MADIU
Iesu Valana 'Atumaina Madiu 'ana kilukiluma
'Eba kiavemageta
Madiu tamu Iesu yana tovetutuyamavo 12 'adi 'aila'a 'wainega, we'e tamu 'ana wagava Livai. Yana folova takesi 'ana tolaugogona i folofolova Loma kabemani faifaidi. Mulieta Iesu i venua'ivineni i vetovetutuyama 'waineye.
Madiu buki de'e i kilumiga taunina yana 'aila'avo me Diu faifaidi. Me Diu i nuani i vo sai'afoga Yaubada 'ana Venua'ivina i na mai bega taunina yadi kini. Ibeliu bonadiega i goleni Mesaia we'e bona Kuliki 'wainega, Keliso. Diu to'edakumetavo Iesu yana 'eba mai lamuna i bavuyeni wata tomotoga fuedi nuadi i voganidi.
Madiu nuanuana i na ve 'waidie Iesu taunina mogitana Keliso me Diu yadi kini, begaidi i veifufu Iesu yana souyagi bani'odi kini. Wata vona 'ifwaidi i 'inanadi Vona'awaufaufa Tuatuaina 'wainega, Yaubada 'ana Venua'ivina faifaina, vonanidi 'adi mogitana i souyedi Keliso 'wainega.
Nani 'ifwaidi faifaidi i kilumaga side bani'odi, Iesu yana ve, luvetubama Yaubada yana 'Aila'a nageneye faifaina wata yana vona-awatabai fuedi givagivadi tomotoga yadi luku Yaubada yana 'Eba Veimea nageneye faifaina i kiluma, bega tutuya de'e Yaubada i veveimea tomotoga 'waideye.
1
Iesu tubunavo tubulelelegidi
(Luke 3:23-38)
1 Iesu Keliso tubunavo side bani'odi yadi tubuga, taunina Kini Devida 'ana wauma 'wainega i souyeni we'e Devida Ebelamo 'ana wauma 'wainega i souyeni.
2 Ebelamo natuna Aisake,
Aisake natuna Iakobo,
Iakobo natunavo Iuda ma tainavo,
3 Iuda natunavo Felesi wata Dela, inadi Temali,
Felesi natuna Esiloni,
Esiloni natuna Lami,
4 Lami natuna Aminadaba,
Aminadaba natuna Nasoni,
Nasoni natuna Salimoni,
5 Salimoni ma yana vavine Leabi natudi Bwasa,
Bwasa ma yana vavine Ludi natudi Obedi,
Obedi natuna Iese,
6 Iese natuna Kini Devida.
Devida 'wainega i velamuga side bani'odi.
Devida natuna Solomoni, we'e inana nagami Ulaia yana vavine,
7 Solomoni natuna Lioboama,
Lioboama natuna Ebaya,
Ebaya natuna Esa,
8 Esa natuna Iosefata,
Iosefata natuna Dielome,
Dielome natuna Usaia,
9 Usaia natuna Iotama,
Iotama natuna Easi,
Easi natuna Esekaia,
10 Esekaia natuna Manasa,
Manasa natuna Emoni,
Emoni natuna Iosia,
11 Iosia natuna Iekonaia ma tainavo i miamiani, tutuyanina 'waineye me Babiloni i maia me Isileli i 'ive'avinidi i nawedi yadi 'awalaweye.
12 We'e Babiloni 'wainega i velamuga side bani'odi.
Iekonaia natuna Salatiela,
Salatiela natuna Selubabela,
13 Selubabela natuna Abiuda,
Abiuda natuna Eliakimu,
Eliakimu natuna Asodi,
14 Asodi natuna Sadoki,
Sadoki natuna Ekimu, Ekimu natuna Eliuda,
15 Eliuda natuna Eleasa,
Eleasa natuna Mateni,
Mateni natuna Iakobo,
16 Iakobo natuna Iosefa. Iosefa kumanina yana vavine Meli, vavinenidi Iesu kumanina i golegoleniga Keliso, Yaubada 'ana Venua'ivina inana.
17 Bega 'ai'edi ta na lu'iawawa Ebelamo 'wainega i nagoga Kini Devida 'waineye lakata 14. We'e Kini Devida 'wainega i na nagoga tutuyanina me Babiloni i maia me Isileli i nawedi yadi 'awalaweye lakata 14. Wata tutuyanina 'wainega i na nagoga nika Keliso i tubuga wata lakata 14.
Iesu Keliso yana tubuga
(Luke 2:6-7)
18 Iesu Keliso yana tubuga side bani'odi. Meli 'awaie Iesu inana, kumanina veveakutagonina Iosefa faifaina. Bola kebu i da nagiga wata kebu tamu aitoi taiadi i da veluaga, siwe i 'asetai 'akonadi i miana 'Anu'anunu Magemagetana yana toketokena 'wainega.
19 Iosefa kumanina toveakutagona, i nuavita Meli yadi miana faifaina, siwe fai yana sauluva tonovina begaidi kebu nuanuana Meli i na 'ivebunumayagidi, we'e givagivayega i na bailedi.
20 Igodi yana nuanuananina i da 'idewaiga, lovane i 'eno'eno nika i 'enoneganega 'Auvea yana anelose i souyeni i voneni i vo, Iosefa, 'omu Kini Devida tubuna, kebu 'u na venuanaluga Meli 'adi nagi faifaina, we'e i mianaga 'Anu'anunu Magemagetana yana toketokena 'wainega, 'asa'aiana 'u na nagidimo.
21 Mulieta i na venatuna, kwamana iavetana i na tubuga 'u na goleni Iesu, fai yana tomotoga i na 'ita'ita'iedi yadi sakona 'waidiega.”
22-23 Bega Meli yadi miana wata Iesu yana tubuga faifaidi, basenadiotoga 'Auvea i vona yana tolu'ivona 'wainega 'ana mogitana i souyeni i vo,
A na vonemi.
Vavine ne'e'elina kebu tamu tomogo taiadi i da veluaga siwe i na miana.
Kwamana iavetana i na tubuga, i na goleni Imanueli,
'ana saivila Yaubada 'ida taiadi.”
24 Tutuyanina Iosefa 'enoyega i tovoi, 'Auvea yana anelose yana veifufu i vematayakeyakeni, bega Meli i nagidi i nawedi yana vanuge.
25 Siwe kebu tamu tutuya taiadi i da veluaga i nagoga 'ana tugusa i venatuna. Mulieta Iosefa kwamananina i goleni Iesu.