26
(Mr. 14:1-2; Lc. 22:1-2; Jn. 11:45-53)
1 Chi gulull gunii Jesús de diidxqui, chiyru raipny de xpɨnny:
2 —Laat nántɨ dec stiopzi dxi rieedx par laní pascu, ne nare Bniety ni bxiaald Dios zaca entriagu par icuaadeb naa lo cruzy.
3 De dxigacqui bdxasaaza de bxoz ni rnabee cun de gurtisy xte de bniety Israel liz Caifás, bxozroo ni rnabee lo de bxoz.
4 Ruy guniideb xa xquel gúndeb engany Jesús par inaazdebny, ax quinxúdebny.
5 Per guniideb:
—Per quɨt idxantin ziy lo de dxi laní par quɨt xi scand gac.
(Mr. 14:3-9; Jn. 12:1-8)
6 Chi zuguaa Jesús láani guɨdx Betania liz Simóny ni raipdeb lepros,
7 chiy bdzɨny tuby gunaa caab tuby botey dxaatec perfum ni sac guyally. Ax lalzi zub Jesús caquiinny, bniety gunaaqui bslob perfumqui quia Jesús.
8 Chi guná de xpɨny Jesús ni baany gunaaqui, ax bdxiichdeb ne guniideb:
—¿Xínii bxíib perfumquɨ?,
9 ne zeleeldi nitóobni guyally par niacnéb de prob.
10 Per chi gucbee Jesús xi caniideb, ax raipny laadeb:
—¿Xínii rdxichnét gunaac?, ne güenquɨ ná ni bannéb nare.
11 Te pur de prob llillite zuguanétdeb, per nare gati iduibtiampti suguanía laat.
12 Ne ni bslob perfumquɨ quiaa, niy zelo dec acayunzaactellgab nare par chi igaatsa.
13 Rguixtiia lot dec iduibte lo guɨchliu nez ruttisy irɨɨch de didxzaac xte Dios, zuee bniety cún loc ni baany gunaac cun nare par chanelaazdeb laab.
(Mr. 14:10-11; Lc. 22:3-6)
14 Chiguld de lo irate tsɨbtiop de xpɨny Jesús, tuby xpɨnny ni bdialá Judas Iscariote, güeninéb de bxoz ni rnabee de bxoz,
15 raipbɨ laadeb:
—¿Belac inɨɨdxtɨ nare par gúna entriagu Jesús lot?
Ax bdeeddeb treint mɨly de plat laab.
16 Chiy desde dxiqui guzulo rguíilybɨ xa xquel gúnbɨ entriagu Jesús.
(Mr. 14:12-25; Lc. 22:7-23; Jn. 13:21-30; 1 Co. 11:23-26)
17 Ne dxi ni guzulo laní ni rquiiny de bniety Israel guechtily sin levadur, de xpɨny Jesús güebinuudeb laany, raipdebny:
—¿Calí rcaazbiu chodxanchuun ni iquiinnɨ guxin xte pascu?
18 Jesús cuaibny:
—Gulchia láani guɨdx Jerusalén liz tal bnietqui, chiy gulgatsbɨ: Ziyla na Maistrɨ dec azeddzɨny hor xtenny ax rcaazny iteedny pascu lizbiu cun de xpɨnny.
19 Chiyru baany de xpɨnny zec ni raipny laadeb, ax banchuudeb ni iquiindeb guxin xte pascu.
20 Chi biiu guxin, Jesús zubny lo mɨlly cun irate tsɨbtiop xpɨnny.
21 Chiy lalzi caquiindeb, laany guniiny:
—Rguixtiia lot dec lagac tubytɨ gún entriagu naa.
22 Parzi quesentiand nalas guzacdeb, ax guzulo rnabdiidx tubyga pur tubygadeb laany:
—¿Ta nareniy, Dad?
23 Jesús cuaibny lodeb:
—Ni ízenaa tubylote cun nare lo plad, laabɨy gúnbɨ entriagu nare.
24 Didxldíquɨy nare Bniety ni bxiaald Dios ná par teda zec ni rnii lo xquiits Dios. Per, ¡probllɨza ná bniety ni gún entriagu nare! Par laab güenru quɨt níiutib lo guɨchliu.
25 Chiyru Judas ni ná par gún entriagu laany, gunabdiidxbɨny:
—Maistrɨ, ¿ta nareniy?
Chiy cuaby Jesús:
—Liúluu.
26 Lalzi ni caquiindeb, Jesús cuáany guechtily ax bdeedny gracy Dios. Chiyru bllullny guechtilqui gudiizny lo de xpɨnny, guniigany:
—Gulquiiny guechtilré, laani náni xcuerpa.
27 Chiyru cuáany tuby cop vin. Chi gulull bdeedny gracy Dios, ax bdeedny copqui laadeb, guniigany:
—Gulguée iratectɨ ni nuu láani copquɨ.
