8
'Anu'anunu Magemagetana 'wainega yada mia i na ve'atumai
1 Iesu Keliso yana wafa 'wainega yada sakona 'adi tutula i evadi, begaidi tutuya de'e 'waineye egavo i miave'itubama Keliso taiadi, kebu vematavuloga i na veluagai.
2 Basenadi sakona i vetoketoke 'waimie 'ana tutula wafa, 'wa da vo sakona wata wafa i da yogonimi, we'e tutuya de'e Iesu Keliso i yavumi mia 'ivauna wata 'atumaina 'wa veluagai 'Anu'anunu Magemagetana yana toketokena 'wainega.
3-4 Basenadi tomogoda yadi nuanua ta 'i'idewadi bega kebu 'ada fata Yaubada yana veimea ta na vematayakeyakedi, 'ako ta da vematayakeyakediga ta da ve'atumai Yaubada mataneye. We'e tutuya de'e Yaubada i 'ive'atumaida bega yada sauluva tonovina mataneye, fai taunina Natuna i vetunei i vetomotogaotoga 'ida tosakona bani'odi, siwe kebu i da sakonaga, yana wafa 'wainega yada sakona i 'u'umidi. Yaubada yana veimea matatabuna tonovidi, i lubwaineda ta da vematayakeyakedi, siwe fai kebu, 'ana tutula wafa. We'e Natuna tomogonega tutulanina i evai i wafa faifaida nika Yaubada mataneye yada sauluva matatabuna i tonova, 'wa da vo veimea matatabuna ta da vevematayakeyakedi. Tutuya de'e 'Anu'anunu Magemagetana yana nuanua ta 'i'idewadi, ma'itufa tomogoda yadi nuanua sakoidi ta bailedi.
5 Egavo yadi nuanua i tauyedi tomogodi yadi nuanua sakoidi 'waidie, nuanuananidi tomogodi 'waidie i veveimeyedi. We'e egavo yadi nuanua i tauyedi 'Anu'anunu Magemagetana yana nuanua 'waineye, nuanuananidi 'Anu'anunu Magemagetana 'wainega i veveimeyedi.
6 'Ai'edi 'Anu'anunu Magemagetana yami nuanua i na veveimeyediga, mia 'ivauna wata 'atumaina 'wa na veveluagai wata Yaubada taiadi 'wa na veveiana. We'e 'ai'edi tomogomi yami nuanua i na veveimeyediga 'wa na wafaotoga.
7 'Wa na wafaotoga fai 'ai'edi aitoi taunina i tauyeni tomogona yana nuanua sakoidi 'waidie i vegavia Yaubada 'waineye. Tomogonina Yaubada 'ana gavia fai kebu nuanuana Yaubada yana veimea i na vematayakeyakedi wata mogitana kebu 'ana fata i na ve'ililibuyedi.
8 Egavo tomogodi yadi nuanua sakoidi i veveimeyediga, kebu 'ana fata Yaubada i na sosoana faifaidi.
9 We'e 'omi, 'ai'edi 'Anu'anunu Magemagetana i agemi 'waimie i miamiaga, tomogomi yadi nuanua kebu i da veveimeyemi, we'e mogitana Yaubada 'Anu'anununa i veveimeyemi. 'Wa na nuani, 'ai'edi aitoi Keliso 'Anu'anununa kebu i da ageiga, kumanina kebu Keliso yana tomotoga.
10 Avinodi tomogomi i na wafa sakona 'wainega, siwe fai Keliso i agemi 'waimie i miamia, 'Anu'anunu Magemagetana mia 'atumaina wata miamia-vagaina i velevelemi fai Yaubada i 'ive'atumaimi yami sauluva tonovina mataneye.
11 Yaubada 'Anu'anununa kumanina Iesu i sivetovoia wafayega, i agemi 'waimie i miamia. Yaubada Iesu Keliso i sivetovoia wafayega wata bani'odi 'awaie tomogomi 'a'a'avidi i na sivetovoidi wafayega 'Anu'anununina i agemiga 'wainega.
'Ida 'Anu'anunu Magemagetana i agedaga Yaubada natunavo
12 Ekwavo, fai 'Anu'anunu Magemagetana 'waimie i miamia, i lubwainemi yana nuanua 'wa na 'i'idewadi, we'e kebu i da lubwainemi tomogomi yadi nuanua 'wa na vematayakeyakedi.
