22
Vona-awatabai tomotoganidi Yaubada i tayegidiga faifaidi
(Luke 14:15-24)
1-2 Wata Iesu i ve tomotoga 'waidie vona-awatabaiega i vo, Tomotoga yadi luku Yaubada yana 'Aila'a 'waineye side bani'odi. Tamu toveimea bwaikina natuna iavetana yana nagi 'ana sakali i 'idewai.
3 I 'idewadewa i 'a'avana yana tofolovavo i vonedi i vo, 'Wa na nagoi tomotoganidi a tayegidiga, 'wa na vonedi i na maia.’ I nagoi i vonevonediga nika i baila.
4 Mulieta toveimeanina yana tofolovavo 'ifwaidi i vonedi i vo, Tomotoganidi a vonedi i bailaga, wata 'wa na vonedi 'wa na vo, Bulumakau veve'anidi wata 'ifwaidi 'aisaya 'akonadi i lalamidi wata nani matatabuna i 'idewadi i lulukamata. 'Wa na maia sakalinina 'waineye.” ’
5-6 Siwe wata i baila i nagoi taunidi yadi nuanua 'waidie. Tamu i nago yana bakule, tamu i nago yana sitoa 'waineye, we'e 'ifwaidi toveimea yana tofolovavo i 'ive'avinidi i nikedi i wafa.
7 Toveimeanina vala i nogai i nuasako bwaikina, bega yana tolugaviavo i vonedi i nagoi to'ainikenidi i luvewafadi wata yadi 'atamana i kabuni.
8 I 'a'avana toveimeanina yana tofolovavo i goleva'augidi i vonedi i vo, 'Ani'ani 'akonadi a 'idewadewadi i lulukamata, siwe tomotoganidi a tayegidiga i baila, begaidi kebu i da lubwaineni i na mai.
9 Tutuya de'e 'wa na nagoi 'atamana bwaikina 'waineye bei egavo 'wa na veluagadiga 'wa na vonedi i na maia, yaku sakali 'waineye i na 'ani.’
10 Bega tofolovavo i nagoi 'atamane tomotoga fuedi i veluagadi, yadi sauluva 'atumaidi wata sakoidi matatabudi i vonedi i maia bega toveimeanina yana vanuga bwaikina i veadagi.
11-12 Tomotoganidi i lukulukuga vanuge, nagi 'ana talauma i veleveledi bega i vavaigavu, mulieta toveimeanina i mai i na 'isedi. Tamu tomogo i 'iseni, nagi 'ana talauma kebu i da vigavuyeni bega i velutolieni i vo, Iaku, 'omu kebu nagi 'ana talauma 'u da vigavuyeni, awale 'u lukuma?’ Tomogonina kebu tamu ava'ai i da voneyeniga.
13 Bega toveimeanina yana tofolovavo i vonedi i vo, Nimana wata 'agena 'wa yogonidi 'wa taweni i na obu dudubale, bei i na 'we'we'wela wata maigina i na yuyuyuya fai veviga bwaikina.’ ”
14 Iesu yana veifufu i 'a'ava i vo, Yaubada tomotoga fuedi i goledi, 'waidiega 'adi 'aivia bani'odi i venua'ivinedi we'e fuedi i vedumwe'ai'ai.”
Takesi 'ana yato faifaina Iesu i velutolieni
(Malika 12:13-17; Luke 20:20-26)
15 Totafalolo Falisi Iesu yana vona i nogai bega i nagoi 'aise'avadi i veifufu, nuanuadi i na velutolieni bonana i na nogai 'ai'edi i na vekali 'adi fata i na 'ive'avini.
16 Bega yadi tomotoga wata 'ifwaidi Kini Elodi yana tomotoga i vetunedi i maia Iesu 'waineye i velutoli i vo, Tove, yamu sauluva tonovidi, kebu 'u da vevekaliga. 'A 'asetamu tomotoga toketokedi kebu 'u da kololoyediga 'u totolimatanidi, we'e tomotoga sakoidi kebu 'u da vivieyediga, siwe 'u veve mogitana Yaubada yana nuanua tomotoga 'waimeye.
17 'U da nuani, i lubwaineda 'ida me Diu ta na takesi Loma yadi toveimea bwaikina Sisa 'waineye 'alo kebu? Nuanuama 'a na 'asetai.”
18 Iesu yadi nuanua sakoina i 'asetai begaidi i vonedi i vo, 'Omi tovekali, awale igodi 'wa sisiloloku?
19-20 Maninina 'wainega ta yatoyato takesi, 'wa na mieni ta na 'iseni.” Maninina i mieni i 'iseni i velutoliedi i vo, Mani de'e 'waineye, aitoi 'anununa wata 'ana wagava?”
21 I vo, Sisa.” Bega Iesu i vonedi i vo, Vetuma 'ai'edi ava'ai Sisa faifaina, 'wa na 'aniveleneni Sisa 'waineye, we'e ava'ai Yaubada faifaina 'wa na 'aniveleneni Yaubada 'waineye.”
