MALIKA
Iesu Valana 'Atumaina Malika 'ana kilukiluma
'Eba kiavemageta
Malika tamu 'ana wagava Ioni, kumanina nagamidiotoga Vala 'Atumaina faifaina i kiluma. Malika kebu Iesu yana tovetutuyama 12 'adi 'aila'a 'wainega, bega to'aseta 'ifwaidi i vo, Iesu valana Malika i nogaya-'ewai Fita yana lau'age 'wainega bega i kiluma.” Fai Malika Ielusalema nageneye i taulai bega tauniotogina Iesu yana folova matatabuna i 'isedi. We'e Malika 14:51-52 ta na lu'iawawaiga ta na 'iseni voke 'asa'aiana taunina Malika. Mulieta Faulo wata Banabasa i 'ivaisedi taiadi i folofolova.
Malika nuanuana me Loma kumanidiavo 'awalawa fuedi i veveimeyediga Iesu valana i na 'asetai. We'e me Lomanidi fai nani toketokedi wata 'ai'aiwabu nuadi i 'ewadi, Malika yana buki nageneye i vo, Iesu 'aiseotogina toketokena ma yana veimea bega me Loma wata tomotoga fueda ta na 'asetai taunina mogitana Yaubada Natuna.” Iesu 'eba nuavogana wata 'eba nua'ewa fuedi i 'idewadi faifaidi Malika i toke i veifufu we'e yana ve faifaidi sai'afo. We'e tamu nani faifaina i veifufuga, Iesu Seitani i vetoketoke-'iaweni fai taunina tomotoga 'ada to'ita'ita'i.
1
Ioni i veifufu Iesu yana mai faifaina
(Madiu 3:1-12; Luke 3:1-9,15-17; Ioni 1:19-28)
1-2 Iesu Keliso, Yaubada Natuna Valana 'Atumaina. Valanina 'Atumaina side bani'odi i velamuyedi. Basenadi tolu'ivona Aisea Yaubada yana Vona Natuna faifaina i kilumi. Natuna i voneni i vo,
A na vonemu. Yaku tomata'aulele a na vetunei i na kumeta
yamu 'eda i na vusia.
3 Sali'avu'avuye i vevegolegole i vo,
'Auvea yana 'eda 'wa na vusia,
wata 'wa na sivetonovi yana 'eba nago.’ ”
4 Tomata'aulelenina 'asa'aiana Ioni Tobafitaiso. Sali'avu'avuye Ioni i lalau'age tomotoga 'waidie wata i bafitaisodi nika bei Aisea yana vona-samula 'ana mogitana i souyeni. I vonedi i vo, 'Wa na nuavilami yami sakona 'wa na vedumwe'ubu'ubusedi bega a na bafitaisomi wata Yaubada yami sakona i na nuatavunidi.”
5 'Awalawa Iudia matatabuna 'wainega wata Ielusalemayega tomotoga fuedi Ioni valana i nogai bega i nagoi 'waineye. Tutuyanina Ioni bonana i nogai, 'aitamogana 'aitamogana yadi sakona i lu'ivoneyedi nika Ioni i bafitaisodi Ufa Iolidani 'waineye.
6 Ioni 'ana talauma kameli vutuvutudiega i 'idewadi, we'e bulumakau bunudi 'ana wa'ila, 'ana'ana limwana wata mai'awa.
7 Ioni i lau'age tomotoga 'waidie i vo, Kumanina mulikuye i mimaiga toketokeotogina yau kebu bani'odiga, kebu i da lubwaineku 'waineye a na vetofolova, fai taunina bwaikina.
8 Yau ufayega a babafitaisomi we'e 'awaie i na babafitaisomi 'Anu'anunu Magemagetana 'wainega.”
Iesu yana souyagi
(Madiu 3:13-17; Luke 3:21-22, 4:1-13)
9 Tutuyanina 'waineye Iesu i tauya 'atamana Nasalediega, 'awalawa Galili nageneye i nago Ioni 'waineye nika i bafitaisoi Ufa Iolidani 'waineye.
