20
Vona-awatabai tofolova 'adi tutula faifaina
1 Iesu vona-awatabaiega i vonedi i vo, Yaubada yana 'Aila'a 'adi tutula 'ana 'ewa side bani'odi. Tamu tomogo ma yana bakula 'awa'awaiogose i tovoi i nago i lauala yana tofolova i na 'ewadi.
2 Tomotoga 'ifwaidi i veluagadi i vonedi i nogaya wata 'adi tutula i lu'ivona-vagaseni 'waidie i vo, Tutula 'aiata 'aitamogana 'ana 'etowava a na velemi,’ mulieta i vetunedi i nagoi i na folova.
3-4 Inala i vagalakama wata i nago 'atamanafouye tomotoga 'ifwaidi i veluagadi i mia-maimaiga bega i vonedi i vo, 'Omi wata 'wa na nagoi 'wa na folova yaku bakule, i na 'a'ava a na tutulimi yami folova 'ana laubwaina 'wainega.’
5 I nagoi i folofolova, mulieta 'aiata 'ana utukamwana 'waineye wata lavilavie, 'ifwaidi i veluagadi i vonedi i folova.
6 Lavilaviogose wata i nago 'atamanafouye, 'ifwaidi i veluagadi i miamiani bega i velutoliedi i vo, Awale 'wa mia-maimaiga, kebu tamu ava'ai 'asiau 'wa da 'i'idewaiga?’
7 Tomotoganidi i vo, 'Ai'edi tamu aitoi i da 'ewama 'waineye 'a da folova, fai kebu, begaidi 'a miamiani.’ Tonibakula i vonedi i vo, A nuani 'omi wata 'wa na nagoi 'wa na folova yaku bakule.’
8 'Akonadi sai'afoga i na dudubali, tonibakula tofolova 'adi to'isave'avina i voneni i vo, Tofolova 'u na goledi 'u na tutulidi, nagami egavo i vemuliga 'u na tutulidi, we'e egavo kumekumetana a 'ewadiga i na vemuli.’
9 Tofolovanidi lavilaviogose i 'ewadiga 'adi tutula i veledi 'aiata 'aitamogana 'ana 'etowava.
10 We'e kumanidiavo 'awa'awaiogose i velamu i folovaga i 'iseni yadi nuanua i vo, Tovemuli i folova tutuya 'ale'usana siwe 'aiata 'aitamogana 'ana 'etowava i 'ewai, we'e 'ima 'aiata matatabuna 'a folovaga 'ako bwaikina 'a da 'ewai.’ Siwe wata tutulanina i 'ewaga matatabudi i vesala.
11-12 'Adi tutula i 'ewa'a'avana, i vebonavoluvolu tonibakula 'waineye i vo, Vevemulidi i folova 'awasasa 'aitamogana, we'e 'ima 'aiata matatabuna 'a folova inala bwaikina 'waineye, awale 'ama tutula taiadi i vesala?’
13 Tonibakula tamu iadi i voneni i vo, Iaku, 'u ve'wada a na vonemu. Kebu a da vekaliemuga, 'asiau ta veifufuga 'u nuanuani a vo, Tutula 'aiata 'aitamogana 'ana 'etowava a na velemu,” ’ nika 'u awave'atumaieni.
14 'Akonadi a velemuga 'asa'aiana 'u na 'ewai 'u na nago yamu vanuge. Nuanuaku tofolova vevemulina 'ana tutula wata 'omu 'amu tutula taiadi i na vesala.
15 Yau tauniku yaku mani, yaku 'eba veimea. Kebu yaku nuakalikali mali tomotoga 'waidie faifaina 'wa na ve'unumagigi.”
16 Wata Iesu yana vona i luvaitugani i vo, Egavo 'asiau i vemuliga, 'awaie i na kumeta, we'e egavo 'asiau i kumetaga ma'itufa i na vemuli.”
Iesu yana vona 'ana vetonu yana wafa faifaina
(Malika 10:32-34; Luke 18:31-34)
17-18 Tutuyanina Iesu i nunago Ielusalema yana tovetutuyamavo 12 i vonedi taiadi tulidie i nagoi i vonedi i vo, A na vonemi, ta nunagoiga Ielusalema bei yau a vetomotogaotoga i na 'etogiluveku tovelomu yadi to'edakumetavo wata ve'etoboda 'adi tovevo 'waidie i na veimea a na wafa.
