2
Pɔl Zozi Crizi -le 'wɩ 'vɩ Korɛnti 'nɔn lɛ 'kɔ?
1 'An "bʋɩ Zozinɔn, 'an 'bɔ 'gʋɛ, zɩ an 'lʋ 'ka 'va bɛ, blamin -le 'wɩ 'tɔdɩ -dandan 'lee 'wɩdɩ sidɔ -a "cɛɛ an 'wɩ nɛn Bali -a drɛ bɛ -a 'vɩ 'cɛɛ dɩ.
2 Kɔɔ maan 'yɩ "yi 'nan Zozi Crizi -tʋwli "le 'wɩ nɛn 'an ve 'cɛɛ. Zozi Crizi nɛn waa -tɛ yiba "plan da bɛ -a 'bɔ nɛn maan ve.
3 Tʋ nɛn an 'lʋ 'ka 'va bɛ, te an "koe 'ka 'an da 'kpa dɩ. Ɛn "nyian bɛ te "klan a 'an 'ji.
4 Bali -le 'wɩ nɛn maan 'vɩ 'cɛɛ bɛ, blamin -le 'wɩ 'tɔdɩ -dandan 'lee 'wɩdɩ sidɔ -a "cɛɛ maan 'vɩ 'cɛɛ ɛn kaa 'man "yi "dɩ. 'Pian Bali lei 'saun 'bɛ 'nyranman 'pa 'plɛblɛ ɛn ka 'wɩ zɩɛ -a 'man "yi.
5 Maan drɛ zɩɛ 'nan -e Bali -le 'plɛblɛ 'le "wɛan bɛ 'ka yi -tɛra Zozi da. Kɔɔ an 'ka "vale 'nan blamin -le 'wɩ 'tɔdɩ -dandan man nɛn 'ka yi -tɛra "da "dɩ.
Bali -le 'wɩ 'tɔdɩ
6 Zozinɔn nɛn o drɛ Bali -le 'wɩ 'ji ceje bɛ, waa -tɔa 'nan 'wɩ 'tɔdɩ nɛn kʋa 'vɩ. 'Pian 'wɩ 'tɔdɩ zɩɛ ya'a 'silɛ 'trɛ 'gʋɛ -a da dɩ, ɛn ya'a 'silɛ minnun tanɔn 'va dɩ. -A -cin 'e 'kɔn 'ka 'ji 'nan minnun tanɔn zɩɛ yi -tʋ bɔa "bɛ o -nan -nyaan.
7 'Wɩ 'tɔdɩ nɛn kʋa "paaman minnun ji bɛ, Bali -le 'wɩ 'tɔdɩ nɛn -a -ci mandɩ a 'plɛblɛ bɛ -nyrɛn. Te Bali 'ka tian 'trɛ drɛlɛ dɩɛ, ɛn yaa man drɛ 'e 'cɛn 'nan 'yee 'tɔ -dan bɛ 'ka drɛ -a "nɛn "blɩnɔn 'a. 'Wɩ 'tɔdɩ zɩɛ e ya 'e yɔɔdɩ minnun man.
8 Minnun tanɔn nɛn 'trɛ 'gʋɛ -a da bɛ, wa'a Bali -le 'wɩ 'tɔdɩ zɩɛ -a -ci manlɛ dɩ. "Te waa -ci 'man bɛ, "te Minsan nɛn 'tɔ -dan a -yrɔ "bɛ wa'a -pɛinlɛ yiba "plan da dɩ.
9 'Wɩ nɛn 'e 'crɛn -tɛdɩ Bali -le 'fluba 'ji bɛ, -yɛɛ 'lɛ sɔɔ. Kɔɔ e ya 'e 'crɛn -tɛdɩ 'nan:
«'Wɩ nɛn blamin 'ka tian 'li -a -nan yɩlɛ dɩɛ,
ɛn 'wɩ nɛn blamin 'ka tian 'li -a manlɛ dɩɛ,
ɛn 'wɩ nɛn -a -cin 'ka blamin ji 'nan e dra dɩɛ,
-a 'bɔ nɛn Bali -a man drɛ minnun nɛn
o Bali 'bɔ ye "yi "bɛ -wee vɛ -a.»
10 'Pian -cee vɛ bɛ Bali 'bɛ 'wɩ zɩɛ -a -ci 'si -cɛɛ 'yee lei 'saun 'a. Kɔɔ Bali lei 'saun 'wɩ pɛɛnɔn -tɔa. Yaa -tɔa "trilii e Bali -le 'wɩ yɔɔdɩ pɛɛnɔn -tɔa.
11 'Ka 'ci "nrɔn 'wɩ 'gʋɛ -a da -tʋ, blamin 'bɔ 'bɛ 'e 'fli man wɩ -tɔa 'e -tʋwli "cɛ. -Njɛɛ dʋʋ? -A -tʋwli "nɛn "nyian Bali lei 'saun 'le vɛ -a. 'Wɩ pɛɛnɔn nɛn Bali da bɛ, Bali lei 'saun 'bɛ -tɔa 'e -tʋwli.
12 Lei nɛn Bali -a -nɔn -cɛɛ bɛ, ya'a 'sia 'trɛda 'gʋ dɩ, 'pian e "sia Bali 'bɔ 'va. -Yee "wɛan Bali -le "yinun nɛn yaa dra -cɛɛ bɛ, -kaa -tɔa.
13 Ɛn "yinun zɩɛ blamin -le 'wɩ 'tɔdɩ -dandan -a "cɛɛ -kaa -nan wɩ ve minnun lɛ dɩ. 'Pian 'wɩnun nɛn Bali lei 'saun -a "paa -kaa 'le bɛ, -a 'bɔ nɛn -kaa ve minnun lɛ. 'Wɩ 'kpa nɛn, 'wɩnun nɛn e cɩ Bali -le 'wɩ 'a bɛ, -kaa -ci "sia minnun nɛn Bali lei 'saun o "paala bɛ -wlɛ.
14 'Pian min nɛn e 'ta wʋla 'e 'bɔ 'wulo -ji wɩnun da bɛ, wɩnun nɛn e 'si Bali lei va bɛ, ya'a 'we "man 'nan 'wɩ 'kpa nɛn dɩ. -A san "e 'wɩnun zɩɛ -a "siala klin "tɛ wɩnun -a ɛn ya'a 'kɔlaman -e 'e -ci man dɩ. Fɛ nɛn maan ve zɩɛ, -yɛɛ cɩ 'nan 'wɩnun nɛn e 'si Bali va bɛ Bali lei 'saun 'bɛ -ci "sia min lɛ.
15 Min nɛn Bali lei 'saun -a "paala bɛ, e -kɔlaman 'wɩ 'tɔ 'tʋdʋ pɛɛnɔn 'fa 'sidɩ -a, 'pian min nɛn Bali lei 'saun "cɛɛ "paala dɩɛ, ya'a 'kɔlaman -e 'e min zɩɛ -yee 'wɩnun drɛdɩ -ci man dɩ.
16 Kɔɔ 'wɩ zɩɛ Bali -le 'fluba -a 'vɩ. E ya 'e 'crɛn -tɛdɩ Bali -le 'fluba 'ji 'nan:
«-Tɩɛ Minsan -le ci "nrɔndɩ -tɔa?
Ɛn -tɩɛ -kɔlaman 'wɩ "paadɩ -a "ji?»
-A san "ka "fo "dɩ, 'pian -cee vɛ bɛ, Crizi lei 'bɛ -kaa "paala. -Yee "wɛan -kaa -yee ci "nrɔndɩ -tɔa.