10 I bafitaiso i 'a'avana, ufayega i lakalakama nika i 'iseni abama i 'anikililia, 'Anu'anunu Magemagetana yana yaveobu Iesu 'waineye 'ana 'isa'isa bani'odi bunebune.
11 Bona i nogai abamayega i vo, 'Omu natuku nuafouku. Faifaimu a sosoana mogitana.”
12 Mulieta Yaubada 'Anu'anununa i vagavaia i naweni sali'avu'avuye.
13 Bei 'aiata 40 nagedie i miamia, yaiaina yadi to'edakumeta Seitani, i mai i silubuya nuanuana Iesu i na sakona. 'Aisaya walawala'ai taiadi i miamia siwe anelose i 'i'isave'avini.
Iesu nuanuana toyaubani
(Madiu 4:12-22; Luke 4:14-15)
14-15 Kini Elodi Ioni Tobafitaiso i 'ive'avini vanuga yogona nageneye i yatoi, mulieta Iesu i vilai i nago 'awalawa Galili. Yaubada Valana 'Atumaina i lulu'ageyeni i vo, Yaubada yana tutuya i le'wa, sai'afoga yana veimea i na souyeni 'waimie. 'Wa na nuavilami yami sakona 'wa na vedumwe'ubu'ubusedi, Vala 'Atumaina 'wa na vetumaganeni.”
16 Tamu 'aiata Iesu i balabala Lavu Galili balebaleamo tomotoga 'adi 'ailuga i 'isedi, Saimoni ma taina Anidulu vuatayega igana i 'ona'onadi fai taunidi toyaubani.
17 Iesu i vonedi i vo, We'e yaubaninina 'wa na baileni, 'wa na maia 'wa na vetovetutuyama 'waikuye, yau tamu yaubani a na vemi bega tomotoga 'wa na 'ona'onadi 'wa na mimaiedi Yaubada 'waineye.”
18 Nika Saimoni wata Anidulu vualalalakana i bailedi Iesu taiadi i nagoi i na vetovetutuyama 'waineye.
19 Sai'afo i vaganago nika Sebedi natunavo i 'isedi, Iemesa wata Ioni yadi wakeye yadi vuata i agiagilidi.
20 Tutuyanina Iesu i 'isedi i goledi i vo, 'Wa maia,” nika tamadi ma yana tofolovavo wakeye 'iawedi Iesu taiadi i nagoi Kafaneomi.
Tomogo yaiaina i ageiga i ve'atumai
(Luke 4:31-37)
21 Iesu ma enavo i miamiani Kafaneomi, mulieta me Diu yadi 'Aiata Veawai 'waineye Iesu i luku 'eba miava'auta nageneye, bei i ve.
22 Tomotoga nuadi i voganidi fai ma yana veimea i veve 'waidie, kebu bani'odi yadi ve'etoboda 'adi tovevo.
23 Tutuyanina Iesu i veve, tamu tomogo yaiaina sakoina i ageiga i mai 'eba miava'auta 'waineye, Iesu yana vona i noganogai.
24 Bei ma 'ana labilabina i vevegolegole i vo, Iesu tomogo Nasaledi, 'u bailema 'ima kebu nuanuama 'omu. Voke nuanuamu 'u na leoma? A 'asetamu, 'omu Magemagetamu 'u mai Yaubada 'wainega.”
25 Iesu yaiaina i talabodeni i vo, 'U ve'wada, 'u 'awa'a'imu tomogo 'wainega.”
26 Yaiainanina tomogo i toke i fetoi i vebwaubwau nika i 'awa'a'ia.
27 Tomotoga i 'iseni nuadi i voganidi i veveakutolieni i vo, Emavo, de'e ava'ai vega? Yana ve 'ivauna wata ma yana veimea, yaiaina i tatalabodedi nika i vevematayakeyakeni.”
