18
Esekaia me Iuda yadi kini
1 Ela natuna Osia i vekini Isileli nageneye, i veveimea malamala 'ana vetonu 'waineye, we'e Easi natuna Esekaia i vekini me Iuda i veveimeyedi.
2 Esekaia 'ana malamala 25 'waineye yana vekini i velamu, Ielusalema yana 'eba veimea i 'i'isave'avini malamala 29 nagedie. We'e inana 'adi wagava Ebaya, Sekalaia natuna.
3 Yana sauluva matatabuna 'atumaina wata tonovina yana 'Auvea mataneye, basenadi tubuna Devida bani'odi.
4 Esekaia 'eba 'odu yaubada vekavekali faifaidi i geudi, kileu tabutabudi i tubakabakaledi wata Asela 'adi 'eba 'odu'odu ogola manamanawedi i vetovoidiga 'adi 'isa 'eba bunumayaga i 'ivesakoidi. We'e kumaea 'o'olo 'ana 'isa'isa bani'odi, Mosese basenadi i 'idewaiga kainumu balonisi 'wainega, i tubakabakali. Me Isileli 'o'olonina i goleniga Neutani, vane i vevelomuyeni i kabukabuni 'waineye.
5 Esekaia i vetumagana 'Auvea me Isileli yadi Yaubada 'waineye, we'e Iuda nageneye kebu tamu kini yana sauluva bani'odi, basenadi wata 'awaie i na salai.
6 Kumanina yana sauluva 'atumaina 'Auvea mataneye wata kebu i da vedumwe'ai'aieni, we'e yana veimea Mosese i veleniga i veve'ililibuyedi.
7 'Auvea tutuya matatabuna i labilabini, nani matatabuna i 'i'idewadewadiga 'ana fata. We'e Esekaia me Asilia yadi kini i vedumwe'ai'aieni, kebu takesi i da veleveleni.
8 Esekaia me Filisitia taiadi i vetalaga i vetoketoke-'iawedi, i nagoga 'ana tugusa Gasa yana 'eba veimea matatabuna 'waineye, 'atamana siaidi wata 'atamana bwaikidi, kumanidiavo kileu 'waidiega i kalififinedi.