22
Wonong Awani Ye Orokbon Kuruwak Weng
(Lk 14:15-24)
1 Kwane, Yesumbed angkon kuruwak wengiib yi yaa daandoon,
2 “Godbed korok kere ooni yeman kuu kwamune areb. King maa kumbed ye dana wonong awani ye orok nekwoon.
3 Nekwekore, ye demedan yedmendoona wene yangkodmia anuk daandoon yaa yedme yedme kamenmo yariwen. Kumban yi dowakenban korondiwen.
4 Kwane, ika ye demedan yenayiib ben yedmendoon, ‘Orok ari minime andaandan yaa kuu minime andime. Buromakau kowiib yeekori bungeni mengkanabeni animan amun amun nekwe dang keraan kowe, wonong orokbon kuu minime andime.’ andoon.
5 Kumban ma wengambere winindo, wunesariwen. Kwane, wunesarenib karub maambed koronde ye mongkobon angka wene ye deme awinoone, maa ye od deme awinoone kamiwen.
6 Yena korondenib yaro dore demedan awingkenib ben arewa arewa kamenib yenbandiiwe yoworiwen.
7 “Kwane, king kuu wengamberekore, arud darewoob wandekore, ye ana nangmidan benkiraroone menenib yenbandiwendan kuu yeene nongkobenib yi tauniib amot kowiiwe denobeen.
8 Kwamunekore, kingbed ye demedan yaa yedmendoon, ‘Wonong awani orokbon kuu nekwaan, kumban karub nembed daandaan kuu arewadan kowe,
9 kwane wenenib, kiwaan ari bendom bendom yaa wenenib kane kane wedmaniib yaa kuu “Menebenib orok animan anime.” ande dakmenmo yarime.’ andoon.
10 Kowe, kwane ye demedan kiwaan maa maa ari wenebenib, karub kane amun arewa ogood wedmiwen kuu benminiiwe orok animan ambib kuu diireen.
11 “Kumban king dawuro mene wedmoonka, karub maa wonong awani ye orok ani ye ebkadiib inwarindombed dibeen.
12 Kowe, kwane kaamonenoon, ‘Angkodmi, komarewa kereneb kemaom kee wonong awani orok ani ye ebkadiibban awunewen?’ andoon. Andoona, karub kuu kumunmo wengiib andiyiibban kwane no diboroon.
13 Kwane, kingbed ye demedan yaa yedmoon, ‘Karub kee ye yoniib dingkiyiib nongbed yenbime. Kwane kan bunangka kumun yiri korarime, kumun yiri kurimbed dobere amengiib durud yewed ye ningkambo kabangiib kame doborok.’ ” andoon.
14 Andekore, Yesumbed ika yedmoon, “Kedi, nimakarub yemoon yaa minime ande baandoon kumban yemoonban kuu kinekore boon.” andoon.
Saesaa Yaa Tak Od Nongkobi
(Mk 12:13-17, Lk 20:20-26)
15 Kwane, Farisidan dangkuro nedbe dorenib inamen nekwanib Yesu birone kobkandunande kamiwen, Yesumbed weng arewa ande andiwed.
16 Kwani kowe, yimbed yi kedmengkandiibdaniib King Erod dabokniwendaniib benyuriiwa miniwen, Yesu yaa. Mene yedmiwen, “Kedmengkandi korok, nub nubkaad, eb kuu anammo dakmi ye karub, dudimokban, angkon eb kuu God yaa dobiri amun ye kiwaan anammo kedmengkandimaab. Eb kuu karub yaa manmo kerimokban, amborom kuu eb kuu yi yaa kane ande ambengkaabban kowe.
17 Kwana kowe, nub yaa yedmende, ebbed meeneeb kuu tak od Saesaa yaa kowi kuu yorokmo yeman dee arewa dee?” andiwen.
18 Kumban Yesu kuu yi bironandamiib kuu wedmendeen kowe yedmoon, “Yiib kuu aadidmidan kii! Yiib komande ne yaa komboon kaamowiib?
19 Kwana kowe, tak od kowimaib ye od murubkob kuu kankorokbewiiwo wedma.” andoon. Andoona, od murubkob denarius mimo kanminiwen.
20 Kanminiiwa, Yesumbed kaamondoon, “Kane ye korok kuruwakiib aningkoyiib?” andoon.
21 Andoona, yimbed inandiwen, “Saesaa yeman kui.” andiwen.
Kwanandiiwe, Yesumbed yedmoon, “Saesaa yeman keroka Saesaa yaa bangkanime. God yeman keroka God yaa bangkanime.” andoon.
