7
Me Isileli 'ifwaidi tugusa i na 'ewadi Yaubada 'wainega
1 Mulieta anelose 'adi 4 a 'isedi fwayafwaya i tovififineni, kaukau matatabudi i tatalabodedi bega kebu i na nunuga eyage, fwayefwayeye wata welavi lukudi kebu i na feto.
2 Wata tamu anelose a 'iseni inala yana 'eba lakayega i souyeni, nimaneye Yaubada miamia-vagaina yana tugusa yana tomotoga faifaidi. I toke i vegole anelosenidi 4 'waidie, kumanidiavo Yaubada toketokena i veledi bega fwayafwaya wata eyaga i na 'ivesakoidi.
3 I vegole 'waidie i vo, Fwayafwaya, eyaga wata welavi kebu 'wa na 'ivesakoidi, 'wa na lulukamata nagami yada Yaubada yana tofolovavo 'adi tugusa 'a na yatodi debadie.”
4-8 Tugusa i yatodi i 'a'ava mulieta i voneku 'adi 'aivia tomotoga 'waidie Yaubada yana tugusa debadie i yatodi. Me Isileli tomotoga wauma 'aitamogana 'aitamogana tugusa i 'ewadiga, 'adi luvetubama 144,000.
Iuda 'ana wauma 'wainega tomotoga 12,000 'waidie tugusa i yatodi.
Lubeni 'ana wauma 'wainega tomotoga 12,000 'waidie tugusa i yatodi.
Gada 'ana wauma 'wainega tomotoga 12,000 'waidie tugusa i yatodi.
Asa 'ana wauma 'wainega tomotoga 12,000 'waidie tugusa i yatodi.
Nafitalai 'ana wauma 'wainega tomotoga 12,000 'waidie tugusa i yatodi.
Manasa 'ana wauma 'wainega tomotoga 12,000 'waidie tugusa i yatodi.
Simioni 'ana wauma 'wainega tomotoga 12,000 'waidie tugusa i yatodi.
Livai 'ana wauma 'wainega tomotoga 12,000 'waidie tugusa i yatodi.
Isaka 'ana wauma 'wainega tomotoga 12,000 'waidie tugusa i yatodi.
Sebuloni 'ana wauma 'wainega tomotoga 12,000 'waidie tugusa i yatodi.
Iosefa 'ana wauma 'wainega tomotoga 12,000 'waidie tugusa i yatodi.
Beniamina 'ana wauma 'wainega tomotoga 12,000 'waidie tugusa i yatodi.
Side waumanidi 'waidiega me Isileli matatabudi 144,000 'waidie Yaubada yana tugusa i yatodi.
'Aila'a fueotogidi Yaubada i subisubiai
9 Me Isileli 'adi tugusa i yatodi i 'a'ava, nika wata a 'isedi 'aila'a fueotogidi, lu'iawawa-wayoga. Tomotoganidi i maia 'aila'a 'aitamogana 'aitamogana 'waidiega, mali bonana 'waidiega, tomotoga tulina tulina, 'awalawa 'aitamogana 'aitamogana 'waidiega. Matatabudi 'adi talauma 'avu'avudi i ve'wesenedi wata nimadie saisai lukudi, i tovotovoi Yaubada 'ana didiga 'ai'aiwabuna wata yana Sifi Siaina matadie.
10 Tomotoganidi i toke i vegole i vo,
Yaubada, kumanina didiga 'ai'aiwabuna 'waineye i miamiaga, wata yana Sifi Siaina
'akonadi i 'ita'ita'ieda.”
11-12 Anelose matatabudi, to'isave'avinavo wata nani ma yawaidi toketokedi 4, didiganina 'ai'aiwabuna i tovififineni. Matatabudi i lumata'afufu Yaubada mataneye i 'odu i vo,
Vona mogitana yada nuanua side bani'odi.
Yaubada i lubwaineni subia, 'ai'aiwabu, 'aseta, vekaiwa,
ve'ililibu, veimea wata toketokena i na veveluagadi,
kebu i na 'a'ava, i na 'eno-vagata.
'Asa'aiana yada nuanua bani'odi.”
13 Tamu to'isave'avina i velutolieku i vo, Kumanidiavo 'adi talauma 'avu'avudi 'u da 'asetadi egavo wata ava'aiega i maia?”
14 Bonana a tutuli a vo, 'Auvea, yau kebu a da 'asetadiga, 'u da voneku.”
Nika i voneku i vo, Tomotoganidi i maia vita wata veviga bwaikaotogina 'ana tutuya 'wainega. Iesu yana wafa 'wainega yadi sakona i 'ewayavuledi, 'wa da vo 'adi talauma Sifi Siaina dayaginega i da lekoadi bega 'avu'avudi.
15 Begaidi Yaubada 'ana didiga 'ai'aiwabuna mataneye i tovotovoi,
'aiata wata lovana i folofolova yana Vanuga 'Eba Velu'ui nageneye.
Kumanina didiga 'ai'aiwabuna 'waineye i miamiaga,
taunina yana toketokena 'wainega i na 'i'ita'ita'iedi.
16 Kebu tamu tutuya i na lase 'alo 'anigodi i na lala,
inala 'alo yauyauta bwaikina 'waidiega kebu i na veviga.
17 Fai Sifi Siaina, kumanina didiga 'ai'aiwabuna kamwaneye i miamiaga,
i na 'i'isave'avinidi bani'odi to'isave'avina sifi yana 'aisaya i 'i'isave'avinidi.
I na nunawedi ufa-luluvuala 'waidie, ufanina 'wainega mia 'atumaina wata 'ivauna i sousouyeni,
wata Yaubada nuadi i na 'iveoloolodi nika kebu tamu tutuya i na 'we'welaga.”