20
Miliama yawaidi i 'a'ava
1 Weta'i kumekumetana i le'wa 'waineye me Isileli matatabudi i le'wai Tini Sali'avu'avuye, Kadesi bei i mia. I miamiani Miliama yawaidi i 'a'avana bei i ve'ufadi.
Me Isileli i vona-vaitugana
2 We'e 'awalawanina bei i miamiaga, kebu ufanaga 'aila'a bwaikina faifaidi, begaidi tomotoga matatabudi i va'auta ma yadi kamogala i vona-vaitugana Mosese wata Eloni 'waidie.
3 Tomotoganidi Mosese wata Eloni i 'uvanidi i vo, I lubwaineni basenadi 'a da wafamo tatamavo taiadi tutuyanina 'Auvea mataneye i ve'alawafawafa.
4 Awale 'Auvea yana 'aila'avo 'u miema de'e sali'avu'avunina 'waineye bega yama 'aisayavo taiadi bei 'a na ve'alawafawafa?
5 Awale Itifitayega 'u vagavaima ta mai 'awalawa de'e sakoiotogina 'waineye, kebu 'eba bakula 'atumaidi bega kebu 'ana fata witi, 'ala'ai, kalefa wata 'ai-vuavuaga 'ana 'ani 'iwanina 'a na bakulaga. Wata ufa 'eba yemu kebu.
6 Begaidi Mosese wata Eloni tomotoga matatabudi i 'iawedi i nago Vadavada Tabutabuna 'awaneye, i lumata'afufu fwayefwayeye nika 'Auvea yana mageta mataududulina 'waidie i souyeni.
7-8 'Auvea Mosese i voneni i vo, Wautogana 'u na 'ewai, tatamu Eloni taiadi tomotoga matatabudi 'wa na goleva'augidi. Tomotoganidi matadie kileu bwaikina 'u na voneni bega ufa i na kausewa. De'e bani'odi ufa 'wa na sivemageseni kileunina 'wainega nika tomotoga matatabudi yadi 'aisayavo taiadi i na yemu.”
9 'Auvea yana voneye Mosese i nago wautogana i 'ewai Tutudaba Tabutabuotogina 'wainega.
Mosese kileu i nikei nika ufa i kausewa
10 Mosese wata Eloni tomotoga matatabudi i goleva'augidi kileu bwaikina manawaneye i vonedi i vo, 'Omi tovekamogaogala, 'wa ve'wada a na vonemi. 'Wa da nuani, i lubwainema ufa kileuyega 'a na sivemageseni 'wa na yemu?”
11 Mosese wautogana i silakai, yana 'ainike 'ailuga kileunina 'waineye nika ufa i kausewa i obu. Me Isileli matatabudi wata yadi 'aisayavo taiadi i yemu.
12 Siwe 'Auvea Mosese wata Eloni i vonedi i vo, Fai yami vetumagana i mwea, yaku 'atumaina wata yaku toketokena kebu 'wa da sivemageseni me Isileli 'waidie. Begaidi de'e tomotoganidi kebu 'u na kumesedi fwayafwayanina 'akonadi a velediga 'waineye.
Eloni yawaina i 'a'ava
23 'Oya Owa 'waineye, we'e me Idomu yadi fwayafwaya 'ana tugusa lilivaneye, 'Auvea Mosese wata Eloni i vonedi i vo,
24 Fai 'ami 'ailuga bonaku kebu 'wa da ve'ililibuyeni Ufa Meliba 'waineye, begaidi Eloni kebu i na luku 'awalawanina me Isileli a velediga 'waineye. Side bei yawaina i na 'a'ava tubunavo mulidie i na nago.
25 Bega Eloni wata natuna Eleasa 'u na lakavedi 'Oya Owa 'waineye.
26 Bei Eloni 'ana talauma 'eba velomu faifaina 'u na ta'ia ma'itufa natuna Eleasa 'u na veagei. We'e Eloni bei yawaina i na 'a'ava, tubunavo mulidie i na nago.”
27 Ava'ai 'Auvea Mosese i voneniga, nani matatabuna i 'idewadi. Tomotoga matatabudi i 'ise'isedi we'e 'Oya Owa 'waineamo i lakalaka.
28 Mosese Eloni 'wainega talauma 'eba velomu faifaina i ta'ia ma'itufa natuna Eleasa i veagei. We'e 'oyanina deba'aineye Eloni yawaina i 'a'ava, mulieta Mosese wata Eleasa 'oyayega i obuma.
29 Tutuyanina tomotoga matatabudi Eloni i 'isa'avai, 'aiata 30 nagedie me Isileli i vevemogai faifaina.