31
7 'Auvea i vona i vo,
Ma yami sosoana 'wa na lei me Isileli faifaidi,
'aila'anina ma 'ana wagava bwaikina, we'e 'ifwaidi sai'afo,
begaidi 'wa na toke 'wa na vegolegole.
Ma yami subia 'wa na lei wata bonami bwaikinega 'wa na vegolegole,
side bani'odi 'wa na voneyedi 'wa na vo,
'Auvea, yamu tomotoga 'u da 'ivaisedi,
kumanidiavo bola ma yawaidi i miamiani.’
8 Nika a na tutula a na vo,
Yaku tomotoga a na miedi yavalatayega,
wata 'ani'ieyega a na va'augidi, fwayafwaya matatabuna 'wainega.
Tomatasako, to'agesako, toveinainage wata sai'afoga i na venatuna taiadi,
kebu a na venuafanidi.
I na viladiga 'adi 'aila'a bwaikaotogina.
9 Yau a na kumekumesedi, we'e ma yadi 'we'wela i na mimaia, i na vevelu'ui 'waikuye nuatavuna faifaina.
Ufa lilivadiamo wata tano'atuga 'waidiamo a na nawedi nika kebu i na be'uga.
Yau Isileli tamana we'e Ifeleimi yaku tubu'edakumeta,
begaidi a na 'edakumesedi i na maia.”
'Auvea yana Veakutagona 'Ivauna i na 'idewai
31 Wata 'Auvea i vona i vo,
'Awaie yaku Veakutagona 'Ivauna a na 'idewai me Isileli wata me Iuda 'waidie.
32 Veakutagonanina basenadi tubudiavo 'waidie kebu bani'odiga,
tutuyanina Itifitayega a yavudi nimadie a 'abi a miedi.
A 'i'isave'avinidi 'wa da vo yau yadi lamoga,
siwe yaku veakutagona i vedumwe'ai'aieni.
Yau 'Auvea, side bani'odi a voneyedi.
33 'Awaie yaku Veakutagona 'Ivauna a na 'idewai me Isileli 'waidie side bani'odi.
Yadi nuanua 'waidie yaku veimea a na yatodi, wata nuadie a na kilumidi.
We'e yau yadi Yaubada, taunidi yaku tomotoga.
34 'Aku 'aseta i na vebwaika tomotoga matatabudi 'waidie, kumanidiavo ma 'adi wagava wata tomotoga-'avo'avovo,
bega kebu tamu aitoi iana wata 'ifwaidi enavo i na vonedi i na vo, 'Auvea 'wa da 'asetai.’
Fai tomotoga matatabudi 'akonadi i na 'asetaku.
Yadi sauluva sakoidi a na nuatavunidi, yadi sakona kebu faifaina a na nuanua.
Yau 'Auvea, side bani'odi a voneyedi.”