3
Tomogo nimana 'okana
(Madiu 12:9-14; Luke 6:6-11)
1 Iesu i vilai i nago me Diu yadi 'eba miava'auta 'waineye tamu tomogo i 'iseni nimana 'okana bei i miamia.
2 We'e Diu totafalolo 'ifwaidi Iesu i vemata'i'i'ieni. 'Ai'edi toviganina i na 'ive'atumaia 'Aiata Veawai 'waineye i na tolimatani fai folovanina 'wainega, igodina yadi veimea i da geugeuya.
3 Iesu i vona tomogo nimana 'okana 'waineye i vo, 'U mai side bei 'aila'a manawadie 'u tovoi.”
4 Tomogonina i mai mulieta Iesu Diu totafalolo i velutoliedi i vo, Yada veimea 'Aiata Veawai faifaina, 'wa da nuani, ta na vevesauluva-'atumai 'alo ta na vevesauluva-sako? Wata 'ai'edi tamu tomogo sai'afoga i na wafa ta na 'ivaiseni 'alo ta na luvewafai?” Siwe kebu bonana i da tutuliga.
5 Iesu i nuavita fai tomotoganidi kebu nuanuadi tomogo nimana 'okana i na 'ivaiseni. Begaidi Iesu i nuasako 'aitamogana 'aitamogana i 'isadewadi nika tomogo nimana 'okana i voneni i vo, Nimamu 'u si'otoi.” Nimana i si'otoi nika i ve'atumai.
6 Falisi i 'iseni nika i tauya i nagoi i veifufu Kini Elodi yana 'aila'a taiadi bani'odi i na munega Iesu i na luvewafai.
'Aila'a lavu lilivaneye
7-8 Iesu ma yana tovetutuyamavo i nagoi lavuye, siwe 'aila'a bwaikina Iesu yana folova valana i nogai i yogo'waila i maia 'awalawa Galili wata Iudia 'waidiega. 'Ifwaidi i maia Ielusalemayega, Idumeayega, Ufa Iolidaniega i damanama, 'atamana Taia wata Saidoni lilivadiega.
9-10 Tomotoga fuedi i 'i'ive'atumaidi begaidi toviga i vevetunufelagieni nuanuadi i na 'abitonovi bega i na ve'atumai. 'Aila'a bwaikina begaidi Iesu yana tovetutuyamavo i vonedi waka i na 'ivenonogi faifaina, 'ai'edi i na lutamubodeniga nika i na laka tabwaneye i na lau'age.
11 Wata tomotoganidi yaiaina i agediga Iesu i 'iseni, yaiainanidi i tawedi i lumata'afufu fwayefwayeye Iesu mataneye i vebwaubwau i vo, 'Omu Yaubada Natuna.”
12 Siwe Iesu yaiaina i talabodedi kebu faifaina i na veveifufu.
Iesu yana tovetutuyamavo 12 i venua'ivinedi
(Madiu 10:1-4; Luke 6:12-16)
13 Tamu tutuya Iesu i laka 'oyeye, tomotoganidi Iesu nuanuana i goledi i na nagoi 'waineye.
14-15 Tomotoganidi 'waidiega 'adi 12 Iesu i venua'ivinedi yana tomata'aulelevo bega i na miamiani 'waineye. Mulieta i na vetunedi i na lau'age tomotoga 'waidie, wata veimea i na veledi bega i na vona yaiaina tomotoga i agediga, i na 'awa'a'idi.
16 Tomotoganidi 12 i venua'ivinediga side 'adi wagava.
Saimoni, kumanina Iesu i goleni Fita,
17 Iemesa ma taina Ioni, taunidi Sebedi natunavo kumanidiavo Iesu i goledi Boenati, 'ana saivila Tamuyoana Natunavo.
18 Anidulu,
Filifi,
Batolomiu,
Madiu,
Tomasi,
Iemesa, Alefasi natuna,
Tadiusa,
Saimoni, toawa'idi'idi kebu nuanuana Loma kabemani i na veveimeyedi,
19 Iudasa Isakaliota, kumanina Iesu 'ana to'etogiluva.
Tomotoga yadi nuanua i vo 'ako yaiaina Iesu i agei
(Madiu 12:22-32,46-50; Luke 8:19-21, 11:14-23)
20 Tutuyanina Iesu i le'wa vanuge, tomotoga fuedi i velamu i mimaia 'waineye, bega yana tovetutuyamavo taiadi kebu tamu 'awasasa i da veledi 'ani faifaina.
21 Tutuyanina Iesu yana 'aila'a valana i nogai i maia, igodi nuanuadi i na vagavaia i na naweni, fai i vonavona i vo, Iesu i ve'wava'wava.”
22 We'e ve'etoboda 'adi tovevo Ielusalemayega i maiaga i vona i vo, Seitani, yaiaina yadi to'edakumeta, Iesu i agei yana toketokena i veleni bega i vonavona yaiaina i 'a'awa'a'idi.”
23 Iesu i goledi i maia 'waineye i vona-awatabai 'waidie i vo, Yaku folovanina kebu Seitani yana toketokena 'wainega, fai Seitani kebu nuanuana enavo i na sogiedi.
24 'Ai'edi 'eba veimea 'aise'avadi i na 'idia i na vevetalaga bola 'eba veimeanina i na velovi.
25 Wata 'ai'edi vanuga 'ana tomia yadi ve'ikwayekwayega 'wainega 'idi i na souyeni, nika i na yavula.
26 Wata bani'odi 'ai'edi Seitani yana 'aila'a 'aise'avadi i da 'idia i da vevetalaga kebu 'ana fata i na miamia i na 'a'avaotoga.
27 Side bani'odi. Kebu tamu aitoi 'ana fata i na luku tamu tomogo toketokena yana vanuge i na vainago, we'e 'ai'edi nuanuana, nagami tomogonina toketokena i na 'iyogoyogoni, mulieta i na vainago.
28 Begaidi a na vonemi, tomotoga 'adi fata nuatavuna i na veluagai yadi sakona wata awavesako tulina tulina faifaidi.
29 Siwe egavo i na vona-uvi'agala 'Anu'anunu Magemagetana 'waineye, kebu 'ana fata Yaubada i na nuatavunidi, yadi sakonanina i na 'eno-vagata.”
30 Iesu i vonaga fai tomotoga 'ifwaidi i vo, Kumanina yaiaina sakoina i agei,” we'e mogitana 'Anu'anunu Magemagetana 'wainega i vona yaiaina i 'awa'a'idi.
Iesu tainavo wata inadi taiadi i nagoi 'waineye
(Madiu 12:46-50; Luke 8:19-21)
31 Iesu tainavo ma inadi i maia 'waineye, i tovoi 'atamanayega i vevelutoli Iesu faifaina.
32 'Aila'a Iesu taiadi i miamianiga i voneni i vo, Taimwavo wata inamu siva'e i lulualemu.”
33 Iesu i vona i vo, 'Wa da nuani, egavo taikwavoga wata inaku?”
34 Tomotoganidi i miafifineniga 'aitamogana 'aitamogana Iesu i 'isedi i vonedi i vo, A na vonemi. Side, yaku tovetutuyamavo, taunidi inaku wata taikwavo.
35 Aitoi Yaubada yana nuanua 'ana to'idumwebika, taunina inaku, novuku wata taiku.”