53
Amɨn dakon gulusuŋ aŋpakni gat ae aŋpak yokwini gat dakon gen
Dewit dakon kap kɨnda. On kap do “Maskil” yaŋ yoŋ. Kap yoŋ amɨn dakon kɨla amɨn da mɨŋat amɨnyo yoyɨŋban tek “Malat” ron da yoni.
+ Nandaŋ kokwini tagɨ dɨma amɨn da
“Piŋkop kɨnda dɨma egɨsak” yaŋ yoŋ.
Uŋun amɨn aŋpak kosirɨkon dɨma aŋ.
Uŋun aŋpak amɨn da dɨmasi agagɨ baŋ aŋ.
Kɨnda da aŋpak tagɨ kɨnda dɨmasi asak.
Piŋkop Kwen Kokup egek sɨŋtaŋban mɨŋat amɨnyokon pɨsak.
Aŋek nandaŋ kokwini tagɨsi ae Piŋkop dakon mibɨlɨ nandak do pi aŋ amɨn dɨ ekwaŋ bo dɨma yaŋ do wɨsisak.
Mani dɨma. Kɨsi morap kosit kɨlegɨ kɨlɨ yɨpmaŋ dekgwit.
Kɨsi morap arɨpgɨn, uŋun amɨn wagɨl yokwisi.
Kɨnda da aŋpak tagɨ kɨnda dɨmasi asak.
Piŋkop da yaŋ yosok,
“Yokwi aŋ amɨn nandak nandak tagɨ dɨ dɨma tɨmɨkgaŋ.
Amɨn da bret naŋba mudoŋ, uŋun da tɨlak amɨn yokwi da mɨŋat amɨno naŋ mudoŋ.
Ae nak da paŋpulugokeŋ do bɨsit dɨma aŋ.”
Mani madepsi pasoldaŋ.
Kalɨp yaŋ dɨma pasalgwit.
Nido, Piŋkop da uwal morapji uŋun wagɨlsi dapmaŋek kɨdatni maban dukwan dukwan kɨkdaŋ.
Ji da uwalji paŋmayak akdaŋ, nido Piŋkop da manji kɨlɨ yomgut.
Nak Piŋkop da amɨn kɨnda Saion naŋ yabekban abɨŋ Israel amɨn yokwikon baŋ tɨmɨtjak dosi nandɨsat.
Piŋkop da mɨŋat amɨni paŋpulugaŋban aeni tagɨsi egɨpni bɨsapmon Israel amɨn kɨsɨk kɨsɨk akdaŋ.
Asi, but galaksi nandakdaŋ.
+ 53:1 Ro 3.10-12