28 Tomotoga fuedi i lu'ivoneyeni bega valana 'awalawa Galili matatabuna i 'aseta.
Iesu toviga i 'ive'atumaidi
(Madiu 8:14-17; Luke 4:38-44)
29 'Eba miava'auta 'wainega Iesu ma enavo i souyedi tonovidi i nagoi Saimoni wata Anidulu yadi vanuge. Iemesa wata Ioni taiadi i nagoi.
30 Saimoni yana vavine inadi i viga tomogodi i luyauyauta i 'eno'eno 'ivie. Iesu i le'wa i veifufu 'waineye yadi viga faifaina.
31 Iesu i luku nimadie i 'abi i sivetovoidi nika yauyautanina i 'awatagoni, ma fuedie 'adi'adi i 'idewadewa.
32-33 Inala 'akonadi i iniva i lavilavia, tomotoga ediavo yaiaina i agediga wata toviga i miedi Iesu 'waineye wata tomotoga matatabudi 'atamana bwaikina 'wainega i va'auta vanuga 'awaneye.
34 Toviga 'adi viga tulina tulina Iesu i 'ive'atumaidi wata i vona yaiaina fuedi i 'awa'a'idi. Yaiainanidi i talabodebodedi kebu i na lulu'ivona fai 'akonadi i 'asetai taunina Keliso, Yaubada 'ana Venua'ivina.
Iesu 'aiseneye i velu'ui
(Luke 4:42-44)
35 Bola 'awa'awaiogose kebu i da magetaiga Iesu i tovoi, vanugayega i souyeni i nago tamu 'awasasa kebu tomotoginaga 'waineye, 'aiseneye i velu'ui.
36 Mulieta Saimoni ma enavo i 'isa Iesu i 'isa'avai i nagoi i lualeni.
37 Tutuyanina i veluagai i voneni i vo, Tomotoga fuedi nuanuadi 'omu, begaidi i lulualemu.”
38 Iesu i vonedi i vo, Ta na nagoi mali 'atamana 'waidie bei wata a na lau'age, folovanina faifaina a mai.”
39 Bega i nagoi i lau'age-vuvua 'awalawa Galili matatabuna 'waineye, yadi 'eba miava'auta nagedie wata yaiaina tomotoga i agediga, i vonavona nika i 'a'awa'a'idi.
Iesu tomogo bonubonuna i 'ive'atumaia
(Madiu 8:1-4; Luke 5:12-16)
40 Tamu tomogo viga sakoina 'eba kololo tomogona i velufo'afo'ana, i mai Iesu 'waineye ma yana ve'ililibu i 'odu i velu'ui 'aivaita faifaina i vo, 'Ai'edi nuanuamu, 'amu fata 'u na 'ive'atumaiku.”
41 Iesu tomogonina i 'isanuakalikalieni bega i 'abitonovi i voneni i vo, Fai bani'odi, nuanuaku, 'u ve'atumai.”
42 Yana voneye, nika tomogonina 'ana viga i 'a'ava i ve'atumai.
43-44 Bega Iesu i toke i talabodeni wata i vetunei i vo, Kebu tamu aitoi 'waineye 'u na lu'ivonaga, nuanuaku tonovimu 'u na nago tovelomu 'waineye, nagami i na 'isemu. Mulieta yamu velomu 'u na 'aniveleneni bani'odi veimeanina i mai Mosese 'wainega, toviganina i ve'atumaiga faifaina. Tovelomunina i na 'isemu i na ve'awamogitana 'akonadi 'u ve'atumai wata bani'odi mali tomotoga i na 'asetai.”
45 Siwe tomogonina yana ve'atumai i lu'ivoneyeni 'aila'a 'waidie, begaidi tomotoga fuedi i mimaia Iesu 'waineye, i tovififineni wata i vevetunufelagieni bega kebu 'ana fata i na luku 'atamana bwaikidi 'waidie. Begaidi i miamia 'awasasa kebu tomotoginaga 'waineye siwe wata tomotoga fuedi 'awalawa tulina tulina 'waidiega i nunagoi 'waineye.