2 IONI
Ioni yana kiluma 'ana veluga
'Eba kiavemageta
Lubulubu de'e 'waineye, Ioni i kiluma tamu vavine ma natudiavo 'waidie. Wata yana lubulubu 'ana 'eba ve'a'ava 'waineye tamu vavine Ioni taiadi i miamiaga faifaidi i vona. To'aseta i vonaga, kebu vevine mogitana faifaidi i da vonavona, we'e mogitana voke Ioni i vona-awatabai tovetumagana 'aila'a 'ailuga faifaidi. Ioni i veifufu tamu Iesu yana 'aila'a 'waidie bega ma ediavo i na vevenuakalikali wata i matakia 'waidie tove-vekavekali faifaidi. Lubulubu de'e 'ana 'idi side bani'odi.
Vona-vekaiwa. 1:1-3
Venuakalikali. 1:4-6
Matakia tove-vekavekali faifaidi. 1:7-11
'Alanuai. 1:12-13
1
1 Yau Ioni, 'ami to'isave'avina, a vekaiwa 'omi vavine vevenua'ivinimi natumiavo taiadi 'waimie. Basenadi Yaubada i venua'ivinemi 'wa vetumagana 'ana 'aseta mogitana 'waineye, bega a nuakalikaliemi. Yau kebu 'aiseku a da nuakalikaliemiga, siwe wata tomotoga matatabudi Yaubada 'ana 'aseta mogitana i awavemogitaneni, i nuakalikaliemi.
2 Tomotoganidi taiadi matatabuma 'a nuakalikaliemi fai Yaubada 'ana 'aseta mogitana nuadeye i 'eno'eno, kebu i na 'a'avaga i na 'eno-vagata.
3 A vevelu'ui nuanuaku Tamada Yaubada wata Natuna Iesu Keliso ma yadi nuakalikali i na vevesauluva 'atumaina 'waideye, i na 'i'isanuakalikalieda wata nuanua bikana mia 'atumaina taiadi i na veleveleda. De'e naninidi 'waidiega matatabuda ta na veveiana wata Yaubada 'ana 'aseta mogitana 'waidiega ta na vevesauluva.
Venuakalikali mogitana kebu ta na vekali
4 Natumiavo 'ifwaidi faifaidi a sosoana mogitana, fai a 'isedi Yaubada 'ana 'aseta mogitana i vevematayakeyakeni ava'ai Tamada i vonedaga bani'odi.
5 Bega 'omi a nuakalikaliemiga a vonevonemi, nuanuaku ma edavo ta na vevenuakalikali. Veimea de'e nuakalikali faifaina kebu veimea 'ivaunaga, basenadi 'eba velamuyega i 'eno'eno 'waideye.
6 Nuakalikalinina faifaina a vonavonaga, side bani'odi. 'Ai'edi ta na vevenuakalikali mogitana, Yaubada yana veimea ta vevematayakeyakeni. Yana veimeanina basenadi 'wa 'asetai i vo, I lubwainemi 'aitamogana 'aitamogana 'wa na vevenuakalikali.”
7 Nuanuaku 'wa na vevenuakalikali fai 'awalawa fuedi 'waidie tovekali i miamiani. Tomotoganidi yadi nuanua igodi i vo, Iesu Keliso kebu i da vetomotogaotoga 'ida bani'odi.” Tovekalinidi Keliso 'ana gaviavo, nuanuadi i na vekalieda.
8 Taunimi 'wa na 'i'isave'avinimi bega kebu i na vekaliemi. 'Ai'edi bonadi 'wa na vetumaganediga, yami folova Yaubada faifaina 'ana tutula kebu 'wa na 'ewai 'wainega. Nuanuaku 'ami tutula matatabuna 'wa na veluagai.
9 Egavo Keliso yana ve i na 'iaweni i na damana tovekalinidi 'waidie, tomotoganidi kebu i da miave'itubama Yaubada taiadi. We'e egavo Keliso yana ve 'waideye, 'waineamo i na nunagoi, taunidi i miave'itubama Tamada wata Natuna taiadi.
10 'Ai'edi aitoi i na wai 'waimie nuanuana i na ve 'waimie, siwe yana venina kebu Keliso yana vona bani'odiga, kebu 'wa na voneni i na wai yami vanuge wata kebu tamu sai'afo 'wa na tolivileni.
11 We'e 'ai'edi aitoi i na lu'uma'umaieniga, siwe 'asa'aiana 'akonadi 'ana 'au yana folova sakoina 'waineye.
Yana veifufu 'ana 'eba ve'a'ava
12 Nuanuaku 'waimie a na veifufu manamanawena, siwe kebu kiluma 'aisena 'wainega. A nuani tauniotogiku a na wai a na veifufu 'waimie bega matatabuda ta na sosoana mogitana.
13 Taimi natudiavo de'e bei i miamianiga, yadi vekaiwa i vetunei 'waimie. Taiminidi Yaubada i venua'ivinedi.
'Asa'aiana bani'odi,
Ioni