18
Bedaxxukana Jesús‑ni kini uttikane
(Mt. 26:47-56; Mr. 14:43-50; Lc. 22:47-53)
1 Iki de chi unne Jesús‑ni iyá nuha, nianna tti biriabie dia lenie ka benne rudhetinieha uteke attu ladu ge yoo bisi nu tee láni Cedrón. Niha tee ttu yu daa ka ya olivu loni. Lhe'e yu ata daa ka yagaha uta'a lenie ka benne rudhetinieha.
2 Judas nu utena Jesús‑ni lasi ná ka nu uttikaneha chigaba ankabienna niha, kumu ixe lidúba chi ugía Jesús‑ni len ka benne rudhetinieha lhe'e yuha.
3 Aníha uka nna bisin len Judas‑ni ka soldadu lhe ka nu rise'e gweyú ro'o yotuha lhe. Ka nuha udhelha ka nu loni ge ka bixxudiha kana lhe udhelha ka fariseo‑ni kana. Diakana denkana espada lhe yaga lhe dengabakana ka lámpara lhe ya nalha gi lhe.
4 Ttaka kumu Jesús‑ni chiba yubie iyá nu satebie, nianna biriabie gwatsee kana nna ree:
―¿Nú regilale?
5 Lakana nna bekabikana, rákana:
―Jesús ge Nazaret‑niba regilatu xa.
Jesús‑ni nna ree kana:
―Netiba nuní regilale.
(Judas nu utene lasi ná ka nu uttikaneha, niha‑gaba dana len ka nuha.)
6 Tti ra Jesús‑ni kana: “Netiba nuní”, nianna tti beyadi gaakana nna ubixxi lokana lo yu.
7 Nianna tti bedennaba tise kana attu libe, ree:
―¿Nú regilale?
Lakana nna redenákana:
―Jesús ge Nazaret‑niba xa.
8 Jesús‑ni nna bedekabie gekani, ree:
―Ki chiba ria le: “Netiba nuní.” Ganna neti regilale, gwalugwelhaxa ka nu rudhetinia‑ni eyyakana.
9 Aníha uka kini gwado tisa ge nu chi unnebie, tti ree: “Tata, ka benne chi betelu len neti, ni ttú ka benneha labí bennittia.”
10 Nianna tti ulea Simón Pedro‑ni espada dennaha nna uchúna naga ben ge Malco‑ni. Malco‑ni ribenna lo sina ge nu anka bixxudi xeniha.
11 Jesús‑ni nna rabie Pedro‑ni:
―Boga'a espada gelu‑na lhe'e xoni. Neti, ¿katte si abí gwa dhielhaa uyúa elha disa nu ute Tata kiaha?
Jesús‑ni biso due arlo Anás‑ni
(Mt. 26:57-58; Mr. 14:53-54; Lc. 22:54)
12 Ka soldaduha lhe nu loni gekaniha lhe ka nu rise'e gweyú ro'o yotuha lhe, ka nuha bedaxxukana Jesús‑ni nna bexxigakane.
13 Nianna tti dechekane lade'a tte arlo Anás‑ni, kumu lana ankana xxudi nuila ge Caifás. Caifás‑ni nuha anka bixxudi xeni lhe'e idaha.
14 Caifás‑ni nuha rana ka nu loni ge ka nu Israel‑ni: “Tserula saríana ri'i ganna sun ttúba benne gattie kwenta ge iyá ka benne.”
Pedro‑ni labí ridí ro'oni deki ankabienna Jesús‑ni
(Mt. 26:69-70; Mr. 14:66-68; Lc. 22:55-57)
15 Simón Pedro‑ni lhe attu ka benne rudhetinieha lhe danalhabake Jesús‑ni. Kumu ttu benneha, de ankabianie bixxudi xeniha, de nuha nna uta'abe len Jesús‑ni lali'a yo'o ge bixxudiha.
16 Ttaka Pedro‑ni nna beya'anbana ro'o yo'oha, labí uta'ana. Benne ankabianie bixxudi xeniha nna beriabie nna unne lenie nuila nu ruyúna ro'o yo'oha, kini begwelha nuha uta'a Pedro‑ni.
17 Nuilaha nna unnaba tisana Pedro‑ni, rana na:
―¿Laaba lu ankagabalu ttu ka nu rudhetini nubiyú‑na?
Lana nna bekabina, rana:
―¡Ko'o! Labí.
18 Ka nu riben sina ge bixxudi xeniha lhe ka nu rise'e gweyú ro'o yotuha lhe, ka nuha bebekikana gi nna se'ekana gwetsa'a ro'o giha kumu yalhá idilha raka. Niha‑gaba du Pedro‑ni len ka nuha gwetsa'a ro'o giha.
Anás‑ni unnaba tisana Jesús‑ni
(Mt. 26:59-66; Mr. 14:55-64; Lc. 22:66-71)
19 Bixxudi xeniha nna unnaba tisana Jesús‑ni ge ka benne rudhetinieha lhe ge ka tisa rekie rule'enie ka benne lhe.
20 Jesús‑ni nna bekabie geni, ree na:
―Neti la looba rinnea arlo ka benne. Satíaba udúa rule'enia ka benne lhe'e yotuha lhe lhe'e ka yo'o ata ritupa iyári'i ka benne Israel rudhetiri'i ka tisa ge Tata Do Yebáha. Labí bixa unnea gatsi.
21 ¿Beaka netila rinnaba tisalu? Unnaba tisa ka nu chi biyienkinna ge nu rinnea‑ni. Ka nuná gwa yúkana bixa chi ria.