19 Mulieta i na 'aniveleneku mali tomotoga kumanidiavo kebu Diu 'waidie, i na sidibidibieku, i na toke i na fitaliku wata i na tutufwaseku 'ai lagalagana 'waineye. 'Aiata 'ana vetonu 'waineye, Yaubada i na sivetovoiku.”
Iemesa ma taina Ioni faifaidi inadi i velu'ui Iesu 'waineye
(Malika 10:35-45)
20 Tamu tutuya Sebedi yana vavine ma natudiavo i maia Iesu 'waineye, inadi ma yadi ve'ililibu i 'odu Iesu mataneye i velu'ui natudiavo faifaidi, Iemesa wata Ioni.
21 Iesu i velutoliedi i vo, Ava'ai nuanuami?” Vavinenidi i vo, Tutuyanina 'u na ve-Kini nuanuama side natukwavonidi 'u da tauyedi i da miabui tamu 'amu 'atagiega, we'e tamu 'amu wamayega.”
22 Iesu Iemesa ma taina i vonedi i vo, 'Omi kebu 'wa da venua'ivinaga 'wa vevelu'ui 'waikuye. Sai'afoga veviga 'ana vedi a na yemuyeni, we'e 'omi 'ami 'ailuga 'ami fata vedinina 'wa na yemuyeni?” Yana vona i tutuli i vo, E'e, 'ama fata.”
23 Iesu i vo, 'Wa vonaga mogitana, 'aku vediega 'wa na yemu, siwe miabui 'aku 'atagiega wata 'aku wamayega yau kebu a da veveimeyediga. Didiganidi Tamaku i 'idewadi egavo i venua'ivinediga faifaidi.”
24 Tutuyanina tovetutuyamavo 'adi 10 yadi velu'ui i 'asetai, i kamogala Iemesa ma taina 'waidie.
25 Begaidi Iesu matatabudi i va'augidi i vonedi i vo, 'Akonadi 'wa 'asetai toveimea bwaikidi wata to'edakumetavo yadi veimea toketokedi 'waidiega tomotoga i veveimeyedi.
26 We'e 'omi kebu bani'odi 'wa na munega. 'Ai'edi aitoi 'waimiega nuanuana i na vetomogo-bwaika, nagami i na vetofolova enavo 'waidie.
27 We'e 'ai'edi aitoi nuanuana i na veto'edakumeta 'waimie, nagami i na vetofolova-maimaiga 'waimie.
28 Yau a vetomotogaotoga 'wa na vetutuyameku. Yau a maiga, kebu a da vo, Tomotoga 'wa na foloveku,’ we'e mogitana a mai a na vetofolova tomotoga faifaimi wata yawaiku a na tauyeni tomotoga fuemi a na tuveobumi sakona 'waidiega.”
Tomatasako 'adi 'ailuga Iesu i 'ive'atumaidi
(Malika 10:46-52; Luke 18:35-43)
29 Iesu ma enavo 'atamana Ieliko 'wainega i tauya, tomotoga fueotogidi mulidie i nagoi.
30 We'e tomatasako 'adi 'ailuga 'edeye i miamiani, i nogai i le'wa i nunago, bega i vegolegole i vo, 'Auvea, 'omu Kini Devida tubuna, 'u da 'isanuakalikaliema.”
31 'Aila'a i nogai i talabodedi i vo, 'Wa ve'wada,” nika tomatasakonidi i toke i vegolegole i vo, 'Auvea, 'omu Kini Devida tubuna, 'u da 'isanuakalikaliema.”
32 Iesu i tovoi i goledi i maia i velutoliedi i vo, Ava'ai nuanuami a na 'idewai faifaimi?”
33 I vo, 'Auvea, nuanuama matama i da ve'atumai 'a da 'isa.”
34 Iesu i 'isanuakalikaliedi matadi i 'abitonovidi nika i 'anialadi, Iesu mulineye i nago.