14
Ioni Tobafitaiso yana wafa
(Malika 6:14-29; Luke 3:19-20, 9:7-9)
1-2 Tutuyanina 'waineye, Loma kabemani yadi to'edakumeta Kini Elodi 'awalawa Galili 'ana toveimea. Iesu yana folova toketokena valana i nogai, yana tofolovavo 'ifwaidi i vonedi i vo, No'o Iesu, 'asa'aiana mogitana taunina Ioni Tobafitaiso i yawasa-vaitugana. Begaidi 'eba nuavogana wata 'eba nua'ewa i 'i'idewadi.”
3 Bani'odi i voneyediga fai basenadi yana veimea 'wainega Ioni i yogoni i yatoi vanuga yogona nageneye. We'e Elodi taina Filifi yana vavine Elodiasa i luobuyedi mulieta i nagidi.
4 Begaidi Ioni Elodi i tolimatani i vo, 'U vekali, taimu yana vavine 'u nagidi, Yaubada yana veimea 'u geuya.”
5 Ioni yana vonanina faifaina Elodi nuanuana i na luvewafai siwe me Diu i kololoyedi fai i vo, Taunina tamu Yaubada yana tolu'ivona.”
6-7 Tutuyanina Elodi yana 'aiata tubuga i veluagai sakali bwaikina i 'idewai, Elodiasa natudi vevinena i voneni matadie i kayama. Elodi i 'iseni nuana i 'ewai bega i vona'awaufaufa 'waineye i vo, 'Ai'edi ava'ai nuanuamu 'u na velu'uiga, vona mogitana a na velemu.”
8 Inana i nogai natudi i tolivetonoveni bega vavinenina ne'e'elina i nago Elodi 'waineye i vo, Nuanuaku Ioni Tobafitaiso i na wafa, 'unu'ununa 'aivoeye 'u na dodogi 'u na mieni 'waikuye.”
9 Kini Elodi i nogai nuana i vita siwe kebu 'ana fata yana vona'awaufaufa i na geuya fai 'ana wakawaka matadie i vona, bega yana tolugaviavo i vonedi i nagoi yana nuanua i 'idewai.
10-11 Vanuga yogona nageneye Ioni 'odona i boboi, 'aivoeye i dodogi i mieni vavine i veleni. I 'ewai i nago inana i veledi.
12 Tutuyanina Ioni yana tovetutuyamavo valana i nogai, i maia tomogona i naweni i ve'ufai, mulieta i nagoi Iesu i voneni.
Iesu tomotoga 5,000 i ve'anidi
(Malika 6:30-44; Luke 9:10-17; Ioni 6:1-15)
13 Tutuyanina Iesu i 'asetai Ioni 'akonadi i wafa, bega 'atamananina i 'iaweni i dodoga wakeye, 'aiseneye i nago kebu tamu aitoi bei i da miamiaga 'waineye. Tomotoga fuedi yana tauya i 'asetai bega yadi 'atamana i 'iawedi i veyogo'waila balebaleamo i nagoi.
14 Tutuyanina i le'wa, Iesu wakayega i obu balebaleye, tomotoga fueotogidi i 'isedi i miamiani, i 'isanuakalikaliedi bega yadi toviga i 'ive'atumaidi.
15 'Akonadi i lavia sai'afoga i na sidudubali, tovetutuyamavo i maia Iesu 'waineye i voneni i vo, 'Akonadi tutuya i ve'ale'usa wata de'e bei kebu tomotoginaga, bega 'aila'a 'u na vonedi i na nagoi 'atamana 'waidie taunidi 'adi'adi i na kimwane.”
16 Iesu i vonedi i vo, 'Asa'aiana i na miamiani, we'e 'omi 'ai'edi ava'ai 'wa na veledi i na 'ani.”
17 Tovetutuyamavo i vo, 'Waimeye 'ani'ani mwadodoudi 5 wata igana 'ailuga, 'asa'aiana bani'odi, kebu fuediga.”
18 Iesu i vo, 'Wa miedi 'waikuye.”
19 Tomotoga i vonedi mosomoso tabwadie i miabui, mulieta Iesu 'ani'aninidi i 'ewadi, i 'isalaka abame i vekaiwa Yaubada 'waineye. I vekaiwa i 'a'avana, 'ani'ani i 'ivividi tovetutuyamavo i veledi bega tomotoga i veutadi.
20 'Aila'anidi matatabudi i 'ani, kamodi i aidi, mulieta tovetutuyamavo tomotoga nikilidi i va'augidi bayawa 12 i veadagidi.
21 To'aninidi iaveta tulai'avadi i lu'iawawadi 'adi 'aila'a 5,000, we'e vevine tulaidi wata yavayavava matatabudi kebu taiadi i da lu'iawawadiga.
Iesu ufa tabwaneamo i nago
(Malika 6:45-56; Ioni 6:16-21)
22 Tomotoga i ve'anidi i 'a'ava, yana tovetutuyamavo i vonedi i vo, 'Wa na dodoga wakeye, ta na viwaia lavu vi'ainega, yau tomotoga a na vonedi i na nunagoi a na vemuli.”
23-24 Tomotoga i tauya i nunagoi we'e Iesu i laka 'oyeye, 'aiseneye i na velu'ui. 'Akonadi i laviotogi Iesu 'aiseotogina bei i miamia, we'e yana tovetutuyamavo i yogokamwana lavunina bwaikina 'waineye, kaukau toketokena i nunuga wata yagina i veveviladi.
25 Sai'afoga tutuya i na kililia, Iesu i le'wa 'waidie, ufa tabwaneamo i mimai.
26 Tutuyanina yana tovetutuyamavo i 'iseni i kololoyeni i bwau i vo, 'Wa 'isanaweni, yalua.”
27 Nika Iesu i vonedi i vo, Kebu 'wa na kolologa, yau taunida.”
28 Fita i vona-matayo'o i vo, Vetuma 'alo 'omu'e 'Auvea, 'u da vona ufa tabwaneamo a da wai 'waimuye.”
29-30 Iesu i vo, 'U mai.” Yana voneye Fita i obu i nunago Iesu 'waineye nika i 'isadaba kaukau wata yagina i 'isedi i kololo, i velamu i 'a'awakoluya i bwau i vo, 'Auvea, 'u da 'ita'ita'ieku.”
31 Nika Iesu nimana i 'otoi Fita i 'ive'avini i voneni i vo, Awale 'u venuanaluga, yamu vetumagana 'waikuye siaina.”
32 I silakai i 'a'avana 'adi 'ailuga i dodoga, nika yagina i 'awatagoni.
33 Yana tovetutuyamavo i 'iseni nika i 'odu i vo, Vona mogitana, 'omu Yaubada Natuna.”
Iesu toviga i 'ive'atumaidi 'atamana Genesaleta 'waineye
34 I duduna Genesaleta balebaleye bei yadi waka i yo'ei.
35 Tomotoga Iesu i 'isa'inanai bega vala i vetunedi 'awalawanina matatabuna 'waidie bega toviga i miedi Iesu 'waineye.
36 I velu'ui nuanuadi toviganidi i na 'abitonovidi, we'e 'ai'edi kebu, 'ana talauma mataifwa'avana i na 'abitonovi. Egavo i 'abitonovaga matatabudi i ve'atumai.