15
(Mr. 7:1-23)
1 De fariseu cun de maistrɨ ni nán ley de ni zá Jerusalén güebinuudeb Jesús ax gunabdiidxdeb laany:
2 —¿Xínii quɨt zenuu de xpɨnbiu costumbrɨ ni bsáan de to xpɨngul gulalnɨ? ¿Xínii quɨt zenuudeb costumbrɨ zec ni riáld quibynaadeb anste iquiindeb?
3 Chiy raipy Jesús laadeb:
—Laat, ¿xínii rsáantɨ xtiidx Dios tuby lad par zenuut de xcostumbrɨt?
4 Dios guniiny: “Gúp didxdoo xtadu cun xnanu”, ne “Elquɨ ni inii de mal diidx pur xtadni o pur xnanni laab riáld gatybɨ.”
5 Per laat rniit dec zelee gaipy bniety xtadni o xnanni: “Quɨt chaleeti gacnía laaguibtɨ te pur irate ni napa a ná par Dios.”
6 Rniit dec ni inii ziy, aquɨt chaleeti gacnéb xtadbɨ o xnanbɨ. Ax ziy xquel rbelaaztɨ xtiidx Dios par zenuut de xcostumbrɨt.
7 ¡Runzit dec nabánytɨ xnezni! Didxldíquɨy ni gunii profet Isaías pur laat chi guniib:
8 De bnietré de diidxzi rtodeb nare,
per niclɨ dudxiin quɨt rtotideb nare dibyquia dibylaazdeb.
9 Xíteete zeloti ni rtodeb nare
pur ni rseeddeb bniety púrzi ni rguichlaaz bɨnguɨchliu.
10 Chiyru gurɨdx Jesús de bniety ax raipny laadeb:
—Gulcuadiag ne gulgacbee ni iniia laat.
11 Gati ni rquiinti bniety ná ni run ná bniety bɨnduld sino que ni rdiia ruu bniety ná ni run ná bniety bɨnduld.
12 Chiy de xpɨny Jesús güebinuudeb laany, raipdebny:
—¿Ta gucbeecbiu dec bdxiich de fariseu chi bindiagdeb ni guniibiu?
13 Chiy Jesús cuaibny:
—Irate ni quɨt zéed pur Xtada Dios ni rbez llayabaa, zuu chi nitloy.
14 Pur ningui, gulsaandeb te pur laadeb nádeb zec tuby ciagu ni rliuu stuby ciagu calí nez chia. Ne belati tuby ciagu iliuub stuby ciagu calí nez chiab, ax iropdxadeb chayab láani guɨɨdy.
15 Chiy raipy Bed Jesús:
—¿Xi zelo ni guniibiu?
16 Jesús cuaibny:
—¿Ta niclɨ laat quɨt racbeet ni caniia?
17 ¿Ta quɨt racbeet dec irate ni rquiiny bniety láanbɨy riabni chiyru rdiiani?
18 Per ni rdiia ruu bniety nez láanbɨy záni, ax de ni rdiia ruu bnietiy run ná bniety bɨnduld.
19 Te pur láani quia bniety zéed iralote de mal xgab, guelrguinxú bniety, guél ibánydxab, guelráp stuby nguiu o stuby gunaa, guelrbaan, guelruee dixú ne guelrgue lo saa bnietni.
20 Irate de cosquɨ ná ni run ná bniety bɨnduld. Per guél quɨt quibynaa bniety zectispac ni ná costumbrɨ ni riáld gún bniety anste iquiinbɨ, ax gati niyti run ná bniety bɨnduld.
(Mr. 7:24-30)
21 Deni bza Jesús ruy ax zégacny nez Tiro ne Sidón.
22 Chiy nezqui rbez tuby bniety gunaa ni zá nez rut lá Canaán, ax rbɨxtiab raipbɨ Jesús:
—¡Dad, Llingaan David, blaslaazbiu nare! Llindxaapa nuu bɨndxab láanby.
23 Chiy Jesús quɨt xi cuaibtiny. Ax gubii de xpɨnny rut zuguaany, raipdeb laany:
—Baanbiu cuend gunaac ax gutsbiub chiab, te rbɨxtiatib zanaldbɨ dunnɨ.
24 Chiy gunii Jesús:
—Dios bxiaaldny nare par gacnía púrzi de bniety Israel ni zé nez mal.
25 Per bniety gunaaqui güeb guzullibbɨ lo Jesús, raipbɨ laany:
—¡Dad, gucnébiu nare!
26 Jesús cuaibny:
—Quɨt náti güen idzɨcá bniety guechtily lo lliinni par ideedbɨni de beecu.
27 Bnietqui cuaibbɨ:
—Guldícbiu, Dad, per de beecu ropacdem de biu ni riab niguét xmɨlly ni rac xicuni laadem.
28 Chiyru raipy Jesús laab:
—¡Gunaa, liúsizacu guldípacu reldilaazu nare! Su gac zec ni rcaazu.
Ax hóracqui biac llindxaapbɨ.
29 Jesús bdiiany ruy ax bdzɨnny de nez ruu nis xte Galilea, chiy bieepny quia tuby dany ax guriny ruy.
30 Quesentiand zieny bniety bdxasaa rut zuguaany. Güenédeb de bniety ni ná coj, de bniety ni ná ciagu, de ni ná mancu, de ni ná gúp ne zienziru de bniety racxú bdzɨɨdeb lo Jesús, ax bsiacny laadeb.
31 Parzi quesentiand rdxalo de bniety chi gunádeb arelee ruee de gúp diidx, ne de mancu abiacdeb, chiy de coj arelee rzadeb, ne de ciagu arianlodeb. Ax guzulo rniideb de diidx zaac par Dios xte Israel.
(Mr. 8:1-10)
32 Jesús gurɨdxny de xpɨnny, ax raipny laadeb:
—Rgáczaca de bnietquɨ, te pur aguc chon dxi zuguanédeb nare ne quɨt caatideb xi iquiindeb. Quɨt rcaaztia ixiaaldadeb lizdeb sin quɨt iquiindeb te quɨt gun yabxcaydeb lo nez.
33 Chiy raipy de xpɨnny laany:
—Per, ¿calí idxialnɨ ni iquiiny bniety guilliúc ne nezquɨ ruteete rbezti nezquɨ?
34 Jesús gunabdiidxny laadeb:
—¿Béld guechtily caat?
Laadeb cuaibdeb:
—Gadz guechtily cun stuudx beld.
35 Chiyru gunabee Jesús guri irate de bnietqui lo yiu.
36 Ax cuáany gadz guechtilqui cun de beldqui, bdeedny gracy Dios. Chiyru bllullny de guechtilqui ne de beldqui bdeedny de xpɨnny par gudiizdebni lo irate de bnietqui.
37 Iratedeb bquiindeb axt bialdeb ne bcharuldeb dzɨ gadz dxumy de ni biian.
38 De ni bquiinqui laadeb nádeb tap mily bniety nguiu, chiy irɨnquɨ de bniety gunaa ne de bniiny.
39 Chiyru raipy Jesús laadeb: “Azaa.” Ax biiuny láani barcu zény nez rut lá Magdala.