22 Iesu yana veifufu i nogai, nuadi i voganidi nika i 'iawelovei.
Yawasa-vaitugana 'ana velutoli
(Malika 12:18-27; Luke 20:27-40)
23 'Aiatanina 'waineye, 'ifwaidi Diu totafalolo 'adi wagava Sadusi i maia Iesu 'waineye. Taunidi tovona igodina tomotoga kebu i na yawasa-vaitugana.
24 Tomotoganidi Iesu i velutolieni i vo, Tove, basenadiotoga Mosese yada veimea i kilumi i vo, 'Ai'edi tamu tomogo i na wafaga siwe kebu natunavoga, 'wabulina taina i na nagidi bega kwakwama i na vetubugidi tatana 'ana wagava wata 'ana wauma faifaidi.’
25 We'e 'ima basenadi yama 'atamana 'waineye tamu tomogo ma tainavo 'adi 'aila'a 7, tulaiotogina i nagi kebu tamu natunaga i wafa. 'Wabula yadi bwa i nagia.
26 Wata i wafa, 'adi vetonu yadi bwa i nagia, i nagoga taidiavo matatabudi 'wabulanidi taiadi i nagi siwe kebu tamu natudiavoga.
27 Tomotoganidi 7 i wafa'a'ava, mulieta 'eba ve'a'ava 'waineye vavine yawaidi i 'a'ava.
28 'Omi 'wa vonaga 'awaie towafa matatabudi i na yawasa-vaitugana, begaidi 'u na vonema, 'aiatanina 'waineye aitoi mogitana yana vavine, fai tomotoganidi 7 taiadi i nagi?”
29 Iesu yadi velutoli i tutuli i vo, 'Omi 'wa vekali mogitana fai Yaubada yana Buki wata yana toketokena 'wa bavuyedi.
30 Tutuyanina towafa i na yawasa-vaitugana, yadi sauluva bani'odi anelose abame, nagi kebu.
31-32 'Omi yami vona 'ana nogaya 'wa vo, Towafa kebu i na tovoi-vaitugana,’ siwe a na vonemi. 'Ai'edi Mosese 'ana kilukiluma 'wa da lu'iawawa-dewai 'wa da 'iseni Yaubada i vonavona 'waimie yawasa-vaitugana faifaina i vo, Yau Ebelamo, Aisake wata Iakobo yadi Yaubada.’ De'e bani'odi Yaubada i voneyediga fai tomotoganidi basenadiotoga i wafa siwe 'asiau ma yawaidi taiadi i miamiani. Begaidi ta na 'asetai egavo 'akonadi i wafa 'asiau ma yawaidi i miamiani, kebu tamu aitoi wafawafana Yaubada 'waineye.”
33 Tutuyanina 'aila'a Iesu yana ve i nogai nuadi i voganidi.
Veimea bwaikaotogina
(Malika 12:28-34; Luke 10:25-28)
34-35 Totafalolo Sadusi yadi velutoli Iesu i tutula-'atumaia bega kebu nuanuadi wata i na veifufu. Tutuyanina totafalolo Falisi i nogai, i va'auta iadi tamu i venua'ivineni, taunina ve'etoboda 'adi tove, i vetunei Iesu 'waineye. Nuanuadi i na velutolieni bonana i na nogai 'ai'edi i na vekali 'adi fata i na 'ive'avini.
36 I velutolieni i vo, Tove, veimeanidi Mosese 'wainega i maiga, ava'ai veimeaga mogitana bwaikina?”
37 Yana velutoli Iesu i tutuli i vo, 'Auvea yami Yaubada 'wa na nuakalikalieni mogitana nuamiega, 'anu'anunumiega wata yami nuanua 'waidiega.
38 'Asa'aiana veimeanina bwaikaotogina wata kumekumetana.
39 We'e 'ana veluga wata bwaikaotogina, emiavo 'wa na nuakalikaliedi taunimi 'ami nuakalikali bani'odi.
40 Veimea matatabuna i mai Mosese 'wainega wata Yaubada yana tolu'ivonavo yadi vona matatabuna, lamudi side veimeanidi 'ailuga.”
Velutoli Yaubada 'ana Venua'ivina faifaina
(Malika 12:35-37; Luke 20:41-44)
41-42 Totafalolo Falisi Iesu i tovififineni i velutoliedi i vo, 'Omi 'wa da nuaniga, Keliso kumanina Yaubada 'ana Venua'ivina tamana aitoi?” Yana velutoli i tutuli i vo, Kini Devida.”
43 Iesu i vo, Siwe awale 'Anu'anunu Magemagetana Devida i tolivetonoveni bega i ve'awa-Toveimea Keliso 'waineye? Devida i vo,
44 'Auvea i vona 'aku Toveimea 'waineye i vo,
Veimea a velemuga bega 'u na miabui 'aku 'atagiega,
i na nagoga 'amu gaviavo a na leodi bega 'u na veveimeyedi.” ’
45 Keliso mogitana Devida 'ana wauma 'wainega i souyeni siwe i vebwaika-'iaweni, begaidi Devida i ve'awa-Toveimea Keliso 'waineye.”
46 Kebu tamu aitoi 'ana fata Iesu yana vona i na tutuli, i ve'wadamo, wata 'awaie kebu i na vevelutolieniga fai i kololoyeni.