28 Te pur vinré, laani náni rɨny xtena ni ixíia chi gatia pur zieny bniety guɨchliu. Te pur, pur guelguty xtena illal tuby nez cuby xa gap bniety perdón lo Dios pur de xtulddeb.
29 Ne nare rniia laat dec quɨtru chúuti dxi iquiinia vin ni racchuu cun uv, axtisy dxi ni iquinnía laat vin cuby lo guelrnabee xte Xtada.
(Mr. 14:26-31; Lc. 22:31-34; Jn. 13:36-38)
30 Chi gulull biildydeb tuby cant par Dios, chiyru zédeb quia dany Olivos.
31 Chiy raipy Jesús laadeb:
—Iratet sbélaaztɨ nare anguxinré, zecquɨ ni cá lo xquiits Dios rut rnii: “Quinxúa pastor, chiy irate de llíily irɨɨch.”
32 Per chi ibíi ibánia stuby, nidoo nare azaaga Galilea chiyru gueedtɨ.
33 Ax cuaby Bed lony:
—Masquɨ iratecdeb cuelaazdeb laabiu, per nare quɨt cuelaaztia laabiu.
34 Per Jesús raipy laab:
—Nare rguixtiia loo dec anguxiniacré anste ni icuarsee bɨdygay, liú pur chon güelt aguniiu quɨt rumbeetiu nare.
35 Per Bed gubíi raipbɨ Jesús:
—Masquɨ gatia cun laabiu, per quɨt iniitia dec quɨt rumbiia laabiu.
Ne irateru de xpɨny Jesús guniiza ziy.
(Mr. 14:32-42; Lc. 22:39-46)
36 Chi bdzɨnné Jesús de xpɨnny tuby lat rut lá Getsemaní, ax raipny laadeb:
—Gulsubzic ruc, lalzi ni cháa rure chanaaba lo Dios.
37 Chiyru zéneny Bed cun iropte de llingaan Zebedeo, ax guzulo rziienny nalas ne aquɨtru xi guíllyti nuuny.
38 Chiy raipny laadeb:
—Quesentiand nalas rziienia. Azupacza aquinxú guelnalasquɨ naa. Gulyáan rurén ne quɨt gaaistit.
39 Chiyru zé Jesús delantruqui, ax guzurlony lo guɨchliu par gunaabny lo Dios, guniiny:
—Xtada, belati chalee bldábiu nare lo guelzii ni ná par teda, per quɨt gacti zec ni rcaaza sino que zec ni rcaazbiu.
40 Chiyru güeny rut zuguaa de xpɨnny, ax bdxialny laadeb raaisdeb, chiy raipny Bed:
—¿Ta niclɨ tuby hor quɨt nialee nitɨɨchtɨ xcaaldtɨ par zuguanét nare?
41 Gultɨɨch xcaaldtɨ ne gulnaab lo Dios par quɨt gún bɨndxab gan laat. Te pur rcaazquɨt gúntɨ zec ni ná par, per xcuerpɨt quɨt rzigueldti.
42 Ni rrop güelt güenaabny lo Dios, laany guniiny:
—Xtada, belati quɨt xo teed guelzii ni ná par teda, belati nápac par teda guelziiqui, su chagac zec ni rcaazbiu gac.
43 Chi biecquiny rut zuguaa de xpɨnny, adeb raaisiac stuby, pur ni cazinaa bcaald laadeb.
44 Chiyru bsáanny laadeb par zenaabny lo Dios ni rion güelt cun lagac de diidxqui.
45 Chi biecquiny rut zuguaa de xpɨnny, ax raipny laadeb:
—¿Ta zeczi raaistɨ? ¿Ta zeczi cazilaaztɨ? Per nare Bniety ni bxiaald Dios, abdzɨny hor ni gaca entriagu laznaa de bɨnduld.
46 Gulchaste. Gultoo. Gulguiaa, a ni gún entriagu nare azeddzɨngax.
(Mr. 14:43-50; Lc. 22:47-53; Jn. 18:2-11)
47 Zeczi caniné Jesús laadeb chi bdzɨny Judas ni racza tuby de xpɨnny. Bdzɨnnéb zienguilliú bɨny, caadeb spad ne yag. Zenaazdeb Jesús pur xtiidx de bxoz ni rnabee de bxoz ne pur xtiidxza de gurtisy xte de bniety Israel.
48 Ne cun Judas ni baany entriagu laany agudixteetellgab lo de bɨnqui, raipbɨ laadeb: “Bniety ni gagua tuby xmosni, laabɨy rguíilytɨ ax gulnaazbɨ.”
49 Parzi chi bdzɨny Judas, ax güebinuub Jesús chiy raipbɨ laany:
—¡Zacguxinbiu, Maistrɨ!
As gudob ruuny.
50 Chiy raipy Jesús laab:
—Xmiguaa, baany ni zedgaaniu.
Ax gubii de bɨnqui gunaazdeb Jesús par chanédebny.
51 Per tuby de ni zuguané Jesús ruy, guléeb spad xtenbɨ chiy btiiub tuby diag xmos bxoz ni rnabee de bxoz.
52 Chiyru raipy Jesús laab:
—Guluchuu spadquɨ xlatni. Te pur ni rdildy cun spad, cun spadza ratybɨ.