13 'Ai'edi tomogomi yadi nuanua sakoidi 'wa na 'i'idewadiga 'awaie 'wa na wafaotoga, we'e 'ai'edi 'Anu'anunu Magemagetana yana toketokena 'wainega yami sauluva sakoidi 'wa na bailedi 'wa da vo 'wa da luvewafadi, nika yami mia i na ve'atumai mia-vagata 'wa na veluagai.
14 Egavo Yaubada 'Anu'anununa i kumekumesediga, kumanidiavo Yaubada natunavo.
15 'Anu'anununina Yaubada i velemiga kebu ve'isakololoyega i da veveimeyemi. We'e ma'itufa 'Anu'anununa i agemi nika Yaubada i fayayemi bega 'omi natunavo mogitana. 'Anu'anununina yana 'aivaita 'wainega ta vevegole ta vo, Ie Tamaku.”
16 Ta 'asetai 'ida Yaubada natunavo fai 'Anu'anununa i ve'awamogitana 'anu'anunuda 'waidie.
17 Fai 'ida Yaubada natunavo, 'ai'aiwabunidi magemagetadi i 'eno'enoviga natunavo faifaidi, 'awaie i na veleda, we'e 'ai'aiwabunidi i 'eno'enovi Keliso faifaina, wata ma fueda taiadi i na veleda. Mogitana i na veleda siwe i lubwaineda nagami vitanidi Keliso i veluagadiga wata bani'odi ta na veluagadi faifaina, mulieta Keliso taiadi 'ai'aiwabunidi magemagetadi ta na veusedi.
'Awaie Yaubada natunavo 'ai'aiwabu i na veluagai
18 Vitanidi tutuya de'e ta veveluagadiga Keliso faifaina mogitana bwaikidi, we'e 'ai'aiwabu magemagetadi 'awaie ta na veluagadi Yaubada 'wainega nani bwaikaotogina. Vitanidi faifaidi kebu ta na nuanua.
19 Yaubada 'ana 'idewadewa matatabudi i lulukamata nuanuadi bwaikina 'ana tutuya 'waineye Yaubada natunavo i na sivemagesedi.
20-21 I lulukamata fai basenadi bei Adama i sakona Yaubada 'ana 'idewadewa i 'alatabutabudi i venani-'avo'avovo. 'Ana 'idewadewanidi kebu taunidi i da venani-'avo'avovo siwe fai Yaubada nuanuana. Yaubada yana veimeanina 'wainega nani matatabudi i sakosako wata i wafawafa, siwe tutuyanina i 'alatabutabudiga bei i 'asetai 'awaie i na 'ive'atumaidi. 'Ida Yaubada natunavo fwayafwaya 'ana vita i yogonida siwe 'awaie i na yavuda yana 'ai'aiwabu magemagetadi i na veleda, wata bani'odi, 'ana 'idewadewa matatabudi i na yavudi i na ve'atumaiotoga.
22 Yaubada i 'alatabutabudiga i maiga 'asiau tomotoga, 'aisaya, mosomoso wata nani fuedi i veveviga wata i wafawafa 'wa da vo i da taidaida, bani'odi tamu vavine kwamana i tubutubuga i tataidaida.
23 Kebu 'ana 'idewadewa 'aisedi i da tataidaida wata 'ida yana tomotoga ta tataidaida. Avinodi Yaubada 'Anu'anununa i tauyeni i ageda, 'Anu'anununina yana 'anivelena 'waideye kumekumetana, siwe ta lulukamata ta tataidaida ta vo, Aioe, Yaubada i da yavuda sakona wata vita 'waidiega.” Yaubada i fayayeda siwe ma yada vetumagana ta lulukamata 'awaie 'ida natunavo 'ada veuveuta i na veleda wata tomogoda i na 'ive'ivaudi.
24 Basenadi ta vetumagana ta nuani mogitana 'awaie ta na luku Yaubada yana 'Aila'a nageneye, bega vetumagananina 'wainega 'ita'ita'i ta veluagai. Fai naninina 'akonadi ta veluagai, begaidi kebu 'ana fata ta na lulukamaseni.
25 We'e 'ai'edi ta na vetumagana tamu nani faifaina siwe bola kebu ta da 'iseniga, ma yada tokemaiga ta na lulukamaseni.
26 Wata 'ida yada nuanua mweadi, siwe 'Anu'anunu Magemagetana i 'i'ivaiseda. 'Ai'edi Yaubada nuanuana naninina faifaina ta da velu'ui, siwe kebu ta da 'asetai, we'e 'Anu'anununina ve'awagusi 'waidiega i vevelu'ui faifaida.