22 Tti ra Jesús‑ni aníha, ttu ka nu rise'e gweyú ro'o yotuha, nuha duna gaxxaba ata dueha nna uleana gi ro'e nna rane:
―¿Si aná dika ekabilu ge benne anke bixxudi xeni‑na?
23 Jesús‑ni nna bekabie geni, ree:
―Ganna abíba unne tsea, utixxi'achu biunna a unne tsea. Ganna gwa unne tsebaa nna, ¿beakala bedhenlalu neti?
24 Nianna aníha‑ba xika Jesús‑ni udhelha Anás‑nie arlo Caifás nu anka bixxudi xeniha.
Pedro‑ni berupa libe‑la a ridí ro'oni deki ankabienna Jesús‑ni
(Mt. 26:71-75; Mr. 14:69-72; Lc. 22:58-62)
25 Pedro‑ni nna niha‑ba sa duna ro'o giha rutsa'ana, nianna tti ra ka nu se'e niha na:
―¿Laaba luba nuha ttu ka nu danalhalu nubiyú‑na?
Lana nna labí uxí ro'oni, rálana:
―¡Ko'o! Laa netiga nuha.
26 Ttu ka nu riben sina ge bixxudi xeniha, delába ttu nu datiana nu uchú Pedro‑ni naganiha, nuha rana na:
―¿Laaba ata daa ka ya olivuha‑ba biláti lu, du lenlu nubiyú‑na?
27 Pedro‑ni nna labí bededí ro'oni attu libe. Looraha tteba nna uresi chinkaha.
Jesús‑ni biso due arlo Pilato‑ni
(Mt. 27:1-2, 11-14; Mr. 15:1-5; Lc. 23:1-5)
28 Chebakana Jesús‑ni udá lenkane lhe'e lisi Caifás‑ni nna bisin lenkane lhe'e guskadu ata do nu rinnabia ge Roma‑ni. Ttaka kumu chiba daa tsani nuha, laxkala ka nu lo ge ka benne Israel‑ni labí uta'akana lhe'e guskaduha kini ka itsigakana arlo Tata Do Yebáha ganna ga'akana ata se'e ka nu labí ankakana benne Israel. Kumu ganna itsigakana, la'ania nna labíru aka gokana irse nu tekinna láni irse ge laní Pascua.
29 Nianna tti biria Pilato‑ni ata se'ekanaha nna rana kana:
―¿Bí ge nuní rusiale iki nubiyú‑ni?
30 Lakana nna bekabikana geni, rákana na:
―Gannala ttixka abittuba ankana ttu nu ruin satsa, la'ania nna abittula bisia lentu na arlolu ganna ttixka.
31 Pilato‑ni nna rana kana:
―Lebi'iba gwaleche na nna gwaluinba elhuxtisi geni attiba ra lo bia bennabi gele‑na.
Ka nu loni ge ka benne Israel‑ni nna rákana:
―Ri'itu labí ga'anna uttitu ttu benne.
32 Aníha uka kini gwado tisa ge nu unne Jesús‑ni tti utixxi'abie gaxasina gattie.
33 Nianna tti bedeta'a Pilato‑ni attu libe lhe'e guskaduha nna uxina Jesús‑ni nna rane:
―¿Si lu ankalu nu rinnabia ge ka benne Israel‑ni?
34 Jesús‑ni nna bekabie geni ree:
―¿Si nu anka gelu nuná ralu aná ak? O, ¿nu subiba utixxi'enna lu kia ak?
35 Pilato‑ni nna bekabina gee, rana:
―Ki gwa yúbalu laa benne Israel‑ga neti nna ralu aná. Ka benne lhe'esi gelu‑naba lhe ka nu loni ge ka bixxudi‑naba betega'akana lu lasi náya. ¿Bí benlu?
36 Jesús‑ni nna bekabie ree:
―Yiesi lo yu‑ni labí ankana ata innabiaya. Gannala ttixka innabiaya yiesi lo yu‑ni, la'ania nna ka benne danalhake netiha gwa bitilhalake kini abittu bedaxxu ka nu Israel‑ni neti, ttaka labí yiesi lo yu‑ni innabiaya.
37 Nianna ra Pilato‑nie:
―Nianna, ¿si lu ankalu nu rinnabia?
Jesús‑ni nna bekabie, ree:
―Luba ra deki neti ankaa nu rinnabia xa. Neti ki de nuha‑la ulia lhe de nuha‑la daya yiesi lo yu‑ni kini kixxi'aya ge nu anka gwalí. Iyába ka nu gwa ria lekani ge nu anka gwalí, gwa rudoba nagakani ge nu rinnea.
38 Pilato‑ni nna rane:
―¿Bí nuha nu anka gwalí?
Beda'aba ro'okani uttikana Jesús‑ni
(Mt. 27:15-31; Mr. 15:6-20; Lc. 23:13-25)
Nuha‑ba ra Pilato‑ni nna tti bederiana attu libe ata se'e ka nu Israel‑ni nna rana kana:
―Labí raxxakaa bixa tulha ben nuní.
39 Ttaka kumu lebi'i chi labinle kua risiaba laní Pascua teeki odiláya ttu nu tee lisiyya, nnanna gwalinná: ¿si gwa raka lele odiláya nu anka nu rinnabia gele‑ni?
40 Ttaka iyábakana bedebesi'akana attu libe, rákana:
―¡Ko'o! ¡Labí olhálu nuná! ¡Barrabás‑nala bolhá!
Barrabás‑ni ukana ttu nu runi ubana.