41
Sot amɨn kɨnda Piŋkop da aŋmɨlɨp asak do bɨsit agɨt
Dewit dakon kap kɨnda. Kap on kap yoŋ dakon kɨla amɨn do mandabi.
Amɨn kɨnda da tapmɨmni mɨni amɨn pɨndagek paŋpulugosok, uŋun amɨn kɨsɨk kɨsɨk tagɨ asak.
Jɨgɨ altaŋ ɨmni bɨsapmon Yawe da pulugaŋ yɨpdɨsak.
Yawe da uŋun amɨn aŋkutnaŋakwan kɨmot dɨma asak.
Kɨlani aŋakwan mɨktɨmnikon gɨsamɨ toŋ egakwan uwalni da dɨma abɨŋ yɨpdaŋ.
Amɨn uŋun sot asak bɨsapmon Yawe da aŋmɨlɨp aban tapmɨm kaluk pakdɨsak.
Nak yaŋ yagɨm, “Yawe, nak yokwi gak do aŋgamɨsat, do bupmɨ nandaŋ namɨŋek sotno aŋmɨlɨp abɨ pasɨljak.”
Uwalno da nandaba yokwi taŋban namɨŋek yaŋ yoŋ,
“Ni bɨsapmon kɨmagek mani pasɨljak?”
Kɨnda da abɨŋ nandaŋek top yaŋ namɨsak.
Aŋek sotno dakon mibɨlɨ nandaŋek kɨŋ amɨn yoyɨŋek aŋupbal ak do yosok.
Uwalno kɨsi da muwugek gen pɨsɨgon da yo yokwisi kɨnda da altaŋ ɨmɨk yaŋ yaŋek yaŋ yoŋ,
“Sot yokwisi kɨnda da abɨdak, do pokdok tamokon da arɨpmɨ dɨma pɨdosak.”
+ Nak notno kɨnda kalɨp notnosi yaŋ nandaŋ ɨmɨŋek jap kaloŋɨ nagɨmak.
Mani uŋunyo kɨsi da nandaba yokwi tok aŋ namɨŋek uwal aŋnamɨsak.
10 Yawe, nak do bupmɨ nandaŋek sotno aŋmɨlɨp aŋaki uŋun amɨn kobogɨ yobeŋ.
11 Uwalno da nak dɨma abɨŋ nepmaŋgaŋ, do nak yaŋsi nandɨsat, gak nak do tagɨsi nandaŋ namɨsal.
12 Nak aŋpak kɨlegɨ gɨn asat, do kɨlano aŋaki gak da kapmatjok toktogɨsi egɨ wɨgɨkeŋ.
13  + Yawe, Israel amɨn dakon Piŋkop toktogɨsi aŋkɨsiŋ aŋaŋ wɨgɨneŋ teban. Uŋun asi.
PAPIA 2
(Kap 42–72)
+ 41:9 Mt 26.23; Mk 14.18; Lk 22.21; Jn 13.18 + 41:13 Kap 106.48