FILIFAI
Faulo yana kiluma me Filifai 'waidie
'Eba kiavemageta
Tutuyanina Faulo i miamia Loma vanuga yogona nageneye, lubulubu 4 i kilumidi. Lubulubunidi tovetumaganavo i miamianiga Filifai, Efeso wata Kolose faifaidi, we'e tamu Filimoni faifaina. Lubulubu de'e i kilumiga i vekaiwa me Filifai 'waidie yadi 'anivelena-maimaiga faifaina, 'anivelena-maimaiganina Efafilodaito nimaneye i yatoi i naweni Faulo 'ana 'aivaita.
Filifai tamu 'atamana 'ana wagava bwaikina 'awalawa Masidonia nageneye. Faulo yana lauvivila 'ana veluga 'waineye i nago Filifai be'ama Vala 'Atumaina i lu'ageyeni 'waidie nika tovetumagana tamu 'aila'a i souyeni. (Folova 16:12-40)
Tovetumaganavo i miamiani Filifai kebu 'aila'a 'aitamoganaga, 'aila'a tulina tulina wata kebu yadi mani bwaikidiga siwe i 'anivelena-maimaiga tovetumagana i vewekowekomaga Ielusalema nageneye, wata Faulo taiadi 'adi 'aivaita faifaina.
Faulo i miamia vanuga yogona nageneye siwe ma yana sosoana, wata nuanuana me Filifai i na sosoana 'ai'edi vita tulina tulina i na souyedi 'waidie. Faulo i veifufu 'waidie i na tokemaigedi wata tove-vekavekali faifaidi i matakia, kumanidiavo i lulukakadedi bunu 'aibobo faifaina. Wata nuanuana ma yadi nuaobu i na vevesauluva 'atumaina bani'odi Iesu yana sauluva. Lubulubu de'e 'wainega ta 'asetai Faulo ma yana nuakalikali tovetumaganavo Filifai 'waineye i nuanuanidi. Lubulubu de'e 'ana 'idi side bani'odi.
Vona-vekaiwa. 1:1-2
Me Filifai yadi veiana Faulo 'waineye faifaina i vekaiwa. 1:3-11
Faulo yana mia i lu'ivoneyeni. 1:12-26
Sauluvanidi tovetumaganavo 'adi laubwaina. 1:27-2:18
Faulo yana nuanua i 'idewai Timoti wata Efafilodaito faifaidi. 2:19-30
Sauluva tonovidi wata ve'ililide Keliso yana 'eda 'waineamo. 3:1-4:9
Faulo i vekaiwa yadi 'anivelena-maimaiga faifaina. 4:10-20
Faulo yana 'alanuai. 4:21-23
1
1 Emavo, yau Faulo iada Timoti taiadi Iesu Keliso yana tofolovavo, 'a vekaiwa 'waimie. 'Omi Yaubada yana tomotoga magemagetami, 'wa miamiani 'atamana Filifai 'waineye 'wa miave'itubama Iesu Keliso taiadi, 'ami to'isave'avinavo wata 'ami to'aivaitavo taiadi, 'waimie 'a kiluma.
2 'A vevelu'ui faifaimi nuanuama Yaubada Tamada wata 'ada Toveimea Iesu Keliso ma yadi nuakalikali i na vevesauluva 'atumaina 'waimie wata nuanua bikana mia 'atumaina taiadi i na velevelemi.
Faulo yana vekaiwa wata yana velu'ui me Filifai faifaidi
3 Tutuya fuedi a nuanuanimi nika a vevekaiwa yaku Yaubada 'waineye.
4 Ma yaku sosoana tutuya matatabuna a vevelu'ui faifaimi.
5 A sososoanaga fai tutuyanina 'wa vetumagana Iesu Keliso 'waineye i maiga 'asiau 'wa 'i'ivaiseku Valana 'Atumaina 'ana folova 'waineye.
6 A nuani mogitana Yaubada kumanina basenadi tamu folova 'atumaina i velamuya 'waimie, i na 'i'idewami i na nagoga Iesu Keliso yana Vila-vaitugana 'ana 'Aiata 'waineye i na ve'a'avai.
7 Tutuya fuedi ma yaku nuakalikali a nuanuanimi. A nuanuanimiga i lubwaineku fai 'omi 'wa 'i'ivaiseku folovanina Yaubada ma yana nuakalikali i velekuga 'waineye. 'Asiau a miamia vanuga yogona nageneye 'wa 'i'ivaiseku wata basenadi kebu a da lukuga yau Iesu Valana 'Atumaina 'ana tove'awa-mogitana wata 'ana tokiavefa'ala tomotoga 'waidie, bei wata 'wa 'ivaiseku.
8 Yaubada 'aku to'aseta, Iesu Keliso i nuakalikaliemiga, yau wata bani'odi a nuakalikaliemi.
9-10 A vevelu'ui faifaimi, nuanuaku yami nuakalikali tutuya fuedi i na vevebwaika, wata bani'odi 'aseta mogitana wata nuanua tonovina i na vebwaika i na nagoga bega 'ami fata sauluva 'atumai'avadi 'wa na vevenua'ivinedi. 'Ai'edi bani'odi 'wa na vevesauluvediga, tutuyanina Keliso i na vilaiga 'waineye, kebu tamu yami sakonaga wata kebu tamu nani faifaina i na vevitami.
11 Wata a vevelu'ui faifaimi nuanuaku yami sauluva 'atumai'avadi, sauluvanidi ta na 'i'idewadi Iesu Keliso yana toketokena 'wainega bega Yaubada 'ana subia wata 'ana awa'ai'ai i na veveluagai.
