileli eyaga nageneamo i nago fwayafwaya lalaneamo, we'e tutuyanina Felo yana osi, salioti wata salioti 'adi tomotogavo taiadi i luku eyaga nageneye 'Auvea eyaga i vevilai i tavunidi.
Miliama yadi lei-subisubia
20 Eloni novuna Miliama, kumanidi tamu Yaubada yana vona 'ana tolu'ivona, aliali i 'ewai vevine matatabudi i 'edakumesedi ma yadi aliali i yogo-tavotavola.
21 Miliama i yogoleilei 'waidie i vo,
Ta na lei 'Auvea 'waineye fai 'ada gaviavo i vetoketoke-'iawedi,
Felo yana osi wata salioti 'adi tododogavo taiadi eyage i tuvemonudi.”
'Auvea ufa 'awamaimaina 'ana yemu i 'ive'atumaia
22 Mulieta Mosese me Isileli i vagavaidi Eyaga Yamoyamoina 'wainega taiadi i luku sali'avu'avu 'ana wagava Sula 'waineye. 'Aiata 'aitonu nagedie sali'avu'avunina 'waineamo i nunago we'e ufa kebu tamu i da veluagaiga.
23 Tutuyanina i le'wa 'awalawa Mala 'waineye ufa i veluagai, siwe kebu 'adi fata i na yemu 'wainega fai 'awamaimaina. Begaidi 'awalawanina i goleni Mala.
24 Nika tomotoga Mosese 'waineye i vona-vaitugana i vo, Ufa 'a da yemu.”
25 Bega Mosese bonana bwaikinega i velu'ui 'Auvea 'waineye nika tamu welavi didina i veni, i 'ewai i taweni ufeye nika 'ana yemu i ve'atumai.
Bei 'Auvea yana veimea me Isileli i veledi yadi mia faifaina, i sitonovidi i na vematayakeyakeni 'alo kebu.
26 'Waidie i vo, 'Ai'edi bonaku 'wa na vivinenegeni bega 'wa na vevesauluva 'atumaina wata yaku veimea 'wa na vevematayakeyakedi, viganidi sakoidi basenadi me Itifita a velediga kebu wata a na velemi. Yau 'Auvea, 'ami To'ive'atumai.”
27 Mala 'wainega i tauya i nago i le'wai tamu 'awalawa 'ana wagava Ilimu. Ilimu 'waineye ufa luluvuala 12 wata niula 70 i tovotovoi. Ufanina lilivaneye me Isileli i vebae'wa.