6
Ne ziyza laat de bniiny, pur ni zenuut Jesucrist, gulcuadiag xtiidx xtadtɨ ne xnantɨ te pur ziy riáld gúntɨ. Ne primer mandamient ni zedné promes ná: “Gúp didxdoo xtadu ne xnanu, te par ibániu zacru ne gapu sroo guelnabány lo guɨchliuré.”
Chiy laat de dad ne de nan, quɨt cuenzi gunnétepaczactɨ de lliintɨ te par quɨt idxiichzadeby pur ziy. Güenru gultiiodeby zacru, gul lɨdxdeby ne gulseeddeby zec ni azenuut Crist.
Ne laat ni runtɨ xtsɨɨny bniety, gulzuub xtiidx ni rac xlámtɨ lo guɨchliuré. Dibylopac xquel gulgáp didxdoo ne gulcuadiag xtiidxdeb, nalaazquɨt xtsɨɨny Cristiy cayuntɨ.
Gulgaany sirvɨ lodeb gati chi caguiaazydeb laat par yanzaactɨ nez lodeb, sino que gulgaany xcuendtɨ dec lo Cristiy cayuntɨ sirvɨ pur ni guldípactɨ cayuntɨ zec ni rcaaz Dios gúntɨ. Gulgaany dzɨɨny cun gan, nalaazquɨt xmos Crist laat gati xmósziti bɨnguɨchliu. Te pur laat anántɨ dec cad tuby bniety, masquɨ mos o masquɨza gati mos per sdeed Crist laab ni riáldbɨ según güen ni baanbɨ.
Ziygacza laat de lám, gulgac güen cun de xmostɨ. Gulsaan ni rsacsitdeb te pur laat nántɨ dec Dad ni rnabee laadeb ne laat any rbez llayabaa, ne nez lony tubylote ná bniety.
10 Ziyza rniia laat de saniroldilaaznɨ Jesucrist, gulsutipné ni anát tubyzi cun laany pur guelrnaberoo xtenny. 11 Gulgualo laat cun guelgucné xte Dios, te par sutiptɨ par quɨt gún bɨndxab gan laat. 12 Te pur quɨt cadxantin pur idxannɨ gan lo tuby ni ná de dzɨt ne de beel sino que dunnɨ cadildnén iralote de spírit mal, zeclɨ de ni nap guelrnabee, guelgurtisy ne iraloteru de spírit xte bɨndxab ni nuu ne ni canabee lo guɨchliuré. 13 Pur ningui, gulgualo laat cun guelrnabee xte Dios te par chalee güelaaztɨ guelziitisy ni guedguaald ax chalaa sutiptɨ masquɨ ni cadeedtistɨ.
14 Gulsutip pɨs, pur didxldí ni anántɨ ne gulchanuu zec ni riáld ibánytɨ. 15 Gulsuguaa altant par güeet de didxzaac xte Jesucrist ni zedné guelnaldiulaaz par cun Dios. 16 Ne ziyza gulchané cuend dec guelreldilaaz ni naptɨ ná ni racné laat lo irate de ni zéed pur bɨndxab. 17 Ne ni baany Dios perdón de xtuldtɨ ná ni rgualo laat ax de xtiidxny ná zec tuby spad ni rnɨɨdx Spíritu Sant laat. 18 Quɨt isaantɨ ni rnaabtɨ lo Dios. Gultiin, gulnaab lony llillite cun guelgucné xte Spíritu Sant. Gulsuguaa altant par inaabtɨ lony, quɨt chaxaclaaztɨ ne gulnaab pur irate de xpɨnny. 19 Ziyza gulnaab pur nare te iguaad Dios nare de diidx ni ná par iniia, te par sin dxiby güiaa de didxzaac xte Jesucrist ni zedné perdón. 20 Dios bxiaaldny nare par güiaa de didxzaac xtenny, ax pur ningui nuua láani lizguiib. Per gulnaab lo Dios te par quɨt idxibia güiaa xtiidxny zec ni ná par güiaany.
21 Tíquico tuby de sáan ni rcaaznɨ ne ni guldípac cayacné cadxannɨ sirvɨ lo Crist, laab quixteeb lot irate xa nuua ne xi cayuna. 22 Pur ningui, caxiaaldab te par quixteeb lot xa dxúun nezré ax cuzaclaazbɨ laat.
23 Rguiin rnaaba dec irate de saniroldilaaznɨ Crist gaadtɨ guelnaldiulaaz, guelrcaaz cun guelreldilaaz xte Xtadnɨ Dios ne Dad Jesucrist. 24 Ne gunldeeny quia irate de ni guldípac rcaaz Xtadnɨ Jesucrist. Amén.