13
Jesús‑ni rigíbie ni'a ka benne rudhetinieha
1 Atti lani isia laní Pascuaha, yuba Jesús‑ni deki chiba bisia ura edábie yiesi lo yu‑ni nna esine ata do Tataha. Aníha‑ba ttiba ukanie ge ka benne gebie se'e yiesi lo yu‑ni, aníha‑ba sa ukanie geke axtaba tti chi uttieha.
2 Tti chi se'eke go irseha, chi galá uxí yie nu xxegwiha Judas Iscariote xi'in Simón‑ni, ki utene lasi ná ka nu uttikaneha.
3 Jesús‑ni, kumu chiba yubie deki Tata Do Yebáha, iyába chi betebie lasi nábie lhe yube deki ata do Tataha‑ba birie nna bisie yiesi lo yu‑ni lhe ata do benneha‑gaba esine lhe,
4 de nuha nna loora se'eke go irseha, udú liie nna utuabie lari nukueha, nianna tti bedaxxue ttu lari bexxika lhe'ebie.
5 Nianna tti uta'abie inda lhe'e ttu xiga nna uduloe utíe ni'a ka benne rudhetinieha nna bodibisie ka nuha len lari xika lhe'eeha.
6 Tti chi diabie kíe ni'a Simón Pedro‑ni, lana nna rane:
―Labí dika lula kílu ni'aya xa tata.
7 Jesús‑ni nna bekabie geni, ree:
―Labí tte denlu bixa nuní runia nnanna, ttaka deloliba nna tte denlu nuní.
8 Pedro‑ni nna rane:
―¡Netiligaba nna labí dhielhaa kílu ni'aya!
Jesús‑ni nna ree na:
―Ganna abíba dhielhalu kía ni'alu, labíru akalu kia.
9 Nianna ra Pedro‑nie:
―Ganna niha, nna labí sun ka ni'aya‑ni kílu, kígabalu ikia‑ni lhe ka náya‑ni lhe.
10 Jesús‑ni nna ree na:
―Ttu benne chi udi labíru riyasin benneha gadie attu libe, a sun ka ni'abe ití, kumu itúba benneha chi anke nari xú nna lebi'i chiba beyarile arlo Tata Do Yebáha, meskiba laa iyále chi beyari.
11 Kumu yube nuxakana nuha utekane lasi ná ka nu uttikaneha, de nuha nna rabie kana: “Labí iyále chi beyari.”
12 Iki de chi utíbie ni'a ka benneha, nianna tti beyokue lari nukueha nna bedobie ro'o mexaha nna ree ke:
―¿Si gwa rite denle bixa nuní bedhakaa le?
13 Lebi'i tenle láya Maestru lhe rale deki ankaa Xxanale lhe. Gwalíbinle kumu neti gwalíba ankaa nu rale‑na.
14 Ki neti ankalaa Xxanale lhe Maestru gele nna chi utía ka ni'ale‑na, anágaba lebi'i teeki kí ni'a luesile.
15 Neti chi bele'enia le nuní, kini attiba benia utía ni'ale, anágaba uinle.
16 Netiru ria, nu ren sina lo xxananiha labí xxenirula ra le nuha attichula xxananiha. Nigaba nu reki mandaduha, labí xxenirula ra le nuha attichila nu ruinna na mandaduha.
17 Lebi'i ganna rite denle nu ria‑ni, karubárule ganna tse'ele uinle aní.
18 Labí iyále nuní xpeya aní; kumu neti yu xeabaa gá se'e ka benne chi ulesia ke ki akake kia. Ttaka teeki sado tisa ge nu ra lo ka yetsi ge Tata Do Yebáha, ata dia ra: “Nu dona go yetta turo'o len netiha, la labana beyekina bebi'i noona neti.”
19 Nnannali chi rigixxi'ania le nuní tti lanila akana, kini ganna chi ukanaha, la'ania nna tsia lele deki neti nuha ankaa Cristu.
20 Netiru ria, nu ulabina benne idhelhaaha, neti nuha ulabi nuha nna nu ulabina netiha nna benne udhelhe netiha nuha ulabina.
