19
1-3 Faeratima weiro danu ami uwarama Yesu mutate isuma uta. Utate sinisini bobo emetu kofi ubu utate Yesunu kofiriro barue oitate Yesunu wadia ma kosugari utate I dera yawoeta uwaranu kukui wadiawere mutate barue oita. Eno utate Yesubai fatate irue weita, Ju uwaranu dera yawoeta amara ea weda agema Yesu urebita.
4 Eno utebitana Faeratima wawaro i Ju uwarabai anite wei, Yesu fafisuna Dawabai kerere me imutataneba ya imufoe iba fafisu wei.
5-6 Eno weiro Yesuma sinisini kofini kukuiwere wadiaini baruite wawaro ido amo fari. Fariro Faeratima i guruguru ubita uwaraba wei, i amarana ewado eawe, weina i dera fuyo ode sina weta uwaraini dera Ju uwaraini emana weita, korosiro odia, korosiro odia weita. Enoma enoma webitaba Faeratima wei, Dawabai kerere me imutataneba yanu torowa Dawa muawete korosiro odiawe wei.
7 Weiro i Ju uwarama moko weita, yabai tarawatu ibinu weitate weita, Dawa Nana Godinu Amara weiba yanu tarawatuba uifisu weita.
8-9 Eno weitaro Faeratima nauite iyareda gaemani su ubarero amuite Yesuba wei, aboroma farinu wei? Weina Yesuma moko wiawa ui.
10 Wiawa uiba Faeratima nono wei, sina naba moko wiawa? Nanu buna derawereba a uregari uawe wemaro enanari ufitaita. A korosiro odiawe wemaro enanari ufitaita rairo aneba sina moko wiawa utasu wei?
11 Eno weiro Yesuma dawaba wei, Godima anu buna maiba iba Naba eno ufasu. Godima aba buna matawana Naba eno da ufasu. Ibago anu neno neno uetana kikiratu. I amarama Na anu age duro masinu, i amaranu neno neno uetana derawere wei.
12 Eno weiba Faeratima Yesu ekodite i uwarabai anite Yesu uregari ufie weina i Ju uwara ema unutawa uregari uetaba weita, ewa amara uregari ufasuna ana i dera yawoeta amara Sisanu domaya me weitate weita, anama na dera yawoeta amara webisuna Sisa ma kikiratu ufisu weita.
13 Weitaro Faeratima i sina nauite weiro, enanari Yesu woure i koto kabesiro oita. I Ju uwarama i kabesinu ifuna Gabata webaita. I ifunu ubina fetawawere gebiro kabesi, semenesi ari.
14-15 Godima Isaraero uwara Ijifiroma woure aneta ogaro ue bou ueta kowa ido fariro kowa mare otoro inari. Faeratima i Ju uwaraba wei, yanu dera yawoeta amara Dawa ewado weina Dawa ma uia, Dawa ma uia, korosiro odia derawere weita. Enoma enoma webitaro wei, ya Ju uwaranu dera yawoeta amara korosiro odimane waita wei? Weiro i dera fuyo ode sina weta uwarama moko weita, yanu dera yawoeta amarana Sisa. Yabai mui dera yawoeta amara me weita.
16 Eno weitaro Faeratima Yesu ma uifitae emanu age duro daido mai.
Yesu korosiro ikokoma ure badami ue oita
17 I uwarama Yesu mutaro Yesuma Danu korosi Danu torowa woure ani. Anebe anebe mui orofaro ane fari. (I orofana Kofiri Tai Torowa Orofa webaita). Ju uwaranu sinaroma Gorogata webaita.
18 I orofaro fatate Yesu korosiro oita. Mui amara enabira afu mui korosiro ure oitate mui amara enabira afu mui korosiro oitate Yesu abana mui korosiro oita.
19 Faeratima sina yanaite i korosi deiro odi. I sinana eno owawa ue odi, Yesu Nasareta Amara, Ju uwaranu Dera Yawoeta Amara.
20 Faeratima i sina Ju uwaranu sinaroma odite Romani uwaranu Ratani sinaroma odite Guriki sinaroma odi. I sina rarogonuroma odite Yesunu korosi deiro odi. I kabesi Jerusaremu su baworoba Ju uwara faiyawerema i sina yawitebita.
