2
'Ida Keliso yana 'Aila'a
1 'Omi Yaubada natunavo begaidi i lubwainemi sauluva sakoidi matatabuna 'wa na bailaotogedi. Kebu 'wa na vekaliga, 'ai'edi tamu sauluva 'wa na tatalabodeniga kebu wata 'wa na 'idewaiga, kebu 'wa na ve'unumagigi wata kebu 'wa na vebonaivo.
2 Nuanuaku kwakwama mwedamwedalidi tamu yadi sauluva 'wa na vetutuyameni. Tutuya fuedi yadi nuanua bwaikina susu, faifaina i 'we'we'wela. 'Omi Yaubada yana Vona nuami i da 'ewai. I lubwainemi tutuya fuedi 'wa na lulu'iawawa, faifaina 'wa na nuanua wata 'wa na vevenua'ivina, 'waimie bani'odi susu bega 'wa na vetoketoke i na nagoga mulieta 'ita'ita'i 'wa na veluagai.
3 Vona mogitana, 'akonadi yada 'Auvea yana nuakalikali 'waimie 'wa lutonovi.
4 'Wa mimai Keliso 'waineye, taunina 'unututu miamia-vagaina, Yaubada yana Vanuga 'Eba Velu'ui nageneye. Tomotoga i vedumwe'ai'aieni siwe Yaubada i venua'ivineni i silakai, fai i nuakalikalieni.
5 'Omi wata bani'odi folova ma yawaimi, Yaubada yana vanuga 'waimiega i 'aiyogona 'Anu'anununa faifaina. Wata 'omi yana tovelomu magemagetami, Iesu Keliso 'ana wavagayega 'wa 'a'anivelena Yaubada yana 'eba sosoana 'ana 'odu'odu faifaina.
6 Fai Kelisonina faifaina Yaubada yana Buki nageneye i vo,
Tamu folova, yaku nuanua bwaikina a venua'ivineni,
a sisivetovoia Ielusalema 'waineye a na ve'unututuyeni.
Egavo yaku venua'ivinanina 'waineye yadi vetumagana i na yato-vagasedi,
kebu a na vedumwe'ai'aiediga, 'aivaita i na veluagai.”
7 'Omi Keliso 'wa vetumaganeniga, 'waimie folovanina nani 'atumaiotogina, we'e egavo i bailaga taunidi bani'odi to'aiyogona sakoidi. Tomotoganidi faifaidi i vo,
To'aiyogonavo folova tamu i 'iseni siwe i baileni,
tutuya de'e i ve'unututuyeni.”
8 Wata Keliso faifaina i vo,
'Unututunina tomotoga i na tayaidi,
'waineye i na be'u.”
'Waineye i na be'ube'uga, fai Yaubada yana vona kebu i da vematayakeyakeni, yadi vedumwe'ai'ainina basenadiotoga Yaubada i 'aseta-vagaseni bega i venua'ivinedi vematavuloga faifaina.
'Ida Yaubada yana tomotoga vevenua'ivinida
9 We'e 'omi kebu bani'odiga, fai Yaubada i venua'ivinemi yana 'aila'a. Taunina yami Kini 'wa vetovelomu faifaina, wata i yato'idiemi bega 'omi 'asa'aiana yana kukuafou. I vagavaimi dudubala 'wainega i miemi yana mageta 'atumaina 'waineye, bega ma yami subia 'wa na awa'ai'aia tomotoga matadie.
10 Nagami 'omi bani'odi nani-'avo'avovo,
'asiau Yaubada yana tomotoga mogitana.
Nagami Yaubada yana 'isanuakalikali 'waimie 'wa bavuyeni,
'asiau yana 'isanuakalikalinina 'wa veveluagai i 'ita'ita'iemi.
'Ida Yaubada yana tofolova-maimaiga
11 Ekwavo 'ida wakawaka de'e fwayefwayeye, yada 'atamana mogitana abame, begaidi a vevelu'ase'asemi kebu taunimi 'wa na tauyemi bunu 'ana nuanua sakoidi 'waidie fai nuanuananidi 'anu'anunumi 'adi gaviavo nuanuadi i na vetoketoke 'waimie.