27 Tamada yada nuanua i 'aseta'a'avadi wata 'Anu'anununa Magemagetana yana vona i noganogai, fai 'Anu'anununina i vevelu'ui 'ida Yaubada yana tomotogavo faifaida, Yaubada taunina yana nuanua 'ana laubwaina 'wainega.
28 Wata 'ida Yaubada ta nuakalikalieniga ta 'asetai nani matatabuna i na souyedi 'waideye, taunina i na siviladi yada 'atumaina faifaina, 'ida tomotoganida i venua'ivineda ava'ai i nuaniga faifaina.
29 Fai basenadiotoga egavo nagami Yaubada i 'asetadi wata i venua'ivinedi bega i na vetuli Natuna bani'odi, we'e Natunanina kumanina tubu'edakumeta tainavo wata novunavo taiadi i na miamia.
30 Tomotoganidi Yaubada i venua'ivinediga wata i goledi bega i na nagoi 'waineye. Kumanidiavo i golediga i 'ive'atumaidi bega yadi sauluva tonovina mataneye. Wata kumanidiavo i 'ive'atumaidiga Yaubada taunina yana 'ai'aiwabu magemagetana i veledi.
Yaubada yana nuakalikali 'waideye ta veluagai Iesu Keliso 'wainega
31 Yaubada yana 'anivelena 'atumaiotogidi 'ida yana tomotoga 'waideye a veifufuyedi, nuanuaku ta na nuanuanidi. Fai Yaubada nuanuana 'ida, kebu tamu aitoi 'ana fata i na vetoketoke 'waideye.
32 Kebu nuana i da loloiga, Natuna i 'aniveleneni i wafa matatabuda faifaida. Natuna 'akonadi i veleda, siwe wata nuakalikali tulina tulina i na veleveledamo.
33 'Ida Yaubada yana tomotoga vevenua'ivinida, kebu tamu aitoi 'ana fata i na vevitada sakona faifaina fai Yaubada tauniotogina i 'ive'atumaida yada sauluva tonovina mataneye.
34 Wata kebu tamu aitoi 'ana fata i na veimea vematavuloga ta na veluagai yada sakona faifaina, fai Iesu Keliso yana wafa 'wainega 'ada vematavuloga i tovoieni. Wafanina 'wainega Yaubada i sivetovoia, 'asiau ma yana veimea Yaubada 'ana 'atagiega i miabui i miamia i vevelu'ui faifaida.
35 Wata kebu tamu ava'ai 'ana fata i na ve'idi'idieda Keliso yana nuakalikali 'wainega. 'Ai'edi vita tulina tulina i na souyedi 'waideye bani'odi veviga, mali tomotoga i na vesauluva sakoina 'waideye Keliso faifaina, 'ai'edi ta na lase, ta na ve'ale'usa tomogoda 'adi talauma faifaidi wata 'ai'edi tomotoga nuanuadi i na luvewafada, vitanidi de'e kebu 'ana fata i na ve'idi'idieda Keliso yana nuakalikali 'wainega.
36 Vitanidi faifaidi basenadiotoga i kilumi Yaubada yana Buki nageneye i vo,
Yaubada, fai 'ima yamu tomotoga, bega 'aiata matatabuna 'waidie, 'amu tovedumwe'ai'ai nuanuadi i na luvewafama.
'Ima 'wa da vo 'aisaya i da vunugidi 'adi luvewafa faifaina.”
37 Vitanidi kebu 'adi fata i na ve'idi'idieda kumanina i nuakalikaliedaga 'wainega, we'e mogitana 'ada tonuakalikalinina 'wainega ta vevetoketoke-'afo'afo nani matatabuna 'waidie.
38 A nuani mogitana 'ai'edi ma yawaida 'alo ta na wafa kebu tamu nani 'ana fata i na ve'idi'idieda Yaubada yana nuakalikali 'wainega. Wata bani'odi anelose, yaiaina, naninidi 'asiau i 'eno'enovi, naninidi 'awaie i na souyedi wata towafa yadi 'eba mia yana toketokena kebu 'adi fata i na ve'idi'idieda.
39 Kebu tamu nani tabwaotoginega, dibuotoginega wata Yaubada 'ana 'idewadewa matatabuna 'waidiega 'ana fata i na ve'idi'idieda yana nuakalikali 'wainega. Yaubada yana nuakalikalinina 'waideye bwaikaotogina, 'ada Toveimea Iesu Keliso i sivemageseni 'waideye.