12
Vavine wata wayo'o yamoyamoina
1 Wata a 'isanago abame tamu 'eba 'isa i souyeni nuaku i 'ewai. A 'iseni tamu vavine, 'adi talauma mataududulina bani'odi inala, 'unu'unudie kunabanaba 'ubwana 12 taiadi, yadi veimea 'ana 'eba 'isa, wata weta'i tabwaneye i tovotovoi.
2 A 'isedi sai'afoga i na venatuna bega i toke i 'we'we'wela, fai veviga bwaikina.
3 Wata abame tamu 'eba 'isa i souyeni. Nika tamu wayo'o yamoyamoina a 'iseni, bwaikina wata kasikasisina. 'Unu'ununa 7 'waidie kunabanaba 7 toveimea 'adi vaigavu, we'e ala 10 'edu'edudie.
4 Giunega 'ubwana fuedi i sita'idi i obu fwayefwayeye. 'Ubwana vi'ai 'ailuga 'atumaidi i 'eno'enovi, vi'ai 'aitamogana i nikedi. Vavinenidi sai'afo i na venatuna lilivadie wayo'o yamoyamoina i tovotovoi, nuanuana natudi i na 'ani-matayo'oi.
5 I venatuna kwamana iavetana i tubuga, kumanina ma yana toketokena tomotoga 'adi 'aila'a tulina tulina i na veveimeyedi. Wayo'o yamoyamoina igodi kwamananina i da ovai nika Yaubada yana veimea 'wainega tamu aitoi i sieloi i vagavaia i naweni Yaubada 'waineye, kumanina 'ana didiga 'ai'aiwabuna 'waineye i miamia.
6 Vavine i dega i nago sali'avu'avuye fai bei Yaubada yadi 'eba mia basenadi i 'idewai. Bei i na miamia i na 'i'isave'avinidi 'aiata 1,260 nagedie.
7 Vavinenidi i dega i nago, mulieta gavia i velamu abame. Tamu anelose bwaikina 'ana wagava Maikeli ma yana anelosevo wayo'o yamoyamoina ma yana 'aila'a taiadi i vetalaga.
8-9 Maikeli ma yana anelosevo i vetoketoke we'e wayo'o yamoyamoina ma yana 'aila'a Yaubada kebu i da tauyedi bega i na miamia abame, begaidi i sogiedi i obuma fwayefwayeye. Wayo'o yamoyamoina kumanina 'o'olo tuatuaina, taunina Seitani tamu 'ana wagava Diabolo tomia fwayafwaya matatabudi i vevekaliedi.
10 A 'iseni i obu fwayefwayeye, nika bona bwaikina a nogai abamayega i vonavona i vo,
'Asiau Yaubada nani matatabuna 'waidie i vetoketoke,
i 'ita'ita'i wata i veveimea.
Yaubada veimea i 'aniveleneni Keliso 'waineye, kumanina 'ana Venua'ivina.
I vetoketokega fai Seitani i sogieni abamayega.
Kumanina i tovotovoi Yaubada mataneye
lovana wata 'aiata edavo tovetumagana i vevevitadi sakona faifaidi.
11 Tomotoganidi Seitani 'waineye i vetoketoke Keliso dayaginega,
taunina Yaubada yana Sifi Siaina, yawaina i tauyeni i wafa tomotoga faifaidi.
Wata edavo i vetoketoke fai Yaubada yana Vona tonovina i lu'ivona tomotoga 'waidie,
kebu yadi mia faifaidi i da nuanua, taunidi i tauyedi wafa 'waineye.
12 'Omi tomia abama 'wa na sosoana
fai Yaubada i vetoketoke.
We'e 'omi fwayafwaya wata eyaga 'adi tomia, nuakalikalimi vita 'wa na veluagadi
fai Seitani i obuwa nuanuana vita bwaikina i na velemi.
I nuasako-'afo'afo
fai i 'asetai yana tutuya 'ale'usana.”
13 Wayo'o yamoyamoina i obuma fwayefwayeye, i 'asetai Yaubada i vetoketoke begaidi vavine i sogiedi, kumanidi kwamana iavetana i venatuneni.
14 Igodi i da 'ive'avinidi siwe Yaubada manubutu bwaikina fafena 'adi 'ailuga vavine i veledi bega i yavega i nago yadi 'eba mia nonogina sali'avu'avu 'waineye, bei malamala 'aitonu wata sai'afo nagedie i na 'i'ita'ita'iedi wayo'o yamoyamoina 'wainega wata i na 'i'isave'avinidi.
15 Wayo'o yamoyamoina 'awana i o'ei ufa bwaikina i souyeni nuanuana vavine i na bewedi i na wafa.
16 Igodi i da luvewafadi, siwe fwayafwaya i 'anifuai vavine i 'ivaisedi ufanina matatabuna i susula.
17 Wayo'o yamoyamoina i nuasako bwaikina vavine 'waidie, bega i nago natudiavo 'ifwaidi taiadi i na vetalaga, kumanidiavo Yaubada yana veimea i vevematayakeyakediga wata Iesu faifaina i lulu'ivona.
18 Bega wayo'o yamoyamoina i nago balebaleye bei i tovotovoi i lulukamata.