12 I lubwainemi yami sauluva i na ve'atumai Yaubada 'ana tobavu 'awasasadie, bega tutuyanina i na awavesakoyemiga yami sauluva 'atumaidi i na 'isedi nika Yaubada i na subiai vonayavuga 'ana tutuya 'waineye.
13-14 'Omi 'Auvea yana tomotoga begaidi toveimea tulina tulina fwayafwaya de'e 'waineye yadi veimea 'wa na vevematayakeyakedi. 'Ami toveimea kabemani bwaikaotogina yana tofolovavo taiadi 'wa na veve'ililibuyedi, kumanidiavo i vetunedi tosakona i na vematavulogidi we'e egavo yadi sauluva 'atumaidi i na subiadi.
15 Tomotoga fuedi Yaubada wata Iesu Valana 'Atumaina i bavuyedi bega tutuya fuedi i awavesakoyemi. Yaubada nuanuana 'wa na vevesauluva 'atumaina bega toawavesakonidi yami sauluva i na 'isedi i na ve'wadamo.
16 Yaubada 'akonadi i 'etoyavumi sauluva tuatuaidi 'waidiega, yavuyavumi 'wa na miamia, siwe kebu tamu yami sakona 'wa na velubwasabwasai yami sauluva 'ivauna 'wainega. We'e mogitana taunimi 'wa na tauyemi Yaubada 'waineye 'wa na vetofolova faifaina.
17 Tomotoga matatabudi 'wa na veve'ililibuyedi, emiavo tovetumagana 'wa na nunuakalikaliedi, ma yami kololo Yaubada 'wa na vevematayakeyakeni wata yami toveimea bwaikaotogina 'wa na ve'ililibuyeni.
Keliso yana tokemaiga vita 'waidie, yada 'eba 'isa
18 'Omi 'ifwaimi 'wa vetofolova mali tomotoga 'waidie, i lubwainemi 'wa na vevematayakeyakedi wata 'wa na veve'ililibuyedi. We'e tomotoganidi i nuakalikaliemiga wata i 'ivaisemiga kebu 'aise'avadi 'wa na veve'ililibuyedi, tomotoganidi yadi veimea fa'alidi 'waidiega vita 'wa veveluagadi wata 'wa na veve'ililibuyedi.
19 Yami sauluvanina 'atumaina faifaina avinodi kebu 'wa da sakonaga, we'e vita 'wa na veluaga-maimaigidi siwe 'wa na tokemaigemi fai 'ami nuanua Yaubada 'waineye bwaikina.
20 Siwe 'ai'edi 'wa na tokemaigemi 'ainike 'waidie yami sakona faifaidi, tutulina ava'ai? We'e 'ai'edi yami sauluva 'atumaidi faifaidi i na nikemi bega 'wa na tokemaiga, Yaubada ma yana nuakalikali i na vesauluva 'atumaina 'waimie.
21 I lubwainemi 'wa na tokemaiga vita 'waidie fai naninina faifaina Yaubada i venua'ivinemi. Keliso veviga i veluagadi faifaimi yami 'eba 'isa, begaidi yana tokemaiga veviganidi 'waidie 'wa na vetutuyameni.
22 Kebu tamu yana sakonaga
wata kebu tamu tutuya 'awanega vekali i da souyeni.
23 Tomotoga i awavesakoyeniga,
kebu wata awavesakoyega bonadi i da tutuli.
Tomotoga vita i veleveleni,
siwe kebu i da ve'isakololo 'waidie.
Yana nuanua matatabuna i yatoi Yaubada nimaneye,
taunina yana veimea tonovina vonayavuga 'waineye.
24 Keliso 'aiseotogina yada sakona i 'ewadi tomogoneye
'ai lagalagana 'waineye i ve'a'avadi,
bega 'ada fata sakona ta na baileni 'wa da vo ta da wafa sauluvanidi 'waidiega,
wata ta na vevesauluva tonovina Yaubada mataneye.
'Ana kini'ona 'waidiega 'wa ve'atumai.
25 Basenadi 'wa mia 'ani'ie Yaubada 'wainega,
'omi bani'odi sifi vuyovuyodi.
Siwe 'asiau 'wa vilami 'ami To'isave'avina 'waineye,
'anu'anunumi 'adi Tolumadu'ai.