18
Ve'avula 'ana veimea
1 Mulieta 'Auvea i veifufu Mosese 'waineye i vo,
2 'U na veifufu me Isileli 'waidie 'u na vo, Yau 'Auvea yami Yaubada.
3 Kebu me Itifita yadi sauluva 'wa na vetutuyamediga, kumanidiavo bagase taiadi 'wa miamianaga, 'alo bani'odiga me Kenani yadi sauluva, kumanidiavo i miamia 'awalawanina a vagavaimi 'wa nunagoi 'waineye. Kebu yadi sauluva 'wa na vetutuyamediga.
4 Yaku veimea wata yaku awave'eda'eda ma yami ve'ililibu 'wa na vematayakeyakedi, yau 'Auvea yami Yaubada.
5 'Ai'edi yaku awave'eda'eda wata yaku veimea ma yami ve'ililibu 'wa na vematayakeyakediga mia 'atumaina mogitana 'wa na veluagai. Yau 'Auvea a vona.
6 Kebu tamu dayagimi mogitana taiadi 'wa na 'enoga bani'odi inamiavo, tamamiavo, taimiavo 'alo tatamiavo, novumiavo, lomoimiavo, avumiavo wata wagamiavo. Yau 'Auvea a vona.
19 Kebu tamu vavine weta'i i 'ewadiga taiadi 'wa na 'eno, fai vavinenidi yokeyokedi.
20 Kebu tamu iamu yana vavine taiadi 'wa na 'enoga fai 'wainega taunimu 'u na 'ivesakoimu.
21 Kebu natumiavo 'wa na nikedi 'wa na velomuyedi yaubada vekavekali Moleki 'waineye. Yau yami Yaubada, kebu 'wa na 'ivebunumayagiku wata 'aku wagava kebu 'wa na venani-'avo'avovoyeni. Yau kumaniku 'Auvea.
22 Kebu tamu tomogo iana iavetana taiadi i na 'enoga. De'e sauluvanina sakona bwaikina, Yaubada i vedumwe'ai'aieni.
23 Kebu 'aisaya taiadi 'wa na 'enoga bega taunimi 'wa na 'ivesakoimi. Wata bani'odi vavine kebu taunina i na tauyeni 'aisaya iavetana taiadi i na 'eno fai sauluva de'edi sakoiotogina.
24 Kebu de'e sauluvanidi 'waidiega taunimi 'wa na 'ivesakoimi. Tomotoganidi i miamiani 'awalawanidi a na velemiga bani'odi i vevesauluvedi i toke i sakona-magimagi'ai, begaidi tomotoganidi a na 'wavinedi i na souyedi we'e 'omi ma'itufa 'wa na luvaia.”