53 ¿Ta quɨt gannu dec nare zelee inaaba lo Xtada, ne laany nagaisga abxiaaldny pur mily de ánglɨ par gacné nare?
54 Per chiy, ¿xo gac cumplir zec ni cá lo xquiits Dios, ne lo xquiits Dios rnii dec ná par gac zec ni acayac anre?
55 Chiyru raipy Jesús de bɨnqui:
—¿Xínii zéedtɨ cun spad ne cun yag par chanét nare zecpacza tuby gubaan? Llillite guzuguanía laat laniudoroo xte Jerusalén caseeda laat xtiidx Dios, ne quɨt ninaaztɨ nare.
56 Per irate de cosré cayacni par gac cumplir zec ni gunii de profet lo xquiits Dios.
Horqui blluuin de xpɨny Jesús, gulelaazgacdeb laany.
(Mr. 14:53-65; Lc. 22:54-55, 63-71; Jn. 18:12-14, 19-24)
57 De bɨny ni gunaaz Jesús güenédebny liz Caifás, bxoz ni rnabee de bxoz, chiy ruy dxasaa de maistrɨ ni nán ley cun de gurtisy xte de bniety Israel.
58 Ne Bed zit, zit güenaldbɨ axtquɨ lo ldee liz bxozqui. Chi biiub, ax gurinéb de bɨny ni cacualo liz bxozqui par íguiaab xi gunné de bɨnqui Jesús.
59 De bxoz ni rnabee de bxoz cun irate de gurtisy gudíilydeb xi dixú icuaquiadeb Jesús par chalee chúu nez quinxúdebny.
60 Per quɨt bdxialtideb xi nicuaquiadebny masquɨ zienzi bniety gunii dixú pur laany. Chiyru gubii stiopdeb
61 ax guniideb:
—Bnietquɨ guniib: “Nare zelee itsɨlia yudoo xte Dios, ne cun chon dxi agubíi bzuubani stuby.”
62 Chiyru güesuldí bxoz ni rnabee de bxoz, ax raipbɨ Jesús:
—¿Xínii quɨt xi rniitiu? ¿Ta didxldí ná ni caniideb pur liú?
63 Per Jesús quɨt xi cuaibtiny. Chiy raipy bxozqui laany:
—Pur Dios ni rbez nabány, nare rniia liú gunii dunnɨ didxldí, ¿ta liúy Crist Lliin Dios?
64 Jesús cuaibny:
—Guldícbiu, narelay. Ne ziyza rniia laat dec sniát nare Bniety ni bxiaald Dios zuba lad naldí xtenny, laany ni napny irate guelrnabee ne sniázactɨ nare guelda láani zá llayabaa.
65 Chi bindiag bxozqui ziy ax gudillaab xabbɨ, guniigab:
—Diosɨng absaclo bnietquɨ. ¿Xílesa par idíilyrun testigu? Laat abindiagtɨ xa casaclob Dios cun de xtiidxbɨ.
66 Anre, ¿xi rniit?
Chiy cuaby de bɨnqui:
—Laab riáld gatybɨ.
67 Ax btiuxɨ́ndeb lony, btaazdebny ne ziyza guuza ni gudap lony,
68 raipdeb laany:
—Belati liúy Crist, ¡guniyáa túy btaaz liú!
(Mr. 14:66-72; Lc. 22:55-62; Jn. 18:15-18, 25-27)
69 Lalzi zub Bed lo ldee liz bxozqui gubii tuby criad, raipy laab:
—Né liú candzaníu Jesús ni zá Galilea.
70 Per Bed quɨt niziruutib dec xpɨnny laab, ax guniib nez lo iratedeb:
—Niclɨ quɨt ganna xing rniiu.
71 Chiyru zéb nez ruu puert, ne nezqui guná stuby criad laab ax raipy criadqui de bniety ni zuguaa ruy:
—Né bnietquɨ candzané Jesús de Nazaret.
72 Per Bed quɨtiac niziruutib xpɨnny laab, ax axt baanbɨ jurar guniib:
—Quɨt rumbeetia bnietquɨ.
73 Chiy alizypacquɨy güebii de ni zuguaa ruy rut zuguaa Bed, raipdeb laab:
—Güeldíte né liú noo tuby de xpɨndeb, te pur zectiziac ni rueedeb diidx rueezacu diidx.
74 Per Bed guzutipnéb laab ax guniib:
—Dios gúnny castigu nare belati quɨt guldía, per nare quɨt rumbeetia bnietquɨ.
Ne hóracqui bcuarsee bɨdygay.
75 Ax güenelaaz Bed dec raipy Jesús laab: “Anste ni icuarsee bɨdygay, liú pur chon güelt aguniiu dec quɨt rumbeetiu nare.” Chiyru bdiia Bed ruy ne quesentiand ruunbɨ tant nalas bziienbɨ.