22 Kwane, yi kuu wengamberekorib binangkiwen. Binangkekorib, kwane Yesu yaa koronde winiwen.
Sedyusidanbed Yesu Bironande Kamiwen
(Mk 12:18-27, Lk 20:27-40)
23 Kuyaronki kuu Sedyusidanbed Yesu yaa kaamonenok miniwen. Sedyusidanbed yedmimaib kuu karub bobnimaib kuu dembimokban andimaib. Kwane menenib Yesu yaa yedmiwen,
24 “Kedmengkandi korok, kurin kuu Mosesbed nub yaa amob ande kowoon kuu kei, kwane karub maa wonong awanekore ye danayiibban bobnaneen kuu wonong irib kuu ye damanbed awane dana woonaneen kuu ayi bobnoon kuye dana ande kowi yeman.
25 “Kwane, karub ayi neredkan ediib dobiriwen nub yoom. Kwane ayidin wonong awanekore, ye danayiibban bobnoon. Kwanoona, ye damanbed wonong irib kuu awanoon.
26 Ye daman kwangkon ayi areb ye danayiibbanbed bobnoon. Kwanoona, ye daman mamaa ayoobmim kangkon kwamune areb keroon. Kwane, yi korem kwanamo kamenmo wene yi ediib korem yoworiwen.
27 Wene ari wonong irib kuyiib bobneen.
28 Kwane, yi korem ediib kuu yu awaniwen kowe, bobni yirimbed dembe yaro dobiri yaron ari kuu kane ye wonong keranuun?” andiwen.
29 Kwane, Yesumbed inande yedmoon, “Yiib meeni kuu anamban, amborom kuu yiib kuu God Ye Weng Karadmoyiiwa yaromkonoyiiwa kuu yiibkaadban.
30 Kwane, nimakarub bobniwen yirimbed ika dembe yaro dobaraniib kuu awanaibban, yi kuu no God ye engyus areb dobaraniib awanaibban.
31 Kumban ma, yiib kuu bobnekore dembi ye weng Godbed yiib yaa dakmoon kuu ma kimingkindokowoo?
32 Weng kee, ‘Ne kuu Abraham ye God, Aisek ye God, Yekob ye God kui.’ andoon. Kwanandoon yaron kuu yi kuu yoworiwen kumban yi kingkin kuu wad doriib kowe, ye kuu korem wad doriib yi God.” andoon.
33 Kwane, kadaareb yemoon kuyaa doriib kuye weng wengamberekoriwa, ye kedmengkandi yaa binangkiwen.
Amob Darewoob
(Mk 12:28-31, Lk 10:25-27)
34 Kwane, Yesumbed Sedyusi yi mongkodkono kebendoon kuu Farisidan wengamberekorib, menebe nedbe mimo keriwen.
35 Yuudan yi amob yekaadmo ye karubbed komboon kaamobi keyiib kaamonoon, Yesu yaa,
36 “Kedmengkandi korok, nuwamob korem kumaom kuu amob darewoob kuu kuna?” andoon.
37-38 Kwane, Yesumbed neman inandoon, “Amob darewoob kuu kei. ‘Eb Yariman God yaa eb mimyob kumundiniib eb kingkin kumundiniib eb inamen kumundiniib kwane mimyob dowaken keene.’
39 Ma, amob ayoob kuu kei. ‘Eb dia doriibdan kuu mimyob dowaken keende, ebmeren kwanimaab areb.’
40 Amob koremiib profesi weng wongkiweniib kuu amob ayoob keyaambed awiniwen kii.” andoon.
Godbed Kinoona Monoonman Kuu Kane Ye Mingki?
(Mk 12:35-37, Lk 20:41-44)
41 Kwane, Farisidan kuu kuyaa nedbiwen kowe, Yesumbed yi yaa kaamondoon,
42 “Yiibbed meeni kuu komandaniib, Godbed kinaneena mananeenman Keresu yaa kuu? Ye kuu kane ye yumbon kandi ye karub?” andoon. Andoona, yimbed inandiwen, “Ye kuu Dewid yawo ari.” andiwen.
43 Kwane, Yesumbed yedmendoon, “Ma angkon komanded Dewid kuu God ye Kingkin Karadmo ibnenoonkob Keresu yaa ‘Yariman’ ande yedmoon? Kukamune Dewidbed yedmoon,
44 ‘Yariman Godbed ne Yariman yaa yedmoon,
“Ne wiwi angkambed dibereewo,
nembed eb bondan korem kuu ben eb yondad dabderem yiri kiriba.” ’ ande wongkoon.
45 “Dewid, yembed Keresu yaa Yariman andoon kowe, ma komarewa kerene Keresu kuu Dewid ye awo ari keraneen?” andoon.
46 Kwanandoona, kanembed ma inande weng ma yedminban keriwen. Kwane kuyaambed, kanembed kaamobi yena ma kaamobem ande inamen kowindo koronde wenebiwen.