79
Israel amɨn Piŋkop da paŋpulugosak do bɨsit awit
Asap dakon kap kɨnda.
1 Piŋkop, Amɨn Ŋwakŋwarɨ Kabɨ gak da mɨktɨmon kɨlɨ abeŋ da mɨŋat amɨn kabɨgo nin gat emat aŋ.
Yutgo telagɨ uŋun aŋupbal aba telagɨ dɨma tagɨt.
Aŋek Jerusalem obɨsi aŋupbal awit.
2 Telagɨ oman amɨngo dapmaŋek bumjotni yo ɨsalɨ yaŋ nandaŋek yum pɨndagakwa sɨŋgɨŋ gat ae joŋ pɨŋan gat da gɨptɨmni noŋ.
3 Mɨŋat amɨngo dapmaŋakwa yawi da tagal kɨŋek Jerusalem pak pukwaŋ.
Ae bumjotni wayɨtni amɨn kɨnda dɨma egɨsak.
4 Mɨktɨm nin da kapmatjok toŋ uŋun dakon amɨn da yaŋsul aŋ nimaŋ.
Mɨktɨm morap nin paŋgwasɨŋek taŋ aŋaŋ kwaŋ uŋun da yaŋsul madepsi aŋ nimɨŋek gen mayagɨsi yaŋ nimaŋ.
5 Yawe, bɨsap niaŋ da butjap nandaŋ nibi?
Gak toktogɨsi butjap nandaŋ nimdɨsal bo?
Gepmaŋ dekgɨmaŋ do butjapgo kɨndap da yaŋ soŋek dɨma kɨmotdɨsak, ma?
6 Gak mɨŋat amɨn kabɨ dɨma gawak gamaŋ ae mango yaŋek bɨsit dɨma aŋ amɨn uŋun do butjap nandaki.
7 Uŋun amɨn kabɨ da mɨŋat amɨn kabɨgo Jekop dapba kɨmakgwit, aŋek mɨktɨmni obɨsi aŋupbal awit.
8 Babɨknin da aŋpak yokwi awit uŋun do yo yokwi dɨma aŋ nibi.
Abɨsok nin yokwisi ekwamaŋ do bupmɨ nandaŋ nimɨŋek tepmɨsi paŋpulugoki.
9 Piŋkop, gak yokwikon baŋ tɨmɨt tɨmɨt Piŋkopnin.
Man madepgo do nandaŋek nin paŋpulugaŋek dɨwarɨnin wɨrɨrɨkgi.
10 Amɨn Ŋwakŋwarɨ Kabɨ da nin do yaŋ yoŋ, “Piŋkopni dukon egɨsak?”
Uŋun tagɨ dɨma. Uwal da oman amɨngo dapba kɨmakgwit, do yawinin dakon kobogɨ do gak da Amɨn Ŋwakŋwarɨ Kabɨ yo yokwisi aŋ yomɨŋaki gandak do nandamaŋ.
11 Dam tebanon ekwaŋ amɨn dakon kunamni nandaki.
Aŋek tapmɨm madepgokon da uwal da amɨn dapba kɨmotni dosi kɨlɨ yawit, uŋun yokwikon baŋ tɨmɨkgi dosi nandɨsat.
12 Uwal nin da kapmatjok ekwaŋ uŋun da gak do gen yokwisi yawit, do Amɨn Tagɨ aŋpak yokwini dakon kobogɨ yomɨŋaki kosirɨ 7 yaŋ asak.
13 Yaŋ aŋaki mɨŋat amɨn kabɨgo, sipsip kabɨgo, nin toktogɨsi ya yaŋ gayɨneŋ.
Ae babɨknin don altoni uŋun kɨsi da mango aŋkɨsini.