21 I dera fuyo ode sina weta uwarama Faeratiba weita, Ju uwaranu dera yawoeta amara eno da owawa ua weitate weita, ewa amara danu imueta iba wenu, Nana Ju uwaranu dera yawoeta amara eno owawa ua weita.
22 Weitana Faeratima wei, eno owawa ue odineba enanari ibifisu wei.
23-24 I ami uwarama Yesu korosiro oitate Yesunu wadia mune nata nata utate kabesi fo (4) ode ode uta. Ami uwara foma (4) Yesu korosiro oitaba iba eno uta. Danu dei baruetaini mutaro nono i dei baruetana kobere wadia, abanaro fifinu ueta me. I wadia deiroma wowonaro rorowarau ubu uiba i ami uwarama we mataneda weita, ewa wadia da ma babafete kasi waribo ufero anama mubisu weita. Godinu bukaroma wasu sina enanari ufisuba iba eno uta. Godinu bukaroma wasu,
Nanu wadia mune nata nata ufitate Nanu dei baruetaba kasi waribo ufitaita,
eno wasuba iba i ami uwarama enanari uta.
25 Yesunu danuaini Kirofasinu aweta Merini Meri Megidarina awetaini Yesunu korosi gigirariro fare inaibita.
26 Inaibitana Yesuma Danu danuaini Danu iwata ueta ubi amara erite Danu danuaba wei, baya, anu amara ewado ea wei.
27 Weite Danu iwata ueta amaraba wei, i awetana anu anua ewado ea wei. Eno weiba duburo Danu iwata ueta amarama Danu danua ido danu suro odifie muni.
Yesunu uieta
28 Eno webina Yesu Dawa iwata Danu me sibisu kowa fariba wei, Na ogo nodo utasu wei. Godinu bukaroma wasu sina enanari ufisuba iba eno wei.
29-30 Mui diririwere ana tai dumamu okiaro ibiro uriri ari emetu mutate isuro uwatate dumamuro ma inutate Yesunu bebeturo oitaro Yesuma ite wei, Nanu gaukara ido me sininu wei. Weite Danu kofiri tafu uite ido ui.
Yesunu gaumaro warima yanata
31 I kowana i Ju uwaranu sabate ue bou ueta kowa. I sabate kakarawere, Godima Isaraero uwara Ijifiroma woure aneta ogaro i kowaro fafisuba. Ibago i Ju uwara unutawa i amara rarogonu korosiro ibetaba Faeratiba weita, i amara rarogonunu buri ma furiawete woure ane odiawe weita.
32 Eno weitaba ami uwarama anitate enabira afu amaraini enabira afu amaraini emanu buri ma furiata.
33 Ma furiatate Yesubai fatate etana Yesu uiba Danu buri ma furiarawa uta.
34 Ma furiyarawa utaro mui ami amarama wari munite Yesunu gaumaro yanairo ogoini onono ido fare itari.
35 I ueta sineta na nesia ereba iba owawa odatane. Nanu sinana ba iba owawa odataneba ya eforo yanu naueta derawere ufie watane.
36-37 Godinu bukaroma wasu sina enanari ufisuba ina nesia enanari ui. Godinu bukaroma eno wasu, Danu mui tairatu da ma furiafitaita, eno wasute nono mui sina eno wasu, emanu gaumaro yanata amara nono efitaita, eno wasu.
Yesunu uri uta kowa
38 Duburo Jousefa, Aramatia su amara, dawa i Ju uwaraba iyariba Yesu kiwuma nautebi, dawa Faeratibai Yesunu ofe mubie anina Faeratima ido wei. Ido weiro Jousefama Yesunu ofe korosiroma munite ani.
39 Nikodimasi, dawa bodere dumuro Yesubai fari, i amarama uri oeta bonanawere fauda, danu ifuna muraini aroaini, ina faiyawere, danu urumuna fifiti (50) kiro, woure fari.
40 Wo fariro Jousefaini Nikodimasini Yesunu ofe musite kobere inawere wadia musite i fauda bobo Yesunu ofe wayasi. I Ju uwaranu baeta eno iba eno uta.
41 Yesunu korosi oeta kabesi gigirariro mui oriwa ana beata ibi. I beataro reka uri oeta erabo mui amara iro odawa, kabesi ibi.
42 I Ju uwaranu sabate sau fafisuba i uri oeta kabesi baworoba i amara sadeima Yesu mune iro ane ma aine oisi.