130
Amɨn kɨnda Piŋkop da aŋpulugosak do bɨsit agɨt
Piŋkop gawak ɨmɨm tamokon kɨgɨk dakon kap.
1 Yawe, butno jɨgɨsi taŋakwan aŋpulugoki do yaŋ tɨdosot.
2 Amɨn Tagɨ, bɨsitno nandaki.
Aŋpulugoki do gayɨsat, do nandaŋ nabi.
3 Yawe, gak da dɨwarɨnin manjɨŋek gen pikon nipbim tam, Amɨn Tagɨ namɨn da gengo yapban?
4 Mani gagon dɨwarɨ wɨrɨrɨt tosok, do nin gak do pasal gamneŋsi.
5 Nak Yawe da aŋpulugosak do nandaŋek jomjom asat.
Aŋek geni do tebaisi nandaŋ gadasat.
6 Nak Amɨn Tagɨ da aŋpulugosak dosi nandaŋek but kɨndap asat.
Kalbi kɨla amɨn da uwal apni do kɨla aŋek wɨsa tepmɨ dagosak do aŋtep aŋ uŋun yapmaŋek but kɨndap madepsi asat.
7 Israel amɨn, Yawe da nin do but dasi galak taŋ nimɨsak, ae dɨma yokwi toneŋ yaŋ do bɨsapmɨ bɨsapmɨ nin paŋpulugosok, do Yawe da nin paŋpulugokdɨsak yaŋsi nandaŋ teban taŋek uŋun do jomjom aneŋ.
8 Uŋun da Israel amɨn nin yokwikon baŋ tɨmɨgek dɨwarɨnin kɨsisi wɨrɨrɨk nimɨsak.