1 Annana hermanos quixa'ánia' le nu cca qui' Xana' Ri'u Jesucristua tì'iỹa ccá canchu chi gal·la' tsá íl·lanie attu nna etùppa iyaba ri'u lani e. Rata'yúni tu' le, 2 qui'ni bittu gátsini le por ca enne' nu ra qui'ni chì gul·la' tsá qui'ni íl·lani Señor para gunie yétsiloyuį castigar nna ítsiani la' rulaba latsi' tsè' qui' le. Bittu gátsini le canchu ttu enne' nna iną qui'ni Espíritu nna chi belue'nie na qui'ni chi gul·la' tsáa o por canu rena cą qui'ni intu' nna bediàni tu' ą lo ttu carta qui' tu'. 3 Nìdiruba titó' làa gute le lugar qui'ni nuỹa guthacca'ỹí ą le, porqui'ni primérute nna ná qui'ni chatha ttu alboroto ỹeni ni contra Tata Dios, làniana ilá'ní nuỹa nuá ná puru taá tul·la' nna ną́ destinado para nittíą tulidàni. 4 La'a mísmuba enne' túl·la'a nna chathą contra iyaba clase de religión qui' ca enne' nna iyaba nu runi cą adorar hàstaba qui'ni cue'nią le' templo qui' Tata Dios nna iną qui'ni la'a mísmuba lą̀ nna ną́ Tata Dios. 5 Tsí bihua rexa latsi' le qui'ni gutixa'ánia' le iyaba ca cosį loti' ré' rù'a' lani lía. 6 Pero hua yù ba le qui'ni labí chi gul·lani enne' túl·la'a lè' yétsiloyu, porqui'ni hua té ttu la' huacca tsè' le' yétsiloyuį nu ruthàgue'e na hàstaba qui'ni íl·lani tsá señalado por Tata Dios, làniana ilá'ní enne' túl·la'a. 7 Nu malua nna chi runią tsina lo losto' ca enne' para edúdítsini cą Tata Dios, màsqui'ba labí rennia cą cuenta qui'ni ą' runią lani cą. Pero labí ccanią gunią iyaba maldad nu calatsi'į hàstaba qui'ni ítua la' huacca tsè' nu ruthàgue'e na. 8 Làniana ennia ca enne' cuenta nuỹa nuá enne' túl·la'a, pero Señor Jesucristua nna inne terúbee nna gúttíe na por la' huacca qui' titsa' quì'e nna il·lùỹa taá latsi'į por la' yani' nu dá' lani e de ỹiabara'. 9 Enne' túl·la'a nna té la' huacca qui' Satanás lani ą canchu chi thuluą tsina quì'į para qui'ni gunią iỹé ca milagro nna ą'hua adí ca seña para iquila' latsi' ca enne', pero iyaba nu gunią nna ną́ beỹia. 10 Pues gunią iyaba mal nu ccanią para guthacca'ỹíą canu ná cą destinado para nitti cą, ya qui'ni labí calatsi' quį guni cą recibir la' tsì'ilatsi' qui' Tata Dios lo losto' quį para tsía latsi' quį titsa' lí nna ccá cą salvo. 11 Acca Tata Dios nna be'èl·la' telée cą thacca'ỹí cą por la' huacca qui' numalua, para qui'ni tsíalatsi' quį ca beỹia qui' enne' túl·la'a, 12 para qui'ni iyaba ca nuá nna ccá cą condenar por Tata Dios, porqui'ni labí huíalatsi' quį ca titsa' lí, sino guyú'u la latsi' quį guni cą nu ná tul·la'.

13 Pero lebi'į hermanos, yala catsi'íni Señor le, accá rue' tu' gracia Tata Dios tulidàba por lebi'į, porqui'ni chìa becuí'e le dèsdeba nerua nna chi ná le salvo porqui'ni Espíritu Santo runie qui'ni cca le enne' nàrì por la' huacca quì'e, ą'hua porqui'ni ríalatsi' le nu ná lí. 14 Gutàỹi Tata Dios le por medio de mensaje nu beni tu' predicar, acca chi ná le salvo. Ą'hua gutàỹie le para thí' le là' dàliani nu gunna Jesucristua qui' le. 15 Accaỹa hermanos, liguni seguir ccá le creyente tsìttsì, ą'hua bittu iỹùl·lani le ca enseñanza nu chi bidète' le, sea por medio de nu chi gutixa'áni tu' le, o sea por medio de nu chi bediàni tu' le. 16 Xana' Ri'u Jesucristua nna yala catsi'ínie ri'u. Ą'hua Dios Padre qui' ri'ua nna née enne' bueno para lani iyaba ri'u nna runne la' ỹeni lo losto' ri'u para siempre. Acca por lèe nna ribeda ri'u lani la' redacca' latsi' nu chì' da'la. 17 Rinába'a' qui'ni lèe nna gunie le animar nna gunnee la' huacca qui' le para inne le nu rú'ulatsi'e nna guni le iyábani nu ná tsè'.