Jesús‑ni rigixxi'abie nuxa ka benne rudhetinieha nuha uteke bie lasi ná ka nu uttikaneha
(Mt. 26:20-25; Mr. 14:17-21; Lc. 22:21-23)
21 Iki de ra Jesús‑ni aníha, nianna tti bedú si'i xxattana lebie nna ree:
―Netiru ria, nuxa ttúle nuní utele neti lasi ná ka nu uttikana neti.
22 Ka benne rudhetinieha nna udulo ttebake rugía lo luesike, kumu labí yuke nuxa geke nuha rinnebie.
23 Ttu ka benneha, benne raka xxattani Jesús‑ni geeha, doe gaxxaba kwe'ebie tti yu'uke go irseha.
24 Benneha nuha betten ná Simón Pedro‑ni kini innaba tise Jesús‑ni nuxa geke nuha rinnebie.
25 Benneha nna ubigarue gaxxa kwe'e Jesús‑ni nna unnaba tise bie, ree:
―¿Núlatu nuní xa tata?
26 Jesús‑ni nna bekabie ree:
―Nu ugwea na yettaxtila odibidhaa ikini, lana nuha utena neti lasi ná ka nu uttikana netiha.
Nianna tti bodibidhe iki yettaxtilaha nna begwebie Judas Iscariote xi'in Simón‑ni.
27 Tti chi utona yettaxtilaha nna uta'a tteba nu xxegwiha lhe'e lastoni, nianna tti ra Jesús‑ni na:
―Tsa ttela beni nu chi re lelu uinlu.
28 Ttaka ni ttú ka benne se'e lenie ro'o mexaha, a ute dákanie beaka rabie na aníha.
29 Kumu de Judas‑ni denna beduti to yu'u belhiu gekeha, laxkala ttu chupake rakakanie ganna raba Jesús‑ni na: “Ugía gwayo'o nu ixuinri'i laní‑ni” o ree na: “Begwe ka benne dii abittu geke tee latti belhiu.”
30 Iki de chi beyaka uto Judas‑ni yettaxtilaha, nianna tti biria ttebana diana. Chiba anka rela nuha la'ania.
Jesús‑ni rigixxi'abie deki Pedro‑ni labí dhi ro'oni deki ankabienne
(Mt. 26:31-35; Mr. 14:27-31; Lc. 22:31-34)
31 Nianna iki de chi biria Judas‑ni diana, nianna ra Jesús‑ni:
―Neti benne daya yebáha nnanna chi ula'a nu xxeni ra lasia, lhe de neti nna ula'a nu xxeni ra le Tata Do Yebáha.
32 Ganna neti ule'a nu xxeni ra le Tata Do Yebáha, anágaba Tata Do Yebáha nna ule'egabe nu xxeni ra lasia nna chi tte duna ule'ebie nu xxeni ra lasia.
33 Xi'ini to kia, attu satti toruba gwadoa len lebi'i, nianna tti egilale neti. Nnanna upeya le nu chigaba xpeya ka nu loni ge ka benne Israel‑ni: Ata eya'ayaha, lebi'i labí aka esiale niha.
34 Ttu tisa kubi rodha'anaa len lebi'i ki uinle nu rana, delába akin ge luesile. Lebi'i teeki akin ge luesile attiba neti rakati gele.
35 Ganna rakani ge luesile, la'ania nna iyába ka benne tte dákanie deki lebi'i chiba ankale benne rudhetinia.
36 Simón Pedro‑ni nna unnaba tisana Jesús‑ni, rane:
―¿Gála tsialu xa tata?
Jesús‑ni nna bekabie geni, ree:
―Ata eya'ayaha, lu labí aka etenalhalu neti nnanna, ttaka delola nna gwetabalu len neti.
37 Pedro‑ni nna rane:
―¿Beakala labí aka etanalhaa kwinalu nnanna xa tata? ¡Neti chiba beria iki beria lasia gattia kwenta gelu!
38 Jesús‑ni nna bekabie geni, ree:
―¿Si gattilu kwenta kia? Netiru ria, lanila kwesi chinkaha, lu tsunna libela chi bedhea lelu abittu ridí ro'olu deki ankabienlu neti.