Yada mia fwayefwayeye, Keliso nani bwaikina 'waideye
12 Ekwavo, nuanuaku 'wa na 'asetai, vitanidi a veluagadiga Iesu Valana 'Atumaina faifaina, kebu 'ana 'eba ve'etobodaga, we'e mogitana vitanidi 'waidiega Valananina i vevebwaika tomotoga 'waidie.
13 Side bani'odi. Tomotoga matatabudi de'e bei wata toveimea bwaikina yana vanuga 'ana tolumadu'ai, yaku luku vanuga yogona nageneye lamuna i 'asetai, fai a vetofolova Keliso faifaina.
14 Wata fai a miamia vanuga yogona nageneye 'ada Toveimea Iesu 'ana tovetumaganavo fuedi yadi vetumagana i yatoi fa'alina 'waineye, bega ma yadi venuafoufa'ala i vevetoketoke Yaubada yana Vona i lalau'age kebu i da kolologa tove'isakololo 'waidie.
15-16 Mogitana, siwe 'ifwaidi i ve'unumagigieku wata i veve'ikwayekwayega nuanuadi 'adi wagava i na vebwaika bega Keliso faifaina i lalau'age. We'e 'ifwaidi yadi nuanua 'atumaidi 'waidiega i vetolau'age, taunidi tonuakalikali fai i 'asetai de'e folovanina Yaubada i veleku, yau Iesu Valana 'Atumaina 'ana toawave-mogitana.
17 Tove'unumagiginidi kebu mogitana taunidi i da tauyedi i na vetolu'ivona Keliso faifaina, we'e mogitana taunidi 'adi subia faifaina. Igodi nuanuadi 'aku vita de'e vanuga yogona nageneye i na 'imoso'ieni.
18-19 Kebu tamu ava'aiga, 'asa'aiana yau a sosoanamo fai 'eda'eda tulina tulina 'waidiega tomotoga Keliso valana i noganogai. I lalau'agega nuanua tonovina 'wainega 'alo 'adi subia faifaina siwe 'eba sosoana 'waikuye.
A sosoanaga fai a 'asetai yami velu'ui 'waidiega wata Iesu Keliso 'Anu'anununa yana 'aivaita 'wainega vanuga yogona 'wainega a na souyeku.
20 Wata a nuani mogitana kebu tamu yaku sauluva sakoina faifaina a na bunumayaga. We'e mogitana 'asiau wata tutuya matatabuna a na vevenuafoufa'ala bega yaku sauluva matatabuna 'waidiega Keliso 'ana subia i na veluagai, 'ai'edi ma yawaiku a na miamiaga 'wainega, 'alo a na wafaga 'wainega.
21 Yaku mia fwayefwayeye nani bwaikina 'waikuye Keliso, nika 'ai'edi a na wafaga, nani 'atumaiotogina 'waikuye.
22 'Ai'edi ma yawaiku a na miamiaga, yaku folova Keliso faifaina ma vuagina. Siwe a vevenua'ivina, i lubwaineni ma yawaiku a na miamia 'alo a na wafa?
23-24 Begaidi nuanuananidi 'adi 'ailuga i veve'iyo'eyo'eyeku. Nuanuaku bwaikina yawaiku i da 'a'ava fwayafwaya a da 'iaweni Keliso taiadi 'a da miamia, bei 'a da miamiaga 'atumaiotogina 'waikuye, siwe nani bwaikaotogina taiadi ta na miamia a na 'i'ivaisemi.
25 Fai a nuani mogitana ma yawaiku taiadi ta na miamia a na 'i'ivaisemi, nika yami vetumagana Keliso 'waineye i na vevetoketoke wata yami sosoana faifaina i na vevebwaika.
26 Tutuyanina a na vilaku 'waimie, yami sosoana faifaiku wata yami subia Iesu Keliso 'waineye i na vebwaika-'afo'afo.
Ta na vetoketoke Keliso faifaina
27 Ava'ai i na souyeniga 'waikuye nani siaina, we'e nani bwaikina ava'ai Keliso i voneyediga i lubwainemi yami sauluva taiadi i na vesala. Bani'odi 'wa na vevesauluvediga, bola a na wai a na 'isemi, 'alo 'ai'edi a na miamia vanuga yogona nageneye, siwe a na 'asetami 'ami vebae 'aitamogana 'wainega 'wa na tovotovoi fa'alina wata yami nuanua 'aitamogana 'wainega matatabumi 'wa na vevetoketoke, nika tomotoga 'ifwaidi i na vetumagana Iesu Valana 'Atumaina 'waineye.
28 Wata nuanuaku valami a na nogai, 'omi kebu tamu sai'afo 'wa da kolologa 'ami tovedumwe'ai'ai 'waidie, i vedumwe'ai'aiga fai 'wa vetumagana Iesu 'waineye. 'Ai'edi tutuya fuedi 'wa na vevenuafoufa'alaga, i na 'isemi i na 'asetai 'awaie Yaubada taunina yana toketokena 'wainega i na wafaotoga we'e 'omi 'ita'ita'i 'wa na veluagai.
29 Vona mogitana 'ita'ita'i 'wa na veluagai fai Yaubada ma yana nuakalikali i venua'ivinemi bega nani 'ailuga 'atumaidi 'wa na veluagadi. Tamu, 'wa vetumagana Keliso 'waineye, we'e 'ana veluga, i tauyemi faifaina veviga 'wa veveluagai.
30 Tutuya de'e ma fueda Keliso faifaina ta vevetafewa vita ta veveluagadi. Basenadi bani'odi 'wa 'ise'iseku ma yaku toketokena, we'e tutuya de'e wata valaku 'wa noganogai bola ma yaku tokemaiga a miamia vanuga yogona nageneye.