20
Yaubada yana Veimea 10
1 Tutuyanina Mosese i laka 'oyeye Yaubada yana awave'eda'eda i lu'ivoneyedi i vo,
2 Yau 'Auvea yami Yaubada, kumaniku a vagavaimi 'wa souyemi Itifitayega, basenadi bei 'wa vetofolova-maimaiga.
3 Kebu mali yaubadavo 'waidie 'wa na 'odu'odu, yau 'aiseku yami Yaubada.
4 Kebu kumaea 'wa na 'idewadi bega 'waidie 'wa na 'odu'odu, kumaeanidi 'adi 'isa'isa bani'odi tamu nani abame, fwayefwayeye 'alo ufa nageneye, ufanina fwayafwaya dibuneye.
5 Kebu 'waidie 'wa na 'odu'odu wata 'wa na subisubiadi, yau 'aiseotogiku yami 'Auvea wata yami Yaubada, begaidi sauluvanina yau a vedumwe'ai'aieni. Egavo i na bailekuga a na vevematavulogidi nika i na damana natudiavo, tubudiavo wata aisediavo 'waidie.
6 We'e egavo 'wa na nuakalikaliekuga wata yaku veimea 'wa na vematayakeyakedi, yau yaku nuakalikali 'eno'eno-vagaina a na sisivemageseni 'waimie i na nagoga lakata 1,000 i mimaiga 'waidie.
7 Kebu 'aku wagava 'wa na inana-'avo'avovoiga. Yau 'Auvea yami Yaubada, begaidi egavo 'aku wagava i na inana-'avo'avovoiga a na vematavulogidi.
8 'Aiata Veawai 'wa na nuave'avini wata 'wa na ve'ililibuyeni fai 'aiatanina tabutabuna.
9 'Aiata 6 nagedie 'wa na folofolova
10 we'e 'aiata 'ana ve-7 'waineye 'wa na veawai fai yau 'Auvea yami Yaubada yaku 'aiata vevenua'ivinina. 'Aiatanina 'waineye kebu tamu aitoi yami 'aila'a 'wainega i na folova. De'e veimeanina natumiavo i na ve'ililibuyeni, iavetadi wata vevinedi, yami tofolovavo iavetadi wata vevinedi, yami 'aisayavo wata mali tomotoga taiadi 'wa miamianiga.
11 'Aiatanina 'wa na ve'ililibuyeniga fai 'aiata 6 nagedie, yau 'Auvea, abama, fwayafwaya wata eyaga a 'idewadi naninidi nagedie taiadi, we'e 'aiata 'ana ve-7 'waineye a veawai. Side faifainanina yau 'Auvea 'aiatanina a awave'atumaieni wata a yato'idieni faifaiku.
12 Tamamiavo wata inamiavo 'wa na ve'ililibuyedi nika 'ana fata yami mia i na vemanawe fwayafwayanina yau 'Auvea yami Yaubada a velevelemi.
13 Kebu 'wa na luvewafaga.
14 Kebu emiavo yadi vevinevo 'wa na luobuyediga.
15 Kebu 'wa na vainagoga.
16 Kebu 'wa na lu'ivona-vekavekali emiavo faifaidi.
17 Kebu 'wa na nuagiva emiavo yadi vanuga faifaidi. Wata kebu 'wa na nuagiva emiavo yadi vevinevo faifaidi, yadi tofolovavo iavetadi 'alo vevinedi faifaidi, yadi 'aisayavo wata emiavo yadi kukua.”
18 Tutuyanina tomotoga tumuyoana wata evulega butu'aina bwaikina i noganogaidi, nika i 'isanago namala bwaikina waowa 'wainega i namanamali wata lufwa bwaikina i lakalaka 'oyayega. Tomotoganidi 'ani'ieyega i veve'alatovoi ma yadi kololo i veve'alatatava.
19 Bega tomotoga Mosese i voneni i vo, 'Omu 'u na veifufu 'waimeye nika 'ama fata 'a na nogai, we'e Yaubada 'u na talabodeni kebu i na veifufu tonovina 'waimeye i na nunago 'a na wafa.”
20 Mosese bonadi i tutuli i vo, Kebu 'wa na kolologa, Yaubada i obuma i na sitonovimi bega 'ana kololo wata 'ana ve'ililibu i na 'eno-vagata 'waimie nika kebu 'wa na yogosako.”
21 Tomotoga 'ani'ie i tovotovoi we'e Mosese 'aisena i nago waowa dudubalina lilivaneye, waowanina nageneye